Galasya 5 - Hanunuu

Danga yi Magpasnu Buwatun maan Panawuhun

¹ Linukat kita ni Kiristu hampay kita balaw yi panawuhun Kasuguan. Pagpakarig-un ngani kamu danga yi kamu magpasnu buwatun maan panawuhun.

² Malu, aku ngani si Pablu ti magsabi sa kanyu, nu pumaturi kamu, unman mapakinabangan niyu si Kiristu.

³ Kas-a waya kang gid pagsabihun sa una hintay pag tawu ti magpaturi, kailangan tupada niya ti buu Kasuguan.

⁴ Nu kamu magkaibug pagkilalan-un Diyus kuntay kamu matadlung dahil sa kanyu magtupad sa Kasuguan, binmulag yi ngap kamu sa kan Kiristu, udyi matanggap niyu kay pakaun kaayadan Diyus.

⁵ Dapat ay dahil sa Ispiritu alam nimi pihu gid kami aban kilalan-un Diyus manga matadlung dahil sa kanmi pagsarig sa kan Kiristu.

⁶ Nu ti tawu magpakiusa sa kan Kiristu Hisus, unman mahalaga sa kanya una siya tinuri una unman tinuri. Ti mahalaga lang nu kita magsarig sa kan Kiristu ag nu kanta pagmahalun ti manga iba dahil sa kanta pagsarig sa kanya.

⁷ Amat-amat kamu nagrig-un yi sa kanyu pagsarig sa kan Kiristu. Si unu lugud ti nag-ampara sa kanyu magsunud sa katutuuhanan?

⁸ Balaw Diyus ti may buwat tunda sa kanyu, imaw yi ngap ti nagbutung sa kanyu.

⁹ May sanglitan magkun, “Una diit pag pamadaka sa tinapay magpahabuk sa pinkul arina.”

¹⁰ Kita magpakiusa sa Panginuun nakan nu para sa kangku pihu kamu napaminsan di kanyu pag-iisip sa kangku. Ag pihu gid parusahan Diyus una si unu tigpagulu sa kanyu.

¹¹ Manga patar-ari, nu abi ga kanda pagkumnun ungud pag-itudlu niku kuntay kailangan turiun ti tawu, hayga pag-unuunuhun diman aku taynguna tugka? Nu abi tutuu tunda kang pag-itudlu, udyi mana pagkadat-an manga tawu kang pag-itudlu tungkul sa kay kamatayan ni Kiristu sa kurus.

¹² Tunda pag manga magpan-gulu sa kanyu danga tugka lang sa pagpaturi, nu unman lus-ani yi lang nida kanda sadili bilug.

¹³ Manga patar-ari, pinili kamu hampay balaw panawuhun Kasuguan. Pagka kainda kamu balaw yi panawuhun, danga waydi pasibut-an yi lang niyu ti daut kagustuhan niyu naisipan. Kailangan ngap pasibut-an niyu kanyu pagmahal, hampay magsirirbihan kamu sa usa kag sa usa.

¹⁴ Dahil matupad ti kabuuhan Kasuguan nu tupadun lang inda pag usa ka bagaw magkun, “Mahala nimu kanmu kaparihu tawu parihu sa kanmu sadili.”

¹⁵ Dapat nu kamu ga hayup magkaragtan magsiribaan, barang mapapas kamu.

Tungkul sa Ispiritu Banal ag sa Daut Kagustuhan

¹⁶ Inda kang gustu sabihun, pag-ugali kamu angay sa udyuk Ispiritu, hampay dayi pasibut-an niyu ti daut kagustuhan niyu naisipan.

¹⁷ Dahil ti daut kagustuhan pagkatawu maglaban sa kagustuhan Ispiritu ag ti kagustuhan Ispiritu laban waydi sa daut kagustuhan pagkatawu. Maglalabanan sida duwa nakan unman niyu mabwat ti gustu niyu buwatun.

¹⁸ Nu kamu panguluhan Ispiritu, udyi kamu sa sirung kapangyarihan Kasuguan.

¹⁹ Magkaalaman yi waydi nita ti manga buwat tawu nu angay sa daut kagustuhan niya pagkatawu, ti magpanlalaki, ti magpamabayi, ti mayagting pag naisipan, ti kahalayan,

²⁰ ti magsamba sa diyus-diyusan, ti magpadaya, ti magkutub daut, ti magkagalit, ti mag-imun, ti magkaradat-an, ti maramuun, ti magkinanya-kanya yi isip, ti mag-arapinan,

²¹ ti maghirirakan, ti maglangu, ti magkadara sa kasayahan, hanggan ti iba waya buwat parihu sa kainda pag buwat. Pagsabihan niku kamu parihu diman sa kaybi, balaw gid makapasakup sa kay paghari Diyus ti tawu nu buwatun niya ti katunda pag manga bagay.

²² Dapat ay inda ngani ti burak Ispiritu, ti pagmahal, may kabayaan, may kahusayan, matiniisun, may matugway pag naisipan, mayad nabubut-un, matinupadun,

²³ maalumanay, mapinigilun sa kay sadili. Unman may pagsabihun ti Kasuguan laban sa kainda pag manga buwat.

²⁴ Nu ti tawu sakup ni Kiristu Hisus, ipinapaku yi niya sa kan Kiristu sa kurus kay sadili kagustuhan pagkatawu hanggan kay daut pag naisipan hanggan kay manga kahalay-halay pag manga hilig.

²⁵ Ti Ispiritu ti nagpakaun buhi sa kanta nakan ngani kailangan kita pasirung sa kapangyarihan Ispiritu.

²⁶ Danga kita palabi-labihun, maraaway, danga kita maghirirakan.