Diyuturunumiyu 8 - Hanunuu

Danga Niyu Pagkalimti ti Diyus

¹ “Sunda gid niyu ti tanan pag-ipakaun niku pag sugu sa kanyu kainda, hampay parargu kamu mabuhi dugay ag yumamu, ag makapangulian sa itinaratu Panginuun pag daga kay iayaw sa kanyu manga ginurang.

² Isipa niyu nu kabitay kamu inibahan Panginuun niyu Diyus sa kanyu maglakaw sa pangawakawaan sa sulud upatpulu ka timpu. Binwat niya inda hampay kamu pumakumbaba ag sinubukan kamu hampay maalaman nu hintay gid ti basad niyu tagipusuun, nu tupadun niyu kay manga sugu ngatay unman.

³ Ipinakumbaba niya kamu sa panab-anan pagpalun-us sa kanyu bag-u pinakan-an niya kamu mana — usa ka kalasi karan-unun unman waya gid niyu nasamitan una hanggan niyu manga ginurang. Binwat inda Panginuun hampay itudlu sa kanyu balaw lang sa karan-unun pag magkabuhi ti tawu, nu unman sa kada bagaw Panginuun.

⁴ Sa sulud 40 ka timpu unman nadaan kanyu manga rutay ag unman pinilgadan kanyu manga lulud sa kanyu magpanlakawun.

⁵ Kailangan isipun niyu nu kabitay ti ama magtamyaw sa kay anak, ti Panginuun niyu Diyus katunda diman magtamyaw sa kanyu.

⁶ “Nakan tupada niyu ti manga sugu Panginuun niyu Diyus. Paglakaw kamu angay sa kay kagustuhan ag galangun niyu siya.

⁷ Dahil darahun kamu Panginuun niyu Diyus sa mayad pag daga, may manga bululusan danum ag manga bulbugan magbulus sa manga ratag ag manga tagudtud.

⁸ Inda pag daga may manga tirigu, sibada, ubas, igus, pumigranata, ulibu ag daykut.

⁹ Balaw kamu maduraan karan-unun sa tunda pag daga. Balaw kamu pakurangan una sa hintay. Abunda sa manga baul ti manga batu hanggan manga galang ti manga bantud.

¹⁰ Nu nakakaun yi kamu ag nabsug, dayawa niyu ti Panginuun niyu Diyus dahil sa mayad pag daga kay ipinakaun sa kanyu.

¹¹ “Dahani gid niyu balaw malimtan ti Panginuun niyu Diyus ag danga niyu paglabaga kay manga sugu hanggan surundanun ti pag-ipakaun niku sa kanyu taynguna.

¹² Nu nakakaun yi kamu, nabsug, ag nakapatindug yi mayad pag manga balay,

¹³ ag nagyamu yi kanyu manga hayup, pilak, gintu hanggan manga kasiyunan,

¹⁴ pagdahan kamu balaw makapadayaw-dayaw ag makalimut sa Panginuun niyu Diyus, ti nagpalwas sa kanyu sa Ihiptu nu naan kamu pag binwat panawuhun.

¹⁵ Giniyahan niya kamu sa malapad ag madala pag pangawakawaan may manga ulay magdalit hanggan manga alutatip. Unman may danum sa tunda pag rugar dapat pinakan-an niya kamu danum ginan sa tanang batu.

¹⁶ Ati sa pangawakawaan, pinakan-an niya kamu mana — usa ka karan-unun balaw nasamitan niyu manga ginurang. Binwat inda Panginuun para kamu pumakumbaba ag para subukun kamu hampay sa uryan bumaliw mayad kanyu kahamtangan.

¹⁷ Barang sumabi kamu sa kanyu sadili, ‘Dahil sa kang sadili kapangyarihan ag kabisugan naapu niku inda tanan pag kasiyunan.’

¹⁸ Dapat alalahanun gid niyu ti Panginuun niyu Diyus imaw ti nagpakaun sa kanyu kakayahan yumaman kamu, ag binuwat niya inda hampay matupad niya ti kasunduan niya sa kanyu manga ginurang, parihu sa kay binwat taynguna.

¹⁹ “Dapat pagpaandaman niku kamu taynguna, nu kalimtan niyu ti Panginuun niyu Diyus ag mansunud kamu sa iba pag manga diyus, hanggan mansamba ag sumirbi sa kanda, pihu gid maruris kamu.

²⁰ Parihu sa pagruris Panginuun sa manga nasyun sa kanyu atubangan, katunda diman rurisun niya kamu nu balaw kamu magsunud sa Panginuun niyu Diyus.