Galasya 3 - Hanunuu

Tungkul sa Kasuguan ag tungkul sa Pagsarig

¹ Hayga nguna kamu pag manga taga Galasya, patalang-talang? Si unu lugud ti nagpaumang sa kanyu? Marayaw yi apinaliwanag niku sa kanyu tungkul sa kamatayan ni Kiristu sa kurus.

² Inda lang ti gustu niku maalaman sa kanyu, tinanggap aw niyu ti Ispiritu Diyus dahil sa kanyu pagtupad sa Kasuguan aw ngatay dahil sa kanyu magpatingi hanggan magsunud sa Mayad pag Barita?

³ Talang-talang ungud kamu. Pagka nag-umpisa kamu sa bag-u buhi kaybi kanyu ugali angay sa Ispiritu. Bag-u taynguna pagka tabug sa katapusan angay lang aw sa sadili niyu kakayahan?

⁴ Udyi aw may pulus sa kanyu ti kanyu linakawan kaybi? Siguru balaw diman unman.

⁵ Hayga nguna ipinakaun Diyus sa kanyu ti Ispiritu? Hayga may binwat siya manga makadululaw pag tanda? Dahil aw lugud sa kanyu pagtupad sa Kasuguan aw ngatay dahil sa kanyu magpatingi hanggan magsunud sa Mayad pag Barita?

⁶ Parihu kabay sa isinurat tungkul sa kan Abraham magkun, “Nagsarig siya sa Diyus, nakan kinilala siya Diyus kuntay matadlung.”

⁷ Nakan magkaalaman yi niyu ti tutuu linahi ni Abraham imaw ti manga magsarig sa Diyus.

⁸ Udwaya nangyari daan ipinakilala Banal Kasuratan ti manga balaw Hudiyu kilalan-un waydi Diyus kuntay sida manga matadlung nu sumarig sida sa kanya. Kabag-u waya ipinakilala yi sa kan Abraham ti Mayad pag Barita magkun, “Ginan sa kanmu papaladan Diyus ti tanan nasyun tawu.”

⁹ Nagsarig sa Diyus si Abraham bag-u siya pinapaladan. Nakan ngani ti tanan tawu nu sumarig sa Diyus, papaladan diman parihu ga kanya.

¹⁰ Ti tanan manga magsarig sa kanda magtupad sa Kasuguan, nasakup sa saad. Dahil isinurat sa Banal Kasuratan magkun, “Saadan ti unman mag-alaala magtupad sa tanan isinurat sa ribru Kasuguan.”

¹¹ Nu katunda malinaw yi unman may tawu kilalan-un Diyus kuntay siya matadlung ginan sa Kasuguan. Dahil magkun ti Kasuratan, “Ti tawu nu pagkilalan-un Diyus kuntay siya matadlung dahil sa kay pagsarig tunda pag tawu ti may buhi.”

¹² Dapat ti Kasuguan saman sa pagsarig. Dahil magkun ti Banal Kasuratan, “Ti tawu nu magtupad sa kay bilin Kasuguan may buhi dahil lang sa kay magtupad.”

¹³ Pagka inaku ni Kiristu ti saad sa kanta, kita linukat yi niya ginan sa saad Kasuguan. Dahil isinurat sa Banal Kasuratan magkun, “Sinaadan ti kada tawu ibinitay sa puun kayu.”

¹⁴ Linukat kita ni Kiristu hampay ti manga papalad kay itinaratu Diyus sa kan Abraham tanggapun manga balaw Hudiyu ginan sa kan Kiristu Hisus. Nakan ngani nu sumarig kita sa kanya, tanggapun nita ti Ispiritu angay sa kay itinaratu Diyus.

Tungkul sa Kasuguan ag tungkul sa Taratu Diyus

¹⁵ Manga patar-ari, ti taratu imaw ti pirmi paggamitun halimbawa. Pagka napirmahan yi ti taratu dayi mahimu dautun una sitapu pag tawu tunda pag taratu. Dayu waydi mahimu bawasan una dugangan.

¹⁶ May taratu ngani ti Diyus sa kan Abraham hanggan sa kay linahi. Unman pagsabihun niya magkun, hanggan sa kay manga linahi. Nu abi katida kay pagkumnun kay ibug sabihun mayamu. Dapat kay sinabi Diyus magkun, “Sa kanmu linahi.” Kay kahulugan usa-usa lang ag inda imaw yi si Kiristu.

¹⁷ Inda kang gustu sabihun, tinalaghut dapu Diyus kay taratu sa kan Abraham. Pagka lawuy upat ka gatus may tatlumpulu ka timpu, ipinakaun Diyus ti Kasuguan. Dapat tunda pag taratu unman mabul-an halaga Kasuguan. Dayu waydi mauman ti manga taratu Diyus.

¹⁸ Nu abi ipamana Diyus kay itinaratu sa tawu nu siya magtupad sa Kasuguan, udyi tunda angay sa kay itinaratu Diyus. Dapat ay ipinakaun ngap Diyus kay itinaratu sa kan Abraham angay sa kay magtupad Diyus sa kay taratu.

¹⁹ Nu katida, hintay nguna kay pulus ti Kasuguan? Idinugang ti Kasuguan hampay ipakilala sa manga tawu kanda buwat kasalanan hanggan sa udwaya rumas-ug ti pinangakuan Diyus pag linahi ni Abraham. Ipinakaun ti Kasuguan ipinadakit manga anghil sa kan Muysis bag-u siya ti nagpadangat sa manga tawu.

²⁰ Dapat ay nu usa lang unman may kailangan siya manugpadangat ag ti Diyus usa lang ngani.

Tungkul sa manga Anak ag tungkul sa Panawuhun

²¹ Gustu aw sabihun inda ti Kasuguan laban sa kay itinaratu Diyus? Balaw duy katida. Kainda kay ibug sabihun, nu abi may ipinakaun sa manga tawu usa ka Kasuguan magpakaun buhi, ti tawu mahimu mana pagkilalan-un Diyus kuntay matadlung nu tupadun niya tunda pag Kasuguan.

²² Dapat magkun ti Kasuratan, “Ti usa ka kalibutan nasakup kapangyarihan kasalanan.” Nakan ipakaun Diyus sa manga magsarig sa kan Hisu-Kiristu kay itinaratu. Matanggap lang manga tawu kay itinaratu Diyus nu sida magsarig sa kan Hisu-Kiristu.

²³ Pagka udwaya udas nakahimu makasarig ti manga tawu sa kan Hisu-Kiristu, kita ga manga pirisu waya Kasuguan hanggan sa udwaya nipakilala ti pagsarig inda.

²⁴ Nakan ti Kasuguan imaw ti nagpatuhuyan sa kanta hanggan sa ud nagras-ug si Kiristu hampay kainda kita pagkilalan-un yi Diyus kuntay manga matadlung dahil sa kanta pagsarig sa kanya.

²⁵ Taynguna kita sinmarig yi sa kanya, nakan udyi kita pag-ipatuhuyan Kasuguan.

²⁶ Ginan sa kanyu magsarig sa kan Kiristu Hisus, nakan kamu tanan manga anak yi ngap Diyus kainda.

²⁷ Dahil kamu ti manga itinulbaw sa kan Kiristu, ga isinlung yi niyu kay buhi ni Kiristu.

²⁸ Udyi may tuhay-tuhay una Hudiyu, una Giriyigu, una panawuhun, una bukun panawuhun, una lalaki, una babayi. Kamu tanan urusa dahil sa kanyu pakiusa sa kan Kiristu Hisus.

²⁹ Nu kamu sa kan Kiristu, kabilang diman kamu sa kay linahi ni Abraham, manga magmana sa kay itinaratu Diyus.