Gimpuunan 20 - Hanunuu

Si Abraham ag si Abimilik

¹ Nighit sida ni Abraham ginan sa Mamri ag nag-ati sa Nigib. Ati sida pag nangulian sa karaw-an Kadis ag Sur. Ud nagdugay, napahalin maan sida atag sa Girar.

² Habang ati sida, ti pakilala ni Abraham ati sa kan Sara sa manga tawu kay patar-ari inda. Nakan ipinab-ul si Sara ni Abimilik, ti hari sa Girar.

³ Usa ka yabi, napakakit ti Diyus sa kan Abimilik sa panab-anan usa ka tagin-up. Magkun siya, “Mamatay kawu dahil bin-ul nimu tunda pag babayi may asawa yi.”

⁴ Dapat dahil balaw waya naulid ni Abimilik si Sara, magkun siya, “Panginuun, hayga duy nimu aku matyun? Unman duy aku may kasalanan.

⁵ Magkun ngani si Abraham kay patar-ari si Sara ag magkun si Sara kay patar-ari si Abraham. Unman niku alam duy ag unman aku may gayak daut sa pagpab-ul sa kan Sara.”

⁶ Magkun waya sa kanya ti Diyus sa tagin-up, “Hu, alam niku unman kawu may gayak daut, nakan balaw niku ipinahintulut garawun nimu siya hampay balaw kawu magkasala sa kangku.

⁷ Dapat kailangan nimu siya iuli sa kay asawa. Ag idarangin niya kawu hampay balaw kawu mamatay, dahil ti asawa niya usa ka purupita. Dapat nu unman nimu siya niuli, inda kang pagsabihun sa kanmu mamatay kawu hanggan ti tanan nimu tawuhan.”

⁸ Kinaaldawan, maaga waya ipinatawag ni Abimilik ti tanan niya pinunu ag sinabi sa kanda ti tungkul sa kay tagin-up. Ag nadala gid sida.

⁹ Bag-u ipinatawag ni Abimilik si Abraham ag pinaingana, “Hintay inda kanmu binwat sa kanmi? Hintay kang kasalanan sa kanmu? Hayga dinarahan nimu kadamhakan kang buu kaharian? Balaw mayad kanmu binwat.

¹⁰ Hayga inda binwat nimu?”

¹¹ Nagsagut si Abraham, “Kang isip duy unman gid una di usa atay ti maggalang sa Diyus, nakan nag-isip aku barang matyun niyu aku hampay mab-ul niyu kang asawa.

¹² Tutuu duy magtar-ari kami, dapat sa ama lang balaw sa ina; ag naasawa duy niku siya.

¹³ Pagka sinabihan aku Diyus pag-ighit ginan sa kang ama, sinabihan niku si Sara ipakilala niya aku kay patar-ari una naan tabug kami pag umatag. Sa panab-anan inda, maipakakit niya kay pagmahal sa kangku.”

¹⁴ Inuli ni Abimilik si Sara sa kan Abraham, ag pinakan-an waya niya si Abraham manga karanidu, baka, hanggan manga suruguun babayi ag lalaki.

¹⁵ Bag-u magkun siya sa kan Abraham, “Pasnu aku mangulian kamu sa kang daga. Pag-uli kamu una naan kanyu gustu.”

¹⁶ Magkun diman siya sa kan Sara, “Pakan-an niku kanmu patar-ari 1,000 bilug pilak bilang puruyba sa tanan niyu kaibahan kuntay balaw aku nakalabut sa kanmu ag hampay balaw sida mag-isip nakabwat kawu daut.”

^17-18 Dahil sa pagbuul hari sa kan Sara, ipinahintulut Panginuun balaw magkaanak ti tanan babayi sa magtal-anakan ni Abimilik. Nakan nandarangin si Abraham sa Diyus, ag pinaayad Diyus kay asawa ni Abimilik hanggan kay manga suruguun babayi hampay magkaanak uman sida. Pinaayad diman Diyus si Abimilik sa kay karamdaman.