Gimpuunan 18 - Hanunuu

Ti Tulu ka Manugsabang ni Abraham

¹ Napakakit ti Panginuun sa kan Abraham katpung mag-uli di waya siya sa may arani daka manga puun kayu ni Mamri. Mainit tunda katpung, ag si Abraham matukawan sa may sabian niya turda.

² Habang magbantay siya, may nakitan siya tulu ka lalaki matindugan balaw arayu. Susun siya tinmindug ag daldali sinulang sida. Yinmuk-ub siya sa kanda bilang paggalang

³ ag magkun, “Panginuun, nu kanyu gustu duy, paghapit waya kamu atay sa kanmi.

⁴ Manpabuul duy aku danum para makaugas kamu kanyu lulud ag makapahari sa inda pag sirung puun kayu.

⁵ Manbuul diman aku karan-unun para sa kanyu hampay may kusug kamu sa kanyu maglakaw. Pag-ikabaya duy niku ti pagsirbi sa kanyu habang atay kamu sa kanmi.” Ag nagsagut sida, “Hu sigi, buwata nu hintay kanmu sinabi.”

⁶ Madaldali sinmulud si Abraham sa turda ag magkun sa kan Sara, “Pagbuul kawu manga tunga saku marinu pag kalasi arina ag pagtama kawu tinapay. Bag-u paggatung kawu ka liksi.”

⁷ Susun nalagiw si Abraham atabug sa manga bakahan niya ag pinmili kay matabul pag ibun baka, bag-u kay ipinaiyaw inda ag rargu ipinatama sa suruguun niya kalay-awan.

⁸ Pagkatapus, dinara niya inda sa kay manga bisita, ag nandara diman siya gatas ag manga buwat ginan sa gatas. Ag habang magkaun sida sa sirung puun kayu, siyun diman hanggan si Abraham magsirbi sa kanda.

⁹ Taynguna, nagpaingana ti manga bisita sa kan Abraham, “Naan kanmu asawa si Sara?” Sinmagut siya, “Ati duy sa sulud turda.”

¹⁰ Ti usa ka bisita nagkumun, “Pihu gid bumalik aku sitaay sa sunud pag timpu sa ga kainda diman pag udas, ag kanmu asawa si Sara may anak yi lalaki.” Magpatingi maaw si Sara sa may sabian turda sa may magkaday-an lang ni Abraham.

¹¹ (Gurangun yi sida duwa ni Abraham ag unman yi pagras-ugan si Sara.)

¹² Nasari si Sara ag magkun sa kay sadili, “Gurangun yi aku; bag-u di aw aku makabaya man-ulid sa kang asawa gurangun yi waydi, hampay magkaimaw anak kami?”

¹³ Susun nagpaingana ti Panginuun sa kan Abraham, “Hayga nasari si Sara ag magkumun, ‘Manganak aw waya aku gurangun yi?’

¹⁴ May bagay aw lugud balaw mabuwat Panginuun? Parihu sa kang sinabi, bumalik aku sitaay sa sunud pag timpu sa ga kainda diman pag udas, ag si Sara may imaw yi anak lalaki.”

¹⁵ Nadala si Sara, nakan nagpudil siya. Magkun siya, “Unman duy aku nasari!” Dapat magkun ti Panginuun, “Nasari gid kawu.”

Naghagad Awat si Abraham para sa Banwa Suduma

¹⁶ Siyun ginan, nighit ti tulu ka lalaki. Ipinatugka waya ni Abraham sida tugka sa rugar nu naan magkaalantaw nida ti banwa Suduma.

¹⁷ Magkun ti Panginuun, “Balaw niku ipaulam sa kan Abraham kang buwatun.

¹⁸ Pihu gid dumaka ag bumaliw makapangyarihan pag nasyun kay manga linahi aban. Ag sa panab-anan niya, papaladan niku ti tanan nasyun sa kalibutan.

¹⁹ Pinili niku siya hampay ipatupad niya sa kay manga anak hanggan sa kay manga linahi kang manga palakaw, hampay bumuwat sida hustu ag matadlung. Sa panab-anan inda, matupad kang itinaratu sa kanya.”

²⁰ Pagkatapus, magkun ti Panginuun sa kan Abraham, “Mayamu yi ti magriklamu laban sa Suduma ag Gumura, dahil masyadu yi ti kadautan sa tunda pag manga rugar.

²¹ Nakan umati aku hampay maalaman niku nu tutuu ngatay unman inda pag manga riklamu.”

²² Ginminan yi ngani ti duwa ka lalaki atabug sa Suduma, dapat napatayak di ti Panginuun hanggan si Abraham.

²³ Nagpakarani si Abraham sa Panginuun ag nagpaingana, “Rurisun aw duy niyu ti manga matadlung kaibahan manga makasalanan?

²⁴ Nu nguna may imaw 50 ka matadlung sa tunda pag banwa, rurisun di gid aw nimu tunda pag buu banwa? Balaw aw niyu kaawaan ti banwa para sa 50 ka tawu matadlung?

²⁵ Bilang ga unman nimu mahimu mabwat tunda rurisun ti manga matadlung kaibahan manga makasalanan. Balaw mahimu parihu kanmu magpakiusa sa kanda. Kawu ti magsintinsiya sa buu kalibutan, kabay mana buwatun nimu nu hintay ti mayad?”

²⁶ Nagsagut ti Panginuun, “Nu may makitan aku 50 ka matadlung sa Suduma, balaw niku rurisun ti buu banwa dahil sa kanda.”

²⁷ Nagpaingana gid maan si Abraham, “Panginuun, patawada duy nimu aku nu maghampang gid sa kanmu. Tawu lang aku, ga galbuk lang, ag unman aku may karampatan sabihun inda sa kanmu.

²⁸ Dapat nu may imaw nguna 45 ka matadlung, rurisun di gid aw nimu ti buu banwa dahil kurang inda lima?” Nagsagut ti Panginuun, “Nu may makitan aku 45 ka matadlung, balaw niku rurisun ti banwa.”

²⁹ Nagpaingana maan si Abraham, “Nu 40 lang duy nguna ti matadlung?” Nagsagut ti Panginuun, “Balaw niku rurisun ti banwa dahil sa 40 ka matadlung.”

³⁰ Nagkumun maan si Abraham, “Danga gid duy mana kawu magkagalit sa kangku, Panginuun, dahil may paingana waya aku. Hintay nguna nu 30 lang ka tawu ti matadlung?” Nagsagut ti Panginuun, “Unman diman niku rurisun ti banwa nu may makitan aku 30 ka matadlung.”

³¹ Nagbagaw maan si Abraham, “Panginuun, patawada duy nimu aku magpakapaingana sa kanmu. Unu nguna duy nu 20 wadi ti matadlung?” Nagsagut ti Panginuun, “Unman diman niku rurisun ti banwa dahil sa 20 ka matadlung.”

³² Nagbagaw gid maan si Abraham, “Panginuun, danga duy mana kawu magkagalit; uryan yi inda pag paingana. Nangus, 10 wadi ti makitan nimu matadlung?” Nagsagut ti Panginuun, “Unman diman gid niku sida rurisun dahil sa 10 ka matadlung.”

³³ Igu natapus kanda harampangan, nighit ti Panginuun ag si Abraham nuli yi waydi sa kanda.