Gimpuunan 24 - Hanunuu

Asawa para sa kan Isaak

¹ Gurangun yi gid si Abraham ag pinapaladan siya Panginuun sa tanan pag bagay.

² Sa usa ka sirang, hinampang niya kay manugpamahala pag suruguun taga asikasu sa tanan niya kasiyunan. Magkun siya, “Paulian kanmu usa ka kamang sa tab-anan niku balangbang,

³ ag pagsumpa kawu sa kangku sa ngaran Panginuun, ti Diyus langit ag daga, kuntay balaw kawu manpili arasawan-un niku anak ni Isaak sitay ginan sa Kanaan kaibahan nita mag-ulian.

⁴ Pag-atag kawu sa dinak-anan niku pag rugar, ag ati kawu pagpili babayi maasawa niku anak, ni Isaak, ginan sa kang manga katawuhan.”

⁵ Dapat nagpaingana ti suruguun, “Kabitay duy nu dayu manguyug tunda pag babayi ataytabug? Daran-un yi lang aw lugud niku si Isaak atag?”

⁶ Sinmagut si Abraham, “Danga gid pagdaraha atag si Isaak!

⁷ Dinara aku sitay tag Panginuun, ti Diyus kalangitan, ginan sa magtal-anakan niku ama, sa rugar nu naan aku pag ainanak. Ag nagsumpa siya kay ipakaun inda pag daga Kanaan sa kang manga linahi. Nakan pagginan yi kawu dahil manpadara ti Panginuun kay anghil man-iba sa kanmu hampay makakit kawu ati maasawa niku anak.

⁸ Nu balaw kumuyug sa kanmu ti babayi, unman kawu may saragtun sa inda pag sumpa nimu sa kangku. Dapat danga nimu pag daraha atabug kang anak.”

⁹ Nakan ipinauli suruguun kay kamang sa tab-anan balangbang ni Abraham, kay amu, ag nansumpa kuntay sundun niya kay pag-isugu sa kanya.

¹⁰ Bag-u nagbuul ti suruguun sampulu ka kamilyu hanggan manga mahalaga pag pamakaun ginan sa kay amu, sa kan Abraham. Linmakaw siya atabug sa Aram Naharaim, ti pag-ulian ni Nahur pag banwa.

¹¹ Igu rinmas-ug ti suruguun sa banwa, pinaluhud niya ti manga kamilyu arani sa may bubun sa may luwas banwa. Malambung yi tunda katpung, udas yi panaas danum manga kababayihan.

¹² Nandarangin ti suruguun magkun, “Panginuun, Diyus niku amu, ni Abraham, mana mitarus duy kang turunu atay, pakakitan nimu kanmu kaayadan sa kang amu.

¹³ Tumindug duy aku sa may arani bubun habang magtaas ti manga babayi sa inda pag banwa.

¹⁴ Nu manhagad aku danum sa banga usa ka daraga, bag-u pumasnu siya painmun aku hanggan kang manga kamilyu, mana siya yi pag babayi kanmu pinili maasawa nimu suruguun, ni Isaak. Sa katida pag paraan maalaman niku ipinakakit nimu kanmu kaayadan sa kang amu, sa kan Abraham.”

¹⁵ Unman waya tapus kay darangin, rinmas-ug si Ribika may pas-an banga. Si Ribika kay anak ni Bitwil, bag-u si Bitwil kay anak ni Nahur ag ni Milka. Si Nahur kay patar-ari ni Abraham.

¹⁶ Marinu gid pag daraga si Ribika ag tugnaw waya. Linmus-ug siya atabug sa bubun ag sinukadan niya danum kay banga. Bag-u tinmukad maan siya hampay muli.

¹⁷ Nagdaldali ti suruguun sa pagsulang sa kanya ag magkun, “Mahimu aw duy makainum aku sa kanmu banga una diit lang?”

¹⁸ Sinmagut si Ribika, “Hu duy, pag-inum kawu.” Ginan sa kay labay kay ipinadna kay banga ag hiniyaptan inda habang mag-inum ti suruguun.

¹⁹ Igu napainman niya ti suruguun, magkun siya, “Mantaas maan duy aku para sa kanmu manga kamilyu tugka sa makainum sida tanan.”

²⁰ Daldali niya ibinuhus ti danum sa irinman hayup ag binmalik siya sa bubun hampay mantaas maan. Nantaas siya tugka sa nakainum ti tanan kamilyu.

²¹ Habang magbantay ti suruguun sa kan Ribika, mag-isip siya nu tunda yi ngani ti sagut Panginuun sa kay turunu sa tunda pag rugar.

²² Pagka nakainum ti manga kamilyu, binulwat suruguun kay dara aritus gintu para sa irung kay buyat manga unum ka guhit. Binulwat diman niya ti duwa ka ugsung gintu kay buyat manga 120 ka guhit. Ag ipinakaun niya inda sa kan Ribika.

²³ Bag-u nagpaingana siya sa kan Ribika, “Kantapu kawu pag anak? May rugar aw waya duy asan sa kanyu ti mahimu nimi maturugan kainda pag yabi?”

²⁴ Nagsagut si Ribika, “Kan Bitwil aku pag anak, anak lalaki nida ni Nahur ni Milka.

²⁵ May maturugan waya duy kawu ati sa kanmi, ag may imaw diman mayamu pag dayami hanggan karan-unun para sa manga kamilyu nimu.”

²⁶ Linmuhud ti suruguun ag nagsamba sa Panginuun.

²⁷ Magkun siya, “Dayawun ti Panginuun, ti Diyus niku amu, ni Abraham. Ipinakakit gid niya kay kaayadan sa kang amu. Aku ngap mismu kay giniyahan atabug sa manga katawuhan niku amu.”

²⁸ Palagiw nuli si Ribika sa balay niya ina ag itinultul niya sa kanda ti tanan nangyari.

^29-30 Kay patar-ari si Laban ati diman magpatingi sa kay pag-itultul tungkul sa sinabi tawu sa kanya. Nakitan ni Laban ti aritus hanggan ti ugsung masulungan sa kan Ribika. Nakan nalagiw siya atabug sa bubun ag inatag ti pagkumnun ni Ribika pag tawu. Ati diman ti tawu matindugan sa may arani bubun, sa arani manga kamilyu.

³¹ Magkun si Laban sa kanya, “Kawu maaw pag tawu ti pinapaladan Panginuun. Hayga duy matindugan kawu siyun sa luwas? Abala yi atag kita sa balay, dahil inalistu yi niku ti sulud-sulud para sa kanyu hanggan ti rugar para sa kanmu manga kamilyu.”

³² Kinmuyug ngani ti suruguun sa kan Laban. Igu rinmas-ug sida sa balay, ipinadna ni Laban ti manga makargahan sa manga kamilyu bag-u susun niya pinakan-an dayami hanggan karan-unun ti kamilyu. Dinarahan diman niya danum ti suruguun hanggan kay manga kaibahan, hampay makaugas sida kanda manga lulud.

³³ Pagka napakan-an yi sida karan-unun, magkun ti suruguun, “Balaw aku mangaun sa udwaya niku masabi kang turunu ataytabug.” Sinmagut si Laban, “Hu, tultulan sa kanmi.”

³⁴ Magkun siya, “Suruguun aku ni Abraham.

³⁵ Pinapaladan Panginuun kang amu ag mayaman yi gid siya taynguna. Pinakan-an siya Panginuun mayamu karanidu, kambing, baka, kamilyu, asnu, pilak, gintu hanggan manga suruguun lalaki ag babayi.

³⁶ Una gurangun yi kay asawa si Sara, nagkaanak waya siya. Ag kanda anak lalaki imaw ti manmana tanan kasiyunan niya.

³⁷ Pinasumpa aku niku amu hampay tupadun niku kay sugu. Magkun siya, ‘Danga kawu magpili arasawan-un niku anak sitay ginan sa manga taga Kanaan ti pag-ulian nita pag daga taynguna.

³⁸ Pag-atag kawu sa ulian niku ama, ati kawu pagpili maasawa niku anak, ginan sa kang manga katawuhan.’

³⁹ Dapat nagpaingana aku, ‘Kabitay duy nu balaw kumuyug sa kangku ti babayi?’

⁴⁰ Nagsagut siya, ‘Ti Panginuun kang pagsundun pumadara anghil hampay giyahan kawu agud matupad kanmu turunu ati. Kumakit kawu maasawa niku anak ginan sa kang manga katawuhan, sa magtal-anakan niku ama.

⁴¹ Nu atabug kawu sa kang manga katawuhan, unman yi kawu may saragtun sa sumpa nimu sa kangku nu balaw nida ipakuyug ti babayi sa kanmu.’

⁴² “Nakan pagras-ug niku kis-ab sa bubun, nandrangin aku. Magkun aku, ‘Panginuun, Diyus niku amu, ni Abraham, mana mitarus duy kang gayak ataytag.

⁴³ Taynguna duy, matindugan aku atay sa may bubun. Nu may rumas-ug duy daraga manaas danum, manhagad aku danum kadiit sa kay banga.

⁴⁴ Nu pumasnu duy siya painmun aku hanggan kang manga kamilyu, mana siya yi ngani duy pag babayi ti pinili nimu maasawa anak niku amu.’

⁴⁵ “Udwaya ngani aku magkatapus sa kang darangin, rinmas-ug si Ribika may pas-an banga. Linmus-ug siya atabug sa bubun ag nantaas. Magkun aku sa kanya, ‘Mahimu aw aku makainum?’

⁴⁶ Susun niya ipinadna kay pas-an banga ag magkun, ‘Hu, pag-inum kawu, ag painmun diman niku kanmu manga kamilyu.’ Nakan inminum ngani aku ag pinainman diman niya kang manga kamilyu.

⁴⁷ Bag-u nagpaingana aku sa kanya nu kantapu siya pag anak. Nagsagut siya, ‘Kan Bitwil, kay anak lalaki nida ni Nahur ni Milka.’ Ag pinaulian niku aritus kay irung ag pinasulungan manga ugsung kay manga takyay.

⁴⁸ Susun nagluhud aku nagsamba sa Panginuun. Nagdayaw aku sa Panginuun, ti Diyus niku amu, ni Abraham. Siya ti naggiya sa kangku sa hustu pag rugar, nu naan pag nakitan niku ti anak katawuhan niku amu hampay maasawa niya anak.

⁴⁹ “Taynguna, gustu niku maalaman nu pasnuan niyu aku maasawa ni Isaak si Ribika bilang pagpakakit kanyu kaayadan sa kang amu. Sabiha yi niyu taynguna hampay maalaman diman niku nu hintay kang buwatun.”

⁵⁰ Nagsagut si Laban hanggan si Bitwil, “Dahil inda ti kagustuhan Panginuun, unman yi kami may masabi.

⁵¹ Indaay si Ribika, tabana nimu siya sa kanmu pag-uli hampay maasawa nimu anak amu, angay sa sinabi Panginuun.”

⁵² Igu nasaydan tunda suruguun, linmuhud siya ag nagsamba sa Panginuun.

⁵³ Susun niya binulwat kay dara manga pamarinu buwat sa gintu ag pilak, hanggan ti manga rutay, bag-u ipinakaun sa kan Ribika. Pinakan-an diman niya mahalaga pag pamakaun kay patar-ari lalaki hanggan kay ina ni Ribika.

⁵⁴ Siyun ginan, kinmaun ti suruguun hanggan kay manga kaibahan. Ati sida pag naturug sa tunda pag yabi. Igu nipulaw sida sa surip, magkun ti suruguun, “Muli yi aku sa kang amu.”

⁵⁵ Dapat magkun kay patar-ari hanggan kay ina ni Ribika, “Pagsitay lang dap si Ribika sa kanmi una lang sampulu ka sirang, siyun ginan mahimu yi kamu guminan.”

⁵⁶ Dapat magkun ti suruguun, “Danga waydi aku pagpadugaya sitay. Giniyahan aku Panginuun sa kang turunu atay, nakan paulia yi niyu aku sa kang amu.”

⁵⁷ Sinmagut sida, “Tawagun dap nimi si Ribika ag paingan-un nu hintay kay pasya.”

⁵⁸ Nakan tinawag ngani nida si Ribika ag pinaingana, “Magkaibug aw kawu kumuyug sa kanya taynguna?” Nagsagut si Ribika, “Hu, kumuyug aku.”

⁵⁹ Nakan ipinakuyug nida si Ribika hanggan ti taga alaga niya sa suruguun ni Abraham hanggan kay manga kaibahan.

⁶⁰ Pinapaladan nida si Ribika sa kay pagginan. Magkun sida, “Patar-ari, mana kawu ti ina mayamu gid pag linahi. Mana taluhun manga linahi nimu kanda manga kalaban.”

⁶¹ Pagka alistu yi ti tanan, sinmakay si Ribika hanggan kay manga suruguun babayi sa manga kamilyu, ag dinmasun sida sa suruguun ni Abraham.

⁶² Ati katpung, si Isaak mag-uli sa Nigib bag-u lang nakaaput sa Biir Lahay Ruy.

⁶³ Pagka marukirum yi, linmuwas si Isaak ag linmakaw-lakaw sa tanman. May nakitan siya manga kamilyu magras-ug.

⁶⁴ Pagka nakitan ni Ribika si Isaak, dinmugsun siya sa kay kamilyu

⁶⁵ ag nagpaingana sa suruguun ni Abraham, “Si unu pag tawu ti maglakaw tidaay sa may tanman?” Sinmagut ti suruguun, “Siya kang amu si Isaak.” Nakan tinumungan ni Ribika kay uyahun.

⁶⁶ Sinabi suruguun sa kan Isaak ti tanan binwat niya.

⁶⁷ Bag-u dinara ni Isaak si Ribika sa turda sa pag-ulian kaybi niya ina ni Sara. Naasawa niya si Ribika ag pagmahalun gid niya inda. Nakan nahimasmasan ti karukuan ni Isaak sa pagkamatay niya ina.