Gimpuunan 23 - Hanunuu

Namatay si Sara ag Nanbili si Abraham Lulubngan

¹ Nabuhi si Sara manga 127 ka timpu.

² Ati siya pag namatay sa Kiryat Arba (imaw diman ti Hibrun) sa daga Kanaan. Masyadu gid kay karukuan ni Abraham sa pagkamatay ni Sara.

³ Tinayakan dapu ni Abraham ti bangkay niya asawa bag-u nanpakihampang siya sa manga Hitiyu ag magkun sa kanda,

⁴ “Mag-uli aku sitay sa kanyu rugar usa ka day-uhan, nakan nu mahimu pabilihi aku niyu daga mahimu lulubngan niku asawa.”

⁵ Sinmagut ti manga Hitiyu,

⁶ “Panginuun, pagkilalan-un kawu nimi bantug pag tawu, nakan mahimu nimu ilubung kanmu asawa una naan sa kanmi pinakamarinu pag manga lulubngan. Unman gid may mangirang lulubngan sa kanmu una di usa sa kanmi hampay milubung nimu kanmu asawa.”

⁷ Susun napayuk-ub si Abraham tanda pagpasalamat sa atubangan manga Hitiyu.

⁸ Bag-u magkun siya, “Nu pasnu gid waydi kamu sitay pag ilubung niku kang asawa, awati niyu aku hampangun si Iprun kay anak ni Suar

⁹ kuntay pabilihan sa kangku kay lukib ati sa may saruy niya tanman sa Makpila. Sabihi niyu siya bayadan di niku siya sa kang-ud pag halaga sitay sa kanyu atubangan hampay kangku yi inda pag lukib agud buwatun lulubngan.”

¹⁰ Asan diman maaw si Iprun matukawan kaibahan kay manga kasimanwa Hitiyu. Nakan sinmagut siya sa kan Abraham magdungug ti tanan Hitiyu magtiripnan ati sa may puwirtahan banwa.

¹¹ Magkun siya, “Sa atubangan niku manga kasimanwa pag-ipakaun niku sa kanmu ti buu tanman hanggan yi ti lukib. Nakan mahimu yi nimu ilbung kanmu asawa.”

¹² Napayuk-ub maan si Abraham sa atubangan manga Hitiyu.

¹³ Bag-u magkun siya sa kan Iprun mag-asaydan tanan, “Pagpatingi kamu sa kangku. Bayadan niku ti halaga tanman. Tanggapa nimu kang bayad hampay milbung yi niku ati kang asawa.”

¹⁴ Sinmagut si Iprun,

¹⁵ “Panginuun, ti daga halaga 400 bilug pilak. Nu sa bagay, nu bayadan nimu, pira lang waydi inda sa kanmu hanggan sa kangku. Lubngan yi ati kanmu asawa.”

¹⁶ Nagpasnu ngani si Abraham sa sinabi ni Iprun pag halaga. Nakan namayad siya 400 bilug pilak angay sa kiluhan kaybi manga manug-ahinti. Ag ibinayad niya inda sa kan Iprun ati sa atubangan manga Hitiyu.

^17-18 Nakan naapu ni Abraham ti tanman ni Iprun ati sa Makpila, sa butlakan Mamri, hanggan yi ti lukib, ti manga puun kayu sa tanman hanggan sa kay saruy tanman. Kastigus ti tanan Hitiyu magtiripnan ati sa puwirtahan banwa.

¹⁹ Ilinbung ngani ni Abraham si Sara sa lukib ati sa tanman Makpila, sakup daga Kanaan. Ti Makpila arani sa Mamri pag-ingarnan diman Hibrun.

²⁰ Nakan ti tanman hanggan ti lukib, ti daan magkaapu manga Hitiyu, naapu yi ni Abraham, ag binwat niya inda lulubngan.