Diyuturunumiyu 4 - Hanunuu

Pinaanyuan ni Muysis ti manga Israilita Pagmasurundun

¹ Bag-u magkun si Muysis sa manga Israilita, “Patingihi niyu kaayad ti pag itudlu niku sa kanyu pag manga sugu hanggan surundanun. Sunda niyu inda hampay mabuhi kamu ag makapangulian sa pag-ipakaun Panginuun pag daga sa kanyu, ti Diyus niyu manga ginurang.

² Danga niyu pagdugangi ngatay pabawasi ti pag-ipakaun niku pag manga sugu sa kanyu ginan sa Panginuun niyu Diyus. Kailangan niyu inda tupadun.

³ Nakitan niyu ti binwat Panginuun sa Baal Piyur. Minatay Panginuun niyu Diyus ti manga kaparihu niyu Israilita nagsamba sa kan Baal.

⁴ Dapat kamu manga matinupadun sa Panginuun niyu Diyus buhi di tugka kainda.

⁵ “Pag-itudlu niku sa kanyu ti ipinakaun Panginuun niku Diyus sa kangku pag manga sugu hanggan surundanun hampay kanyu sundun nu rumas-ug kamu sa patabgan niyu pag daga ag ulianan.

⁶ Sundun niyu inda maluag sa kanyu tagipusuun, dahil sa panab-anan niyu pagsunud maipakakit niyu kanyu kadunungan ag pan-intindi sa iba manga nasyun. Nu madnugan nida inda tanan pag surundanun sumabi sida, ‘Ungud duy maaw madunung ag maraintindihun ti manga tawu sa inda pag makapangyarihan pag nasyun.’

⁷ Udyi may tuhay makapangyarihan pag nasyun may diyus arani sa kanda parihu sa Panginuun nita Diyus arani sa kanta sa udas magtawag kita sa kanya.

⁸ Ag udyi may tuhay makapangyarihan pag nasyun may manga sugu hanggan surundanun parihu sa pag-itudlu niku sa kanyu kainda.

⁹ Dapat pag-aman kamu! Danga niyu pag kalimti ti binwat Panginuun kanyu nakitan. Kailangan pumirmaminti inda sa kanyu tagipusuun habang magkabuhi kamu. Itudlu niyu inda sa kanyu manga anak hanggan sa kanyu manga kaumputan.

¹⁰ Alalahanun niyu ti sirang tinmindug kamu sa atubangan Panginuun niyu Diyus ati sa Bantud Sinai, nu naan magkun siya sa kangku, ‘Tipunun nimu sa kang atubangan ti manga nasakupan para mamatingi sa kang manga pagsabihun hampay maanad sida maggalang sa kangku hanggan buhi waya sida, ag maitudlu nida inda sa kanda manga anak.’

¹¹ Bag-u napakarani kamu ag tinmindug sa sugkad bantud habang maglabdaban inda sunggu sa langit, ag sinaput dulum dahil sa masyadu gid mabiru pag rurum.

¹² Bag-u nagbagaw ti Panginuun ginan sa basad apuy. Nadnugan niyu kay busis, dapat unman kamu may mag-akitan.

¹³ Itinultul niya sa kanyu ti manga buwatun niyu pag bagay sa pagtupad manga kasunduan niya sa kanyu. Tunda yi ngani ti Sampulu ka Sugu ti kay pag-isugu sa kanyu tupadun gid niyu. Bag-u isinurat niya inda sa duwa ka malapad pag batu.

¹⁴ Ati katpung pag udas, sinugu aku Panginuun itudlu niku sa kanyu ti manga sugu hanggan surundanun hampay sundun niyu ati sa apuun niyu pag daga ag ulianan.

¹⁵ “Katpung nanhampang sa kanyu ti Panginuun ginan sa basad apuy ati sa Bantud Sinai, unman kamu may nakitan histuda Panginuun. Nakan ngani bantayi niyu kanyu manga sadili

¹⁶ danga niyu yagtingan kanyu manga sadili sa panab-anan pagbuwat una hintay pag histuda ngatay uyahun diyus-diyusan — lalaki man ngatay babayi,

¹⁷ hayup maglakaw ngatay maglayang,

¹⁸ magyapang aw ngatay mag-uli sa danum.

¹⁹ Danga kamu magpaangay sa magsamba sa manga bagay ati sa langit — sa init, sa bulan, ag sa manga pamgasan. Ipinauli inda Panginuun niyu Diyus para sa tanan nasyun sa buu kalibutan.

²⁰ Alalahana niyu bin-ul kamu Panginuun ginan sa Ihiptu, ti daga parihu sa pugun maglabdaban, hampay kanya yi kamu pag nasakupan, ag katunda yi ngani kamu kainda.

²¹ “Nangisug ti Panginuun sa kangku dahil sa kanyu, bag-u sinaadan niya aku balaw makadipay sa Hurdan ag makaslud sa mayad pag daga pag-ipakaun Panginuun niyu Diyus hampay kanyu maranahun.

²² Mamatay aku sitay pag daga ag unman makadipay sa Hurdan, dapat kamu makadipay di ag pihu maapu niyu ti mayad pag daga ati.

²³ Dapat pag-aman kamu hampay balaw niyu malimtan ti kasunduan binuwat Panginuun niyu Diyus. Danga kamu magbuwat manga diyus-diyusan sa histuda una hintay pag bagay, dahil pag-irangan gid inda Panginuun niyu Diyus.

²⁴ Balaw gid siya magkaibug nu may pagsambahun kamu tuhay pag diyus. Dahil ga apuy kay maghirut nu magparusa ti Panginuun niyu Diyus.

²⁵ “Aban, nu manganak kamu ag magka-umput, bag-u nangulianan dugay sa ati pag daga, danga niyu pag yagtingi kanyu sadili sa panab-anan pagbuwat manga diyus-diyusan una hintay kay histuda. Daut inda sa magbantay Panginuun niyu Diyus ag makapaisug gid inda sa kanya.

²⁶ “Kainda pag sirang, saksi niku ti langit ag ti daga laban sa kanyu nu balaw niyu sundun aku, unman kamu dumugay sa kanyu manahun pag daga ati sa baliw dipay Hurdan. Mangulian kamu ati ngalay lang pag panahun, bag-u maruris kamu lubus.

²⁷ Panwayakun kamu Panginuun tabug sa iba manga nasyun, ag pira wadi ti masawad sa kanyu ati sa manga nasyun nu naan kamu pag ipinauli Panginuun.

²⁸ Ag ati yi kamu pag mansamba sa manga diyus-diyusan buwat sa kayu ag batu, balaw maghiling, unman diman magdungug hanggan magkaun ngatay maghungaw.

²⁹ Dapat nu ligawun niyu ti Panginuun niyu Diyus, makitan niyu siya, basta hanapun niyu siya buu tagipusuun.

³⁰ Nu rumas-ug ti kakurian sa kanyu, sa uryan panahun bumalik kamu sa Panginuun niyu Diyus ag sundun niyu siya.

³¹ Dahil ti Panginuun niyu Diyus maawaun, balaw niya kamu pabay-anan ngatay rurisun. Balaw niya kalimtan ti kasunduan kay itinaratu sa kanyu manga ginurang.

Usa lang ti Diyus

³² “Isipun niyu ti manga nangyari ginan sa sirang binuwat Diyus ti tawu sa kalibutan tugka taynguna. Bag-u usisaa niyu ti buu kalibutan nu may makitan kamu makadululaw pag bagay parihu sa kanyu nalakawan.

³³ Bukud sa kanyu, may imaw aw waya iba ka tawu nakadnug sa busis Diyus ginan sa apuy, ag buhi taynguna?

³⁴ May imaw aw tuhay pag diyus nagpanghas bul-un ti usa ka lahi ginan sa usa ka nasyun hampay inda kanya yi sa panab-anan manga pagpakuri, manga makadululaw, manga kalalingutan pag bagay, girahan hanggan manga makamaskihan ag makapangyarihan pag buwat? Dapat tunda ti binuwat Panginuun niyu Diyus ati sa Ihiptu, kamu ngani ti nakakit ati.

³⁵ Ipinakakit sa kanyu tunda pag manga bagay hampay masalman niyu ti Panginuun imaw ti Diyus, ag udyi may iba waya.

³⁶ Ipinadnug niya sa kanyu kay busis ginan sa langit hampay kamu bilinan. Ipinakakit niya sa kanyu sitay sa babaw daga kay makamaskihan pag apuy bag-u nanhampang siya sa kanyu ginan sa inda pag apuy.

³⁷ Ag dahil sa pagmahalun niya kanyu manga ginurang, pinili niya kamu ag ipinalwas ginan sa Ihiptu sa panab-anan niya kadayawan ag kamaskihan.

³⁸ Tinabug niya ti manga mas makapangyarihan waya sa kanyu pag manga nasyun hampay madara kamu sa kanda rugar. Ipinakaun niya inda sa kanyu bilang kanyu mana, parihu sa binwat niya taynguna.

³⁹ “Nakan tandai niyu inda pag sirang ag tanuman sa kanyu tagipusuun ti Panginuun imaw ti Diyus sa langit ag sa babaw daga, udyi may tuhay waya diyus.

⁴⁰ Tupada niyu kay manga sugu hanggan surundanun ipinakaun niku sa kanyu kainda, hampay balaw may daut mangyari sa kanyu tugka waya sa kanyu sinulput, ag hampay mabuhi kamu dugay sa daga pag-ipakaun Panginuun niyu Diyus agud maapu niyu inda hanggan waya aban.”

Ti manga Banwa Darangpan

⁴¹ Bag-u nagpili si Muysis tulu ka banwa sa butlakan baliwa Hurdan

⁴² hampay makapalagiw atabug ti tawu nu makamatay kay kaparihu balaw tikis ag balaw kay ginayak. Makadangup siya sa usa sa inda pag manga banwa hampay balaw siya maunu.

⁴³ Inda ti manga banwa: ti Bisir sa pangawakawaan, sa abwat pag bantud daga para sa manga lahi ni Rubin; ti Ramut sa Gilyad para sa kay lahi ni Gad; ag ti Gulan sa Basan para sa kay lahi ni Manasis.

⁴⁴ Ipinakaun ni Muysis sa manga Israilita inda pag manga kasuguan,

⁴⁵ manga tudlu, manga paalaala, manga surundanun, hanggan nu hintay kanda kailangan buwatun, katpung nagluwas sida sa Ihiptu

⁴⁶ habang makampuhan sida sa luung arani sa Bit Piyur sa butlakan Hurdan. Inda pag daga sakup kaybi ni Sihun hari manga Amuriyu, katpung maghari siya sa Hisbun. Siya hanggan kay manga tawuhan natalu ni Muysis hanggan niya manga kaibahan Israilita katpung linmuwas sida ginan sa Ihiptu.

⁴⁷ Sinakup nida ni Muysis kay daga ni Hari Sihun hanggan ti daga ni Hari Ug, tig hari sa Basan. Sida ti duwa ka Amuriyu manga hari sa butlakan Hurdan.

⁴⁸ Kanda manga daga sinakup manga Israilita ginan sa may Aruwir baliwa sa abwat pag bahagi Luung Arnun, atabug sa Bantud Siryun pag-ingarnan diman Hirmun,

⁴⁹ ag ti tanan daga sa Karatagan Hurdan sa butlakan Sapa Hurdan tugka sa Dagat Namatay, sa lawud baliwa Pisga.