Galasya 6 - Hanunuu

Pag-arawatan sa Usa kag sa Usa sa Pagdara Mabuyat

¹ Manga patar-ari, nu may naabutan kamu tawu magbuwat kasalanan, kailangan sa kanyu tunda ti manga tuludluan Ispiritu ti pagtadlung sa kanya, dapat pagmaalumanay kamu ti kada usa. Pagpasunaid sa kanyu sadili bilug barang kamu matuksu waydi.

² Pag-arawatan kamu nu may mabuyat pag dararan-un. Nu katunda kanyu buwatun, matupad niyu ti sugu ni Kiristu.

³ Nu may magpainu-inu sa kay sadili kuntay siya mahalaga dapat unman diman waydi, dinaya ngap niya kay sadili.

⁴ Pag-usisa ti kada usa sa kay sadili buwat. Nu mayad kay buwat, pagbaya siya danga yi ipaparihu sa buwat manga iba.

⁵ Dahil kailangan gid masigdara ti kada usa kay dararan-un.

⁶ Ti manugtudlu Bagaw Diyus kailangan ayawan niya tuludluan una lang hintay pag kaayadan kanda nakitan.

⁷ Dagsalan gid ungud kamu sa kanyu pag-iisip. Ti Diyus dayu gid mahimu hakutun tawu. Nu hintay ti ipamgas tawu, imaw diman kay anihun.

⁸ Nu ti tawu kay naisipan, ga sa magpamgas, sa manga bagay angay lang sa sadili daut kagustuhan, kamatayan ti maani. Nu ti tawu kay naisipan, ga sa magpamgas, sa manga bagay angay sa Ispiritu, tutuu pag buhi unman may katapusan kay maani.

⁹ Nakan ngani danga kita magsuku sa magbuwat mayad. Nu sa kay yi kaudasan aban, kita makaani nu unman kita magsuku.

¹⁰ Nakan ngani danga nita ipalawuy nu may rugar hampay magbuwat mayad sa kanta kaparihu, lalu gid sa manga kaparihu nita magsarig sa kan Kiristu.

Pangatapusan pag manga Paanyu

¹¹ Makitan niyu daraka gid pag ritra kang nagsurat. Aku diman ti may surat inda.

¹² Tunda pag manga tawu ti magpilit sa kanyu hampay magpaturi, magkaibug lang sida magpakakit-kakit sa manga iba. Pagbuwatun nida tunda, hampay sida balaw pag-unuunuhun ga mangyari nu abi pag-itudlu nida ti kahulugan kamatayan ni Kiristu sa kurus.

¹³ Una ti manga nagpaturi unman diman waydi magtupad sa Kasuguan. Kanda lang gustu sida ti dayawun manga iba nu kamu magpaturi waydi, nakan kamu kanda gid pagpilitun.

¹⁴ Nu bay aku, kay kamatayan lang nita Panginuun Hisu-Kiristu sa kurus ti kang pag-ipakatultul. Dahil ginan sa kamatayan ni Kiristu ti ugali kalibutan bilang ga namatay yi nu sa kangku, ag aku ga namatay yi nu sa ugali kalibutan.

¹⁵ Balaw mahalaga una tinuri una unman tinuri ti usa ka tawu. Ti mahalaga lang nu siya bag-u linalang.

¹⁶ Ti tanan manga mag-ugali angay sa inda pag manga isinurat niku, hanggan ti tanan nasyun Diyus, kang pag-idarangin hampay sa kanda yi kay kahusayan hanggan kay awa Diyus.

¹⁷ Bag-u inda wadi kang pagsabihun, una si unu danga yi dugangan niya kang aragwantahun. Hustu yi kang manga latu hampay makilala aku kay panawuhun ni Hisus.

¹⁸ Manga patar-ari, pagsa kanyu ti papalad nita Panginuun Hisu-Kiristu. Amin.