Galasya 4 - Hanunuu

¹ Inda kang gustu sabihun, nu anak waya ti manugmana parihu lang siya sa panawuhun, madi ngap siya ti may apu tanan-tanan.

² Dahil may magpamahala sa anak ag sa kay kasiyunan hanggan sa udwaya ipahintulut ama ti karampatan sa kay anak.

³ Katunda diman waydi kita. Pagka udwaya naintindihan nita ti katutuuhanan, sakup waya gid kita sa manga kapangyarihan maghari sa kalibutan.

⁴ Dapat ay pagka rinmas-ug ti taning pag kaudasan sinugu Diyus kay Anak. Ainanak siya usa ka babayi, kay buhi napasakup sa sirung Kasuguan,

⁵ hampay lukatun niya ti manga tawu ginan sa kapangyarihan Kasuguan ag hampay kita manga anak yi ngap Diyus.

⁶ Dahil kita manga anak yi Diyus nakan ipinakaun niya sa kanta ti Ispiritu niya Anak mangulian sa kanta tagipusuun imaw tig-ingaran sa kanya magkun, “Amang.”

⁷ Nakan ngani dahil sa kay binwat Diyus bukun yi kita panawuhun nu unman kay yi ngap manga anak. Nu kita kay manga anak, matanggap nita kay pamana kay ihinanda Diyus sa kay manga anak.

Kay Nabudlay ni Pablu dahil sa Iglisya sa Taga Galasya

⁸ Pagka kamu kaybi udwaya magkilala sa Diyus, kamu panawuhun manga diyus-diyusan.

⁹ Dapat taynguna kanyu yi nakilala ti Diyus, aw mayad man nu sabihun taynguna kamu nakilala yi Diyus. Hayga lugud kamu magbalik magsirbi maan sa manga kapangyarihan maghari sa kalibutan balaw may pulus ag unman waydi may kabuluhan. Hayga lugud kamu magkaibug maan magpasakup sa siyun pag manga kapangyarihan?

¹⁰ May turun-anun kamu manga sirang, manga bulan, manga panahun hanggan manga timpu!

¹¹ Magkaaburidu yi gid aku sa kanyu barang unman may kabuluhan kang nagbudlay dahil sa kanyu.

¹² Manga patar-ari, ungud yi gid inda kang pagsabihun sa kanyu, pagga kangku kamu dahil aku ga kanyu yi waydi. Unman kamu may binwat daut sa kangku una di.

¹³ Alam diman niyu nakan ati katpung sa kabag-u aku nanudlu Mayad pag Barita sa kanyu dahil nasakit aku.

¹⁴ Unman niyu aku inunu-unu, unman diman niyu dinayu dahil dipirinsya kang bilug, madi tunda ga usa ka daka pagsubuk sa kanyu. Lalu ngap kanyu tinanggap aku ga usa ka anghil Diyus, ga kan Kiristu Hisus diman kanyu nagbaya.

¹⁵ Nakabaya gid kamu ati katpung. Hintay lugud ti nangyari? Aku makapatutuu gid nu abi mahimu luwatun kanyu mata, linwat mana niyu hampay ipakaun sa kangku.

¹⁶ Taynguna bay aku kanyu aw nangus kalaban dahil sa kang magsabi sa katutuuhanan?

¹⁷ Masipag mana tunda pag manga tawu sa kanyu, dapat balaw gid sa kaayadan kay turunu. Kanda gustu lang kamu mapakarayu ginan sa kangku hampay sa kanda pag pumasakup.

¹⁸ Balaw daut nu unman mag-irang ti tawu kay budlay basta mayad kay turunu, mayad ngap tunda una aku unman asan sa kanyu.

¹⁹ Kamu duy lubus niku pagmayadun. Parihu aku ga usa ka babayi magpanganak, may pagdungugun aku mabuyat pag karukuan dahil sa kanyu hanggan sa udwaya makitan si Kiristu sa kanyu buhi.

²⁰ Gustu gid mana niku kamu maatubang hampay sabihun niku ti kang pagdungugun sa kang tagipusuun, dahil ungud gid magulu kang naisipan tungkul sa kanyu.

Ti Pahalimbawa tungkul sa Kanda ni Hagar ni Sara

²¹ Inda kang paingana sa kanyu, kamu magkaibug magpasakup sa Kasuguan, unman aw niyu pagpatingihan ti pagsabihun Kasuguan?

²² Isinurat kabay sa Banal Kasuratan magkun, “Si Abraham nagkaanak duwa ka anak lalaki. Kay usa sa kay panawuhun sa kan Hagar, kay usa sa kan Sara sa bukun panawuhun.”

²³ Ti anak sa panawuhun ainanak angay lang sa ugali tawu. Dapat ti anak sa balaw panawuhun ainanak angay sa kay taratu Diyus.

²⁴ Sa inda pag manga nangyari kaybi mag-akitan ti usa ka mahalaga pag katutuuhanan. Ti duwa ka babayi bilang ga halimbawa sa duwa ka taratu. Ti usa ka taratu, ti namhan ngani sa Bantud Sinai, ipinahalimbawa sa kan Hagar hanggan sa kay manga anak lunsay manga panawuhun.

²⁵ Si Hagar nipahalimbawa sa Bantud Sinai sa daga Arabya, larawan diman tungkul sa Hirusalim kainda panawuhun diman waydi hanggan ti tanan manga tawu sakup banwa Hirusalim.

²⁶ Dapat ti Hirusalim taga langit imaw ti bukun panawuhun, siya bilang ga kanta yi ina.

²⁷ Angay sa Kasuratan magkun, “Pagbaya kawu pag babayi una unman nagkaanak. Paghuyaw gid kawu sa kanmu kabayaan, kawu pag babayi balaw nakalakaw sakit sa mag-anak. Dahil ngani lalu gid aduk ti manga anak tunda pag babayi ti tinayakan niya asawa, balaw lang ga sa babayi may asawa.”

²⁸ Manga patar-ari, kamu manga anak Diyus angay sa kay taratu parihu ga kan Isaak, ainanak siya angay sa kay taratu Diyus sa kan Abraham.

²⁹ Kaybi si Isaak ti ipinanganak angay sa Ispiritu Diyus, inunu-unu ni Ismail, imaw ti ipinanganak angay lang sa kaugalian tawu. Katunda diman waydi ti mangyari una taynguna.

³⁰ Dapat hintay ti isinurat sa Banal Kasuratan? Kay sabi magkun, “Tulaka nimu ti panawuhun pag babayi hanggan kay anak, dahil ti anak panawuhun balaw kailangan hurayan pamana. Ti umapu pamana tunda lang pag anak sa balaw panawuhun pag babayi.”

³¹ Nakan ngani, manga patar-ari, kita bukun anak panawuhun nu unman ngap anak balaw panawuhun.