Gimpuunan 13 - Hanunuu

Namululagan Sida ni Abram ni Lut

¹ Ginan sa Ihiptu, nag-ati si Abram sa Nigib kaibahan kay asawa dara ti tanan kasiyunan niya, ag kinmuyug diman sa kanda si Lut.

² Mayaman yi gid masyadu si Abram; mayamu yi kay manga hayup, manga pilak hanggan gintu.

³ Ginan sa Nigib, pahalin-halin sida tugka sa nakabalik sida sa rugar nida daan nagpatindugan turda. Inda pag rugar ati sa may tab-anan Bitil ag Hay.

⁴ Siyun diman sida un-an nagpatindug harandugan katpung rinmas-ug sida sa Kanaan. Ati nagsamba maan si Abram sa Panginuun.

⁵ Si Lut ti pirmi makuyugan sa kan Abram una naan tag may imaw di waydi sadili manga hayup hanggan manga turda.

⁶ Ag dahil mayamu yi kanda manga hayup hanggan iba waya manga kasiyunan, balaw yi sida mahimu mangulian sa usa-usa ka rugar. Ti pasturan balaw yi kang-ud para sa kanda.

⁷ Dahil siyun, mag-arawayan yi ti manga manug-alaga nida manga hayup. (Ati katpung, ti manga Kananiyu hanggan ti manga Pirisiyu mag-ulian waya sa tunda pag daga.)

⁸ Nakan magkun si Abram sa kan Lut, “Kita hanggan kanta manga tawuhan balaw mahimu mag-arawayan, dahil magkatawuhan kita.

⁹ Ti mayad, manbululagan yi lang kita dahil mayamu waya pag rugar ti mahimu malipatan nita. Kawu ti pagpili nu naan pag parti daga kanmu gustu. Nu tag sa wala kawu, sa sikun aku; nu sa sikun kawu, sa wala waydi aku.”

¹⁰ Nan-alantaw si Lut sa sangput ag nakitan niya ti Karatagan Hurdan tugka sa Suar abunda sa danum, parihu sa halamanan Idin ag daga Ihiptu. (Nangyari inda katpung udwaya rinuris Panginuun ti Suduma ag Gumura.)

¹¹ Nakan pinili ni Lut ti buu Karatagan Hurdan sa butlakan. Sa katida pag paraan, namululagan ngani sida ni Abram.

¹² Si Abram napatayak sa Kanaan habang si Lut waydi ati sa manga banwa sa karatagan. Nagpatindug si Lut kay turda sa may arani Suduma.

¹³ Ti manga tawu sa Suduma daut gid ag makasalanan. Subra gid kanda kadautan laban sa Panginuun.

Napasalyu si Abram sa Hibrun

¹⁴ Pagka nakaginan yi si Lut, magkun ti Panginuun sa kan Abram, “Ginan sa kanmu pagtindugan, bantayi nimu kaayad ti palibut.

¹⁵ Ti tanan maalantaw nimu pag daga ipakaun niku sa kanmu hanggan sa manga linahi nimu, ag kanyu yi inda tugka aban.

¹⁶ Payamuun niku kanmu linahi ga taypuk sa kalibutan kay kayamu. Ti taypuk dayu mabilang, nakan kanmu linahi balaw diman mabilang.

¹⁷ Paglakaw kawu ag palibuta ti buu daga dahil ipakaun niku inda tanan sa kanmu.”

¹⁸ Nakan hinalin ni Abram kay turda, ag ati siya pag nangulian sa may arani daka puun kayu ni Mamri ati sa Hibrun, bag-u nagbuwat siya ati harandugan para sa Panginuun.