Gimpuunan 15 - Hanunuu

Ti Kasunduan Diyus ag ni Abram

¹ Pagkalawuy ati, nagbagaw ti Panginuun sa kan Abram sa panab-anan tagin-up. Magkun siya, “Abram, danga kawu magkadala dahil aku ti mag-alaga sa kanmu ag pakan-an niku kawu daka pag pirimyu.”

² Dapat magkun si Abram, “Panginuun Diyus, hintay kay pulus kanmu pirimyu sa kangku nu tugka taynguna unman aku may anak. Kang manugmana lang si Iliyisir taga Damasku.

³ Dahil unman niyu aku pinakan-an anak, ti usa sa manga suruguun niku magtal-anakan ti manmana manga kasiyunan niku.”

⁴ Magkun sa kanya ti Panginuun, “Balaw si Iliyisir ti manmana kanmu manga kasiyunan nu unman kanmu sadili di pag anak.”

⁵ Bag-u dinara siya Panginuun sa luwas ag magkun, “Bantayi nimu ti manga pamgasan sa langit; bilanga nu kaya nimu. Katunda diman kay kayamu kanmu linahi.”

⁶ Nagsarig sa Panginuun si Abram. Ag dahil sa kay pagsarig, ibinilang siya matadlung.

⁷ Magkun waya siya tag sa kan Abram, “Aku ti Panginuun, ti nagsugu sa kanmu kuntay pag-ighit ginan sa Ur sakup manga Kaldiyu hampay ipakaun sa kanmu inda pag daga kanmu maapu.”

⁸ Dapat magkun si Abram, “Panginuun Diyus, kabitay niku maalaman kuntay maapu niku inda?”

⁹ Sinmagut ti Panginuun, “Darahi aku sitaay usa ka dumaraga baka, usa ka babayi kambing, ag usa ka lalaki karanidu, ti kada usa may idad tulu ka timpu. Bag-u pagdara diman kawu usa ka kurkuru ag kalampati.”

¹⁰ Nakan dinara ngani inda tanan ni Abram sa Panginuun. Bag-u linapa niya ti kada usa ag ipinabugtang, magturupadan ti kada linapa. Ti kurkuru lang ag ti kalampati ti balaw niya linapa.

¹¹ Inmapun sa linapa manga hayup ti manga manuk magkaun namatay, dapat binugaw inda ni Abram.

¹² Pagka mag-isalup yi ti init, naturugan hamuuk si Abram ag dinurnan gid siya dala.

¹³ Bag-u magkun sa kanya ti Panginuun, “Kanmu manga linahi pihu gid bumaliw day-uhan sa iba ka nasyun. Bumaliw suruguun sida ati ag payhin-payhinun sa sulud upat ka gatus ka timpu.

¹⁴ Dapat parusahan niku ti sirbihan nida pag nasyun. Bag-u mighit sida sa tunda ginan pag nasyun dara ti mayamu pag kayamanan.

¹⁵ Kawu waydi Abram, palawigun niku kanmu buhi ag mamatay kawu gurangun yi gid ag may kahusayan.

¹⁶ Lumawuy dap ti upat ka sinulput bag-u di makabalik sitay kanmu manga linahi, dahil udwaya kang-ud ti kasalanan manga Amuriyu para parusahan sida ag palayasun sa inda pag daga.”

¹⁷ Pagka nisalup yi ti init ag madlum yi, rargu may nakitan si Abram anglit mag-anus ag may sulu maglakaw sa karaw-an manga linapa hayup.

¹⁸ Sa tunda diman pag sirang, nagbuwat kasunduan ti Panginuun sa kan Abram. Magkun siya, “Ipakaun niku sa kanmu manga linahi inda pag daga ginan sa may sapa katugkaan Ihiptu tugka sa may daka sapa Iyupratis.

¹⁹ Inda pag daga ti pag-ulian taynguna manga Kiniyu, Kinisiyu, Kadmuniyu,

²⁰ Hitiyu, Pirisiyu, Ripaimiyu,

²¹ Amuriyu, Kananiyu, Girgisiyu, ag manga Hibusiyu.”