Diyuturunumiyu 6 - Hanunuu

Mahala ti Panginuun Niyu Diyus

¹ “Inda ti manga sugu, ti manga tudlu, hanggan ti manga surundanun ipinakaun Panginuun niyu Diyus agud itudlu sa kanyu. Sunda niyu inda ati sa daga maapu niyu sa baliw dipay Hurdan,

² hampay kamu hanggan kanyu manga anak ag manga kaumputan maggalang sa Panginuun niyu Diyus tugka buhi waya kamu. Nu sundun niyu ti tanan niya manga sugu hanggan surundanun ti ipinakaun niku sa kanyu, mabuhi gid kamu dugay.

³ Pagpatingi kamu, manga nasakupan Israil, ag sunda niyu kaayad kay manga sugu hampay mayad kanyu kahamtangan ati ag hampay lalu waya kamu yumamu sa marinu ag abunda pag daga, angay sa itinaratu sa kanyu Panginuun, ti Diyus niyu manga ginurang.

⁴ “Pagpatingi kamu, manga nasakupan Israil: Ti Panginuun nita Diyus imaw lang ti Panginuun.

⁵ Mahala niyu buu tagipusuun ti Panginuun niyu Diyus, buu karadwa ag buu niyu kabisugan.

⁶ Danga gid niyu pagkalimti inda pag manga sugu ti kang ipinakaun sa kanyu kainda.

⁷ Tudluan pirmi inda sa kanyu manga anak. Hampangi niyu inda nu siyun kamu sa kanyu balay ag una sa kanyu maglakaw, una sa kanyu magpahari ag nu magbangun kamu.

⁸ Ihigut niyu inda sa kanyu manga takyay ag ipauli sa kanyu manga bangas bilang tanda sa kanyu.

⁹ Isurat niyu inda sa manga bakalan sabian niyu balay ag sa manga sabian niyu manga banwa.

¹⁰ “Darahun yi kamu Panginuun niyu Diyus atabug sa daga kay itinaratu iayaw sa kanyu manga ginurang sa kanda ni Abraham, ni Isaak ag ni Hakub. Inda pag daga may daraka ag abunda pag manga banwa balaw kamu ti nagpatindug.

¹¹ May manga balay diman ati punu mayad pag manga bagay balaw kamu ti nagbudlay, may manga bubun balaw kamu ti nagkutkut ag may manga taranuman ubas ag manga ulibu pag kayu balaw kamu ti nagtanum. Ag nu makakaun kamu ag mabsug,

¹² pihua niyu unman niyu malimtan ti Panginuun, ti nagpalwas sa kanyu sa Ihiptu nu naan kamu binwat panawuhun.

¹³ “Galanga niyu ti Panginuun niyu Diyus; siya lang gid kanyu sirbihan ag pagtaratu kamu sa kay lang ngaran.

¹⁴ Danga kamu magsunud sa tuhay pag diyus, ti diyus manga tawu sa kanyu kalibut;

¹⁵ dahil ti Panginuun niyu Diyus, ti kaibahan niyu, balaw gid magkaibug may pagsambahun kamu tuhay. Nu mansamba kamu sa tuhay pag diyus, iparanas Panginuun kay pangagalit sa kanyu ag rurisun niya kamu sa kalibutan.

¹⁶ Danga niyu pag subuki ti Panginuun niyu Diyus parihu sa kanyu binuwat sa Masa.

¹⁷ Sunda gid niyu kaayad ti manga sugu, ti manga tudlu hanggan ti manga surundanun ipinakaun Panginuun niyu Diyus sa kanyu.

¹⁸ Buwata niyu ti tama ag ti mayad sa magbantay Panginuun hampay bumaliw mayad kanyu kahamtangan ag maapu niyu ti mayad pag daga kay itinaratu sa kanyu manga ginurang.

¹⁹ Ipatabug niya sa kanyu atubangan ti tanan niyu manga kalaban angay sa kay sinabi.

²⁰ “Sa aratubangun, nu manpaingana kanyu manga anak, magkun, ‘Hintay lugud kay ibug sabihun manga tudlu, manga surundanun, ag manga kasuguan isinugu sa kanyu Panginuun nita Diyus?’

²¹ Tultuli sida, ‘Manga panawuhun kami kaybi hari Ihiptu, dapat ipinalwas kami Panginuun sa panab-anan niya kamaskihan.

²² Ipinakakit niya sa kanmi kay manga makadululaw ag lilingutan pag manga tanda laban sa manga nasakupan Ihiptu, hanggan sa kanda hari ag sa buu niya magtal-anakan.

²³ Ag ipinalwas niya kami sa Ihiptu hampay darahun sitay pag daga sa kay itinaratu iayaw sa kanta manga ginurang.

²⁴ Sinugu kami Panginuun kuntay sundun nimi inda ti tanan manga surundanun ag paggalang sa kanya sa kanta Diyus, hampay pirmi kami abunda ag mabuhi dugay parihu sa magpangyari kainda.

²⁵ Ag nu sundun lang nita kaayad inda tanan pag sugu Panginuun nita Diyus, angay sa kay pag-isugu sa kanta, bumaliw kita matadlung sa kay pamantay.’