Galasya 1 - Hanunuu

¹ Inda ti may surat si Pablu, ti pinili hampay apustul. Bukun tawu ti nagpili, unman diman ginan sa tawu kagustuhan. Aku nag-apustul ginan ngap sa kagustuhan ni Hisu-Kiristu hanggan ginan sa Diyus Ama. Imaw diman ti nagbuhi uman sa kan Hisus.

² Pinagkausahan nimi tanan manga patar-ari kaibahan niku, pumadara aku surat tabug sa manga iglisya sa taga Galasya.

³ Pagsa kanyu ti papalad hanggan ti kahusayan ginan sa Diyus Ama hanggan ginan sa Panginuun Hisu-Kiristu.

⁴ Angay sa kagustuhan nita Diyus Ama ipinakaun ni Hisu-Kiristu kay buhi dahil sa kanta manga kasalanan hampay kay bawiun kita ginan sa inda pag kalibutan hinarian kadautan.

⁵ Dayawun ti Diyus hanggan waya aban. Amin.

Ti Tutuu gid Mayad pag Barita

⁶ Naglingut gid aku nu hayga madali lang tinalikdan niyu ti Diyus, ti nagbutung sa kanyu dahil sa kay pangaawa ni Hisu-Kiristu. Nagpatalad kamu sa tuhay maan pag mayad pag barita.

⁷ Nu sa ungud udyi may iba waya mayad pag barita. Nakan lang gid may manga maggulu sa kanyu. Kanda gustu umanun ti Mayad pag Barita tungkul sa kan Kiristu.

⁸ Dapat ay una kami una ti usa ka anghil ginan sa langit, nu tumudlu sa kanyu tuhay pag katutuuhanan bukun ga kanmi pag itinudlu Mayad pag Barita, saadan gid siya.

⁹ Sinabi yi nimi, kas-a waya sabihun niku sa kanyu, nu may tumudlu sa kanyu tuhay pag katutuuhanan, bukun ga kanyu tinanggap pag Mayad pag Barita, saadan siya.

¹⁰ Taynguna nangahulugan aw kang hingbut hampay dayawun tawu? Bukun ay duy. Kang hingbut ngap hampay dayawun aku Diyus. Nakan aw lugud aku masipag agud pagbayaun tawu? Nu tunda lang kang gustu, balaw mahimu aku suruguun ni Kiristu.

Kan Pablu Karampatan sa kay Pagka-Apustul

¹¹ Kang gustu maalaman niyu, manga patar-ari, balaw pinathaw lang tawu ti Mayad pag Barita kang itinudlu sa kanyu.

¹² Balaw nakan niku tinanggap ginan sa tawu, unman diman tawu ti nagtudlu sa kangku. Si Hisu-Kiristu yi ngapu ti nagpakilala inda sa kangku.

¹³ Naalaman yi waydi niyu kang manga ugali sa kang magsunud waya sa surundanun manga Hudiyu. Udyi may awa sa kang nangunu-unu sa iglisya Diyus. Kang gustu mana papasun gid sida.

¹⁴ Masyadu gid masipag aku sa kang surundanun ati katpung balaw lang ga kanda sipag tanan manga kaidad niku pag manga Hudiyu. Lubus matinupadun aku sa bilin itinayak niku manga ginurang.

¹⁵ Dapat dahil sa kay pangaawa Diyus nakan daan yi pinili niya aku bag-u iinanak. Kay tinawag niya aku hampay kay yi suruguun.

¹⁶ Angay sa kay ginayak, ipinakilala niya sa kangku kay Anak hampay ti Mayad pag Barita tungkul sa kanya kang itudlu sa manga balaw Hudiyu. Pagka naalaman niku kay kagustuhan Diyus, unman gid aku nagpaingana waya una sa kantapu pag tawu.

¹⁷ Unman diman waydi nag-ati aku sa Hirusalim hampay mihampang sa manga apustul sa manga un-an tinawag sa kangku. Bagkus ngap nag-atag aku sa Arabya, bag-u siyun ginan nag-atag maan aku sa Damasku.

¹⁸ Nakalawuy waya ti tulu ka timpu bag-u di aku nag-atag sa Hirusalim hampay mikabta sa kan Pidru. Nangagum aku sa kanya sa sulud sampulu may lima ka sirang.

¹⁹ Unman aku may nakitan iba apustul nu unman si Santiyagu lang kay patar-ari Panginuun.

²⁰ Tungkul sa inda pag bagay kang isinurat sa kanyu, alam di Diyus unman aku nagpudil.

²¹ Siyun ginan nag-atag aku sa manga rugar ati sa daga Sirya hanggan Silisya.

²² Ati katpung udwaya aku nakilala manga patar-ari sa kan Kiristu ati sa Hudiya.

²³ Nabaritaan lang nida tunda kaybi pag tawu mag-unuunu sa kanda, taynguna ngap magtudlu yi tungkul sa pagsarig sa kan Kiristu imaw kaybi kay gustu mana wayakun.

²⁴ Nakan ngani nagdayaw sida sa Diyus dahil sa kay binwat sa kangku.