Diyuturunumiyu 5 - Hanunuu

Ti Sampulu ka Sugu

¹ Tinipun ni Muysis ti tanan Israilita ag magkun siya sa kanda, “Manga Israilita, pakidnugi niyu ti ipakaun niku sa kanyu pag manga sugu hanggan surundanun kainda pag sirang. Adalan niyu inda kaayad ag sunda gid.

² Ti Panginuun nita Diyus nagbuwat kasunduan sa kanta sa Bantud Sinai.

³ Balaw niya inda binuwat sa kanta manga ginurang bagkus ngap sa kanta tanan sa magkabuhi taynguna.

⁴ Pagka ati sa bantud nagbagaw ti Panginuun sa kanyu ginan sa basad apuy ga magkaatubang lang kamu.

⁵ Matindugan aku sa karaw-an niyu ag sa Panginuun sa ati katpung pag udas, hampay sabihun sa kanyu ti bagaw Panginuun, dahil magkadala kamu sa apuy ag magbugya kamu magtukad sa bantud. “Magkun ti Panginuun,

⁶ ‘Aku ti Panginuun niyu Diyus ti nagpalwas sa kanyu ginan sa Ihiptu nu naan kamu binwat panawuhun.

⁷ “ ‘Danga kamu magdayaw sa tuhay pag diyus purya sa kangku.

⁸ “ ‘Danga kamu magbuwat manga diyus-diyusan histuda una hintay pag bagay sa langit aw ngatay sa babaw daga, aw ngatay ngap sa danum.

⁹ Danga niyu inda pagsirbihi aw ngatay dayawun, dahil aku, ti Panginuun niyu Diyus, dayu gid aku nu may pagsambahun waya kamu tuhay pag diyus. Pagparusahan niku ti manga may kasalanan sa kangku, hanggan kay manga anak tugka sa ikatlu ag ikap-at pag sinulput manga maglapastangan sa kangku.

¹⁰ Dapat pag-ipakakit niku kang pagmahal sa mayamu gid pag sinulput magmahal sa kangku ag magsunud sa manga sugu niku.

¹¹ “ ‘Danga niyu gamitun kang ngaran sa unman may pulus, dahil aku, ti Panginuun niyu Diyus, ti pumarusa una sa kantapu ti gumamit sa ngaran niku sa unman may pulus.

¹² “ ‘Alalahana niyu ti Sirang Pamahari, ag buwata niyu inda pinakabukudtangi pag sirang para sa kangku, ti Panginuun niyu Diyus, angay sa kang pag-isugu sa kanyu.

¹³ Pagtarabahu kamu sa sulud unum ka sirang,

¹⁴ dapat ti ikapitu pag sirang, ti Sirang Pamahari, ipakaun niyu para sa kangku, ti Panginuun niyu Diyus. Danga kamu magtarabahu sa tunda pag sirang una kanyu manga anak, hanggan manga panawuhun, una manga baka, manga asnu ag ti iba waya pag manga hayup, hanggan ti manga day-uhan mag-ulian kaibahan niyu. Sa panab-anan siyun kanyu manga panawuhun makapahari diman waydi ga kanyu.

¹⁵ Isipa niyu manga panawuhun diman kamu kaybi sa Ihiptu, ag aku, ti Panginuun niyu Diyus, ti nagpalwas sa kanyu ati ginan sa panab-anan niku kamaskihan. Nakan aku, ti Panginuun niyu Diyus, magsugu sa kanyu kuntay tupada niyu ti Sirang Pamahari.

¹⁶ “ ‘Paggalang kamu sa kanyu ama ag ina, angay sa kang pag-isugu sa kanyu, hampay mabuhi kamu dugay ag hampay mayad kanyu kahamtangan sa pag-ipakaun niku pag daga sa kanyu.

¹⁷ “ ‘Danga kamu magmatay.

¹⁸ “ ‘Danga kamu magpanguragin.

¹⁹ “ ‘Danga kamu magtakaw.

²⁰ “ ‘Danga kamu magkastigus pudil laban sa kanyu kaparihu.

²¹ “ ‘Danga kamu magkaibug sa asawa niyu kaparihu ngatay sa kay balay, una daga, una manga panawuhun, hanggan manga baka ag asnu, ngatay una hintay pag kasiyunan niya.’

²² “Imaw inda ti manga sugu Panginuun sa kanyu tanan sa nagtiripun ati sa bantud. Pagka nagbagaw siya matnug ginan sa basad apuy magkasangputan madamul pag rurum, ipinakaun niya inda pag manga sugu ag udyi siya may tuhay waya sinabi. Isinurat niya inda sa duwa ka malapad pag batu bag-u ipinakaun sa kangku.

²³ “Pagka nasaydan niyu ti busis ginan sa kadudulman habang maglabdaban ti bantud, nagpakarani sa kangku ti tanan manga takinan niyu manga lahi hanggan kanyu manga manugpamahala.

²⁴ Bag-u nagsabi sida, ‘Pag-ipakakit Panginuun nita Diyus sa kanta kay kadayawan, ag nasaydan nita kay busis ginan sa apuy. Nakitan nita kainda pag sirang mahimu di maaw mabuhi ti tawu una naghampang sa kanya ti Diyus.

²⁵ Dapat balaw nimi ipauli sa alangan kanmi buhi. Dahil nu masaydan maan nimi ti busis Panginuun nita Diyus, pihu mairub gid kami makamaskihan pag apuy.

²⁶ May imaw aw waya tawu buhi ti nakadnug sa busis Diyus ginan sa apuy parihu sa kanta nadnugan?

²⁷ Kawu yi lang ti pagpakarani sa Panginuun nita Diyus, ag patingihi ti tanan pagsabihun niya. Bag-u itultul lang nimu sa kanmi ti tanan pagsabihun niya, dahil patingihan diman nimi inda ag sundun.’

²⁸ “Nasaydan Panginuun kanyu sinabi katpung naghampang kamu sa kangku, ag magkun siya, ‘Nasaydan niku nu hintay kay pagsabihun inda pag manga tawu sa kanmu, ag mayad ti tanan nida pagsabihun.

²⁹ Mana pag magsunud pirmi sida sa kangku ag magtupad sa kang manga sugu hampay mayad ti kahamtangan nida hanggan nida manga sinulput hanggan waya aban.

³⁰ Lakaw yi ag sabihi sida pagbalik sa kanda manga turda.

³¹ Dapat ay pagpatayak kawu sitay sa kangku hampay iayaw niku sa kanmu ti tanan pag sugu hanggan surundanun ti itudlu nimu sa kanda, imaw kanda sundun ati sa pag-ipakaun niku pag daga kanda manahun.’

³² “Nakan sunda gid niyu kaayad ti pag-isugu Panginuun niyu Diyus sa kanyu. Danga niyu paglabaga una di usa sa kay manga sugu.

³³ Pagkabuhi kamu angay sa sugu Panginuun niyu Diyus sa kanyu hampay mabuhi kamu dugay ag abunda ati sa manahun niyu pag daga.”