Gimpuunan 21 - Hanunuu

Ti Kapanganakan ni Isaak

¹ Balaw nalimtan Panginuun si Sara angay sa kay taratu.

² Namuduy si Sara ag nanganak lalaki una gurangun yi si Abraham. Ainanak ti lapsag sa sinabi gid Diyus kaybi pag udas.

³ Iningarnan ni Abraham ti lapsag Isaak.

⁴ Igu walu yi ka sirang ti lapsag, tinuri siya ni Abraham angay sa sugu Diyus sa kanya.

⁵ Si Abraham 100 yi ka timpu pagka ainanak si Isaak.

⁶ Magkun si Sara, “Pinasari aku Diyus sa kabayaan, ag una si unu ti makadnug tungkul sa nangyari sa kangku pihu masari diman.

⁷ Si unu ti makaisip makasabi sa kan Abraham kuntay makapasusu waya aku lapsag? Dapat nanganak waya aku una gurangun yi siya.”

⁸ Dinmaka si Isaak, ag pagka sa sirang niwalay yi siya sa kay magsusu sa kay ina, nanhiwat si Abraham usa ka daka pag karan-an.

Pinalayas si Hagar ag si Ismail

⁹ Sa usa ka sirang, nakitan ni Sara pagsurugun ni Ismail si Isaak. (Si Ismail kay anak ni Abraham sa kan Hagar, usa ka Ihipsiyu.)

¹⁰ Nakan magkun si Sara sa kan Abraham, “Palayasa tunda pag babayi suruguun hanggan kay anak, dahil tunda pag anak suruguun balaw mahimu hurayan maranahun niku anak, si Isaak.”

¹¹ Nanruku gid si Abraham dahil anak diman niya si Ismail.

¹² Dapat magkun ti Diyus sa kanya, “Balaw nimu kailangan ikaruku ti tungkul sa kan Ismail hanggan sa kan Hagar. Sunda nimu ti sinabi ni Sara, dahil ginan sa kan Isaak pag umumpisa ti manga itinaratu niku pag manga linahi.

¹³ Ag ti tungkul waydi sa kan Ismail, manyamu diman kay linahi ag usa diman sida ka nasyun, dahil anak diman nimu siya.”

¹⁴ Kinaaldawan, surip waya gid nagbuul si Abraham karan-unun hanggan danum masukadan sa paknul, bag-u ipinapas-an inda sa kan Hagar. Pagkatapus, pinaighit yi ngani niya si Hagar kaibahan kay anak. Nagbaklay sida sa pangawakawaan Biirsiba balaw alam nu naan tag sida.

¹⁵ Pagka natabu yi kanda danum, tinayakan niya kay anak sa sirung usa ka puun kayu diit

¹⁶ ag linmakaw siya manga 100 mitrus kay kaarayu ginan sa kay anak. Ati siya pag tinmukaw ag nanlumi magkun sa kay sadili, “Balaw niku mabata bantayan ti kamatayan niku anak.”

¹⁷ Taynguna, nasaydan Diyus ti maglumi anak. Nakan magkun ti anghil Diyus ginan sa tungud atabug sa kan Hagar, “Hintay ti magpaaburidu sa kanmu naisipan Hagar? Danga kawu magkadala; nasaydan Diyus ti maglumi nimu anak.

¹⁸ Pagtindug kawu ag banguna ti anak, dahil buwatun Diyus daka pag nasyun kay manga linahi.”

¹⁹ Bag-u may ipinakakit ti Diyus sa kanya usa ka bubun. Inmati siya ag pinaulian danum kay sukadan ag pinainman niya kay anak.

^20-21 Balaw pinabay-anan Diyus si Ismail tugka sa dinmaka. Ati siya pag nangulian sa pangawakawaan Paran ag usa siya ka manugpana. Sa kadugayun, ipinaasawa siya niya ina sa usa ka Ihipsiyu.

Ti Kasunduan ni Abraham ag ni Abimilik

²² Ati katpung pag panahun, inmati si Abimilik sa kan Abraham kaibahan kay takinan manga sundalu si Pikul. Magkun si Abimilik sa kan Abraham, “Pag-awatan ungud kawu Diyus sa tanan nimu pagbuwatun.

²³ Nakan pagtaratu kawu sa kangku sitay sa ngaran Diyus kuntay balaw nimu aku dayaun hanggan kang manga linahi. Pakakitan kanmu kaayadan sa kangku hanggan sa inda pag rugar kanmu pag-ulian taynguna bilang day-uhan, ga kang diman ipinakakit pag kaayadan sa kanmu.”

²⁴ Sinmagut si Abraham, “Magsumpa aku.”

²⁵ Dapat nagriklamu si Abraham sa kan Abimilik tungkul sa bubun inagaw manga suruguun niya.

²⁶ Magkun si Abimilik, “Unman niku alam nu si unu ti nagbuwat tunda. Unman kawu may sinabi sa kangku, ag taynguna lang niku inda pag naalaman.”

²⁷ Nakan nagbuul si Abraham manga karanidu hanggan manga baka ag ipinakaun niya sa kan Abimilik, bag-u nagbuwat kasunduan sida duwa.

²⁸ Nagbuul waya gid si Abraham pitu ka babayi karanidu ag kay ipinasaman inda.

²⁹ Nagpaingana si Abimilik, “Sa unu tunda pag pitu ka babayi karanidu kanmu ipinasaman?”

³⁰ Sinmagut si Abraham, “Tanggapa inda pag pitu ka babayi karanidu bilang puruyba kuntay aku ti nagkali tunda pag bubun.”

³¹ Dahil sa kanda sumpaan, tunda pag rugar iningarnan Biirsiba.

³² Pagka natapus kanda kasunduan ati sa may Biirsiba, binmalik si Abimilik ag si Pikul sa daga manga Pilistiyu.

³³ Nantanum si Abraham usa ka puun kayu tamarisku ati sa may Biirsiba ag sinamba niya ati ti Panginuun, ti Diyus hanggan aban.

³⁴ Nangulian si Abraham sa daga manga Pilistiyu sa malawig pag panahun.