Diyuturunumiyu 9 - Hanunuu

Ti Panalu sa Panab-anan Awat Diyus

¹ “Pagpatingi kamu, nasakupan Israil. Mandipay yi kamu taynguna sa Hurdan hampay sakupun ti manga nasyun mas daraka ag mas makapangyarihan waya sa kanyu. Daraka kanda manga banwa ag may ararabwat pag manga alad batu ga sunggu yi sa langit.

² Ti manga mag-uli ati marabisug ag ararabwat — pag lahi manga Anakita! Magkaalaman diman niyu ti tungkul sa lahi manga Anakita ag nasaydan niyu unman may makalaban sa kanda.

³ Dapat kainda makitan niyu ti Panginuun niyu Diyus ti gumiya sa kanyu pagdipay parihu sa apuy maghirut sa kanyu manga kalaban. Taluhun niya sida hampay madali niyu sida mapaighit ag maruris angay sa itinaratu Panginuun sa kanyu.

⁴ “Nu mapaighit yi sida Panginuun niyu Diyus, danga kamu magsabi sa kanyu sadili, ‘Dahil matadlung kita, nakan dinara kita sitay Panginuun hampay apuun inda pag daga.’ Balaw katida. Paighitun sida Panginuun dahil daut sida pag manga nasyun.

⁵ Apuun niyu kanda daga balaw dahil sa matadlung kamu ngatay mayad kamu pag manga tawu nu unman dahil daut sida, ag hampay matupad Panginuun kay itinaratu sa kanyu manga ginurang sa kanda ni Abraham, ni Isaak, ag ni Hakub.

⁶ Nakan alalahanun niyu, balaw dahil manga matadlung kamu nakan pag-ipakaun Panginuun niyu Diyus inda pag mayad daga kanyu apuun. Sa tutuu lang, manga maganit kanyu ulu.

⁷ “Isipa niyu nu kabitay niyu ginalit ti Panginuun niyu Diyus sa pangawakawaan. Ginan sa sirang nagluwas kamu sa Ihiptu tugka kainda, pirmi yi lang kamu maglaban sa Panginuun.

⁸ Una ati sa Bantud Sinai ginalit niyu ti Panginuun, nakan pagkaibgan yi lang niya kamu matyun.

⁹ Katpung nagtukad aku sa bantud hampay bul-un ti manga malapad pag batu, nu naan pag isinurat ti kasunduan Panginuun kay binuwat sa kanyu, nagpatayak aku ati sa sulud upatpulu ka sirang ag 40 waydi ka yabi unman may kaun-kaun ag inum-inum.

¹⁰ Ipinakaun Panginuun sa kangku ti duwa ka malapad pag batu. Siya gid ti nagsurat manga sugu kay sinabi sa kanyu ginan sa apuy ati sa Bantud Sinai habang magtiripnan kamu.

¹¹ “Pagkalawuy 40 ka sirang ag upatpulu ka yabi, ipinakaun Panginuun sa kangku ti duwa ka malapad pag batu nu naan pag masuratan ti kasunduan.

¹² Bag-u magkun ti Panginuun sa kangku, ‘Pagdugsun kawu dahil kanmu pag panguluhan pag nasakupan sa pagluwas sa Ihiptu nagbuwat kadautan. Madali sida magpatlikud sa manga surundanun kang pag-isugu sa kanda ag nagbuwat sida diyus-diyusan hampay kanda sambahun.’

¹³ “Bag-u magkun waya gid ti Panginuun sa kangku, ‘Nakitan niku nu kabitay ka ganit kay ulu inda pag manga tawu.

¹⁴ Pabay-ani nimu aku kang rurisun sida hampay balaw yi sida maalala waya. Bag-u buwatun niku kawu usa ka nasyun mas makapangyarihan ag mas mayamu waya kaysa kanda.’

¹⁵ “Nakan nagdugsun aku ginan sa maglabdaban pag bantud, dara ti duwa ka malapad pag batu nu naan pag masuratan ti kasunduan.

¹⁶ Ag nakitan niku kamu nagkasala sa Panginuun niyu Diyus. Nagbuwat kamu diyus-diyusan histuda anak baka. Madali kamu magpatlikud sa manga surundanun pag-isugu Panginuun sa kanyu.

¹⁷ Nakan sa kanyu atubangan, idinugsak niku ti duwa ka malapad pag batu bag-u nagkararunut inda.

¹⁸ “Bag-u napayuk-ub aku sa atubangan Panginuun sa sulud upatpulu ka sirang ag upatpulu ka yabi unman may kaun-kaun ag inum-inum, dahil sa tanan kasalanan niyu binuwat. Daut gid sa magbantay Panginuun kanyu binuwat, nagpagalit gid inda sa kanya.

¹⁹ Nadala aku sa masyadu pag pangagalit Panginuun laban sa kanyu, barang matyun niya kamu. Mayad lang pinatingihan di aku Panginuun.

²⁰ Ag masyadu diman ti pangagalit Panginuun sa kan Aarun ag pagkaibgan yi mana siya matyun, dapat sa tunda pag udas nandarangin maan aku para sa kanya.

²¹ Bin-ul niku ti binwat niyu pag baka, imaw ti dahilan niyu pagkakasala, ag tinunaw niku inda sa apuy. Rinunut niku inda parihu sa galbuk, bag-u ilinapug sa sapa magbulus ginan sa bantud.

²² “Ginalit diman niyu ti Panginuun ati sa Tabira, sa Masa ag sa Kibrut Hataaba.

²³ “Katpung ipinalakaw kamu Panginuun ginan sa Kadis Barnia, magkun siya sa kanyu, ‘Lakaw yi kamu ag apua yi niyu ti ipinakaun niku pag daga sa kanyu.’ Dapat naglaban kamu; balaw niyu sinunud ti sugu Panginuun niyu Diyus. Unman kamu nagsarig ngatay nagtupad sa kanya.

²⁴ Ginan sa nakilala niku kamu lunsay lang paglaban sa Panginuun ti kanyu pagbuwatun.

²⁵ “Nakan ngani napayuk-ub aku tunda katpung sa atubangan Panginuun sa sulud upatpulu ka sirang ag upatpulu ka yabi dahil magkun ti Panginuun rurisun niya kamu.

²⁶ Nandarangin aku sa Panginuun, ‘Panginuun Diyus, danga duy nimu pagrurisa kanmu magkaapu pag manga nasakupan. Irinibri duy nimu sida ag ipinaluwas sa Ihiptu sa panab-anan nimu masyadu pag kamaskihan.

²⁷ Danga yi duy pag-intindiha nimu ti kaganitan nida ulu, hanggan ti kadautan ag manga kasalanan nida, nu unman alalahanun nimu kanmu manga manugsirbi sida ni Abraham, ni Isaak, ag ni Hakub.

²⁸ Nu ipadamhak nimu sida, sumabi ti manga taga Ihiptu, “Rinuris sida Panginuun dahil unman niya kaya madara sida sa daga kay itinaratu sa kanda.” Ngatay sumabi sida, “Ipinadamhak sida Panginuun dahil nagalit siya sa kanda; ipinaluwas niya sida sa Ihiptu ag dinara sa pangawakawaan hampay matyun.”

²⁹ “ ‘Dapat kanmu sida pag nasakupan. Sida ti magkaapu nimu pag manga nasakupan, ti ipinaluwas nimu sa Ihiptu sa panab-anan nimu masyadu pag kamaskihan.’ ”