Gimpuunan 11 - Hanunuu

Ti Paminaw-pinawan Mata pag Bantayaw Babil

¹ Kaybi usa-usa di ka pamagaw ti paggamitun tanan tawu sa buu kalibutan.

² Habang pasalyu-salyu ulian ti manga tawu atabug sa may butlakan, nakaras-ug sida sa maratag pag rugar Sinar, ag ati sida pag nangulian.

^3-4 Taynguna, magkun ti manga tawu, “Mamatindug kita usa ka banwa may paminaw-pinawan mata pag bantayaw aput sa langit, hampay bumaliw bantug kita ag balaw mangalat sa buu kalibutan.” Nakan nagbuwat ngani sida manga daga pinaganit, bag-u ipinainit nida inda mayad hampay gumanit gid. Daga pinaganit kanda ginamit sa halip batu. Bag-u alkitran kanda ginamit panpahuput.

⁵ Taynguna, nagdugsun ti Panginuun hampay bantayan ti pag-ipatindug manga tawu sa banwa hanggan sa paminaw-pinawan mata pag bantayaw.

⁶ Magkun ti Panginuun, “Inda pag manga tawu magkarausa ag may usa wata ka pamagaw. Ag inda kanda pagbuwatun umpisa di waya nida gayak buwatun. Ud dumugay buwatun nida kanda pagkaibgan buwatun.

⁷ Nakan abala, pakialman nita sida. Tuhay-tuhayun nita kanda manga pamagaw hampay unman sida magkaraintindihan.”

⁸ Nakan ikinalat sida Panginuun sa buu kalibutan dahil balaw yi sida magkaintindihan, ag inmapas kanda magpatindug sa banwa.

⁹ Inda pag banwa iningarnan Babil dahil ati ginan pag tinuhay-tuhay Panginuun ti pamagaw manga tawu, ag ati ginan pag ikinalat niya sida sa buu kalibutan.

Kay manga Linahi ni Sim

¹⁰ Inda ti tultulanun tungkul sa linahi ni Sim. Duwa ka timpu siyun ginan sa nagkagunaw, 100 timpu yi tunda katpung si Sim pagka ainanak kay anak lalaki si Arpaksad.

¹¹ Pagka nianak si Arpaksad, nabuhi waya si Sim 500 timpu ag nadugangan waya kay manga anak.

¹² Pagka 35 yi ka timpu si Arpaksad, ainanak kay anak lalaki, si Sila.

¹³ Pagka nianak si Sila, nabuhi waya si Arpaksad 403 ka timpu ag nadugangan waya kay manga anak.

¹⁴ Pagka 30 yi ka timpu si Sila, ainanak kay anak lalaki, si Ibir.

¹⁵ Pagka nianak si Ibir, nabuhi waya si Sila 403 ka timpu ag nadugangan waya kay manga anak.

¹⁶ Pagka 34 yi ka timpu si Ibir, ainanak kay anak lalaki, si Pilig.

¹⁷ Pagka nianak si Pilig, nabuhi waya si Ibir 430 ka timpu ag nadugangan waya kay manga anak.

¹⁸ Pagka 30 yi ka timpu si Pilig, ainanak kay anak lalaki, si Riyu.

¹⁹ Pagka nianak si Riyu, nabuhi waya si Pilig 209 ka timpu ag nadugangan waya kay manga anak.

²⁰ Pagka 32 yi ka timpu si Riyu, ainanak kay anak lalaki, si Sirug.

²¹ Pagka nianak si Sirug, nabuhi waya si Riyu 207 ka timpu ag nadugangan waya kay manga anak.

²² Pagka 30 yi ka timpu si Sirug, ainanak kay anak lalaki, si Nahur.

²³ Pagka nianak si Nahur, nabuhi waya si Sirug 200 timpu ag nadugangan waya kay manga anak.

²⁴ Pagka 29 yi ka timpu si Nahur, ainanak kay anak lalaki, si Tira.

²⁵ Pagka nianak si Tira, nabuhi waya si Nahur 119 ka timpu ag nadugangan waya kay manga anak.

²⁶ Pagka 70 yi ka timpu si Tira, ainanak kay manga anak lalaki sida ni Abram, ni Nahur ag ni Haran.

Kay manga Linahi ni Tira

²⁷ Inda ti tultulanun tungkul sa linahi ni Tira. Si Tira kay ama ni Abram, ni Nahur ag ni Haran. Si Haran kay ama ni Lut.

²⁸ Namatay si Haran ati sa Ur sakup manga Kaldiyu, sa rugar nu naan siya pag nianak. Namatay siya habang buhi waya kay ama si Tira.

²⁹ Inasawa ni Abram si Saray, ag inasawa ni Nahur si Milka. Si Haran kay ama ni Milka hanggan niya patar-ari, si Iska.

³⁰ Si Saray unman may anak dahil baug.

³¹ Nighit si Tira sa Ur sakup manga Kaldiyu. Kaibahan niya kay anak si Abram, kay umagad si Saray, ag kay umput si Lut imaw kay anak ni Haran. Atabug mana sida sa Kanaan, dapat pagras-ug nida sa Haran siyun yi lang ngap sida pag nangulian.

³² Ati pag namatay si Tira sa idad 205 ka timpu.