Galasya 2 - Hanunuu

Nagsabang si Pablu sa Iba manga Apustul

¹ Pagka nakalawuy ti sampulu may upat ka timpu nag-atag maan aku sa Hirusalim kaibahan niku si Birnabi hanggan si Titu.

² Nakan aku nag-ati maan dahil ipinaalam ngani Panginuun sa kangku kailangan aku umatag. Napakihampang aku sa manga pinagkatakinan iglisya kami-kami lang, bag-u itinultul niku mayad-mayad sa kanda ti Mayad pag Barita kang pag-itudlu sa manga balaw Hudiyu. Nakan kang itinultul sa kanda dahil kang gustu danga maduraan kahulugan kang binudlayan ginan sa kabag-u hanggan taynguna tugka.

³ Dapat kuyug ngani hanggan si Titu. Madi siya Giriyigu, unman diman kanda pinilit siya turiun.

⁴ Bilang madi may manga tawu magpabalhinguun kuntay manga patar-ari, kanda mana gustu turiun si Titu. Magpalakay-lakay waydi sida hampay sulayun nu kabitay kita irinibri ni Kiristu Hisus ginan sa Kasuguan ni Muysis. Kanda gustu kami buwatun panawuhun sa inda pag Kasuguan.

⁵ Dapat ay kami unman napasakup sa kanda kagustuhan una di ngalay-ngalay, hampay madahanan nimi ti katutuuhanan Mayad pag Barita para sa kanyu.

⁶ Ti manga pagkilalan-un manga iba kuntay manga pinagkatakinan iglisya udyi waydi may paanyu sa kangku. Unman diman mahalaga sa kangku una si unu sida, dahil unman may pag-apihun ti Diyus.

⁷ Bagkus ngap kinilala nida aku kay pinili Diyus hampay iadal niku ti Mayad pag Barita sa manga balaw Hudiyu, parihu diman waydi sa kay nagpili sa kan Pidru hampay iadal niya ti Mayad pag Barita sa manga Hudiyu.

⁸ Diyus ti nagpakaun karampatan sa kan Pidru hampay mag-apustul sa manga Hudiyu, imaw diman ti nagpakaun karampatan sa kangku hampay mag-apustul sa manga balaw Hudiyu.

⁹ Ti manga pagkumnun pinagkatulduk iglisya, sida ni Santiyagu, ni Pidru, ni Huwan. Naintindihan waydi nida inda pag katungkulan ipinakaun Diyus sa kangku. Nakan kami ni Birnabi kanda tinanggap ga kanda diman, parihu kami manugtudlu. Kanmi pinagkasunduan kami sa manga balaw Hudiyu, sida bay sa manga Hudiyu.

¹⁰ Kanda lang bilin danga pagkalimti nimi ti manga pugri sa Hudiya. Ungud ngani daan di pag-isipun niku sida hampay awatan.

Tinamyaw ni Pablu si Pidru

¹¹ Pagka si Pidru nag-ati sa Antiyukya, tinamyaw niku siya sa atubangan manga patar-ari dahil ungud salan kay binwat.

¹² Dahil pagka udwaya rinmas-ug ti manga tawu kay ipinadara ni Santiyagu, nagsaru di si Pidru sa manga patar-ari balaw Hudiyu. Dapat pagka rinmas-ug yi ngani kay manga ipinadara ni Santiyagu, nagpakarayu yi siya nagpatuhay sa lamak dahil nadala siya sa manga magtudlu sa pagturi.

¹³ Naghuwad paman sa kanya ti manga iba patar-ari siyun manga Hudiyu hanggan si Birnabi natapil ngap sa kanda magpabalhinguun.

¹⁴ Pagka nakitan niku unman sida maglakaw sa katutuuhanan Mayad pag Barita, sinabi niku sa kan Pidru sa atubangan nida tanan magkun, “Nu kawu Hudiyu mag-ugali parihu sa balaw Hudiyu, ag bukun yi ga usa ka Hudiyu, kabitay pag mapilit nimu ti manga balaw Hudiyu mag-ugali parihu sa manga Hudiyu?”

Karibrihan dahil sa Pagsarig sa kan Hisus

¹⁵ Madi kami linahi Hudiyu ag balaw kunu makasalanan parihu sa manga balaw Hudiyu,

¹⁶ alam nimi pagkilalan-un Diyus ti tawu kuntay siya matadlung nu sumarig siya sa kan Hisu-Kiristu ag unman dahil sa kay magtupad sa Kasuguan. Hanggan kami manga Hudiyu magsarig sa kan Kiristu Hisus hampay pagkilalan-un Diyus kami matadlung, dahil sa kanmi pagsarig sa kan Kiristu ag unman dahil sa kanmi magtupad sa Kasuguan. Dahil dayu kilalan-un Diyus ti tawu kuntay matadlung nu ginan lang sa kay pagtupad sa Kasuguan.

¹⁷ Dapat nu kanmi pakiusa sa kan Kiristu pagkilalan-un manga makasalanan kami parihu sa balaw Hudiyu, kay aw ibug sabihun si Kiristu magpaturun sa kasalanan? Unman duy.

¹⁸ Nu pag-ipatindug maan niku kang dinaut, kay ibug sabihun, pagbalikan niku ti Kasuguan, pag-ipakilala niku kuntay aku makasalanan ngap.

¹⁹ Sa ungud, sa panab-anan ngap Kasuguan naalaman niku unman may kapangyarihan ti Kasuguan sa kangku. Nakan malaya yi aku mangabuhi para sa Diyus.

²⁰ Namatay aku kaibahan ni Kiristu sa kurus. Pagka kainda aku nabuhi, balaw yi kang sadili buhi, nu unman si Kiristu lang ti nabuhi sa kangku. Hanggan aku sitay di waya sa babaw daga, kang ugali buhi magsarig sa Anak Diyus, sa nagmayad sa kangku ag nagpakaun kay buhi sa kamatayan para sa kangku.

²¹ Balaw pagbul-an niku halaga kay pangaawa Diyus sa kangku. Nu abi pagkilalan-un Diyus ti tawu kuntay siya matadlung dahil sa kay magtupad sa Kasuguan, unman yi may pulus kay kamatayan ni Kiristu.