Diyuturunumiyu 34 - Hanunuu

Ti Kamatayan ni Muysis

¹ Ginan sa karatagan Muab, nagtukad si Muysis sa Bantud Nibu, sa katayungtungan Pisga maatubangan sa Hiriku. Ati pag ipinakakit Panginuun sa kanya ti buu daga — ginan sa Gilyad tugka sa Dan,

² ti buu daga Niptali, ti daga Ipraim hanggan Manasis, ti buu daga Huda tugka sa Dagat Miditiranyu,

³ ti Nigib, ag ti buu daga ginan sa Ratag Hiriku (ti banwa manga palma) tugka sa Suar.

⁴ Bag-u nagsabi ti Panginuun sa kan Muysis, “Tunda ngani pag daga ti itinaratu niku sa kan Abraham, sa kan Isaak, hanggan sa kan Hakub, bag-u sinabi niku kang iayaw inda sa kanda manga linahi. Ipinakakit niku inda sa kanmu, dapat balaw kawu makaati.”

⁵ Nakan namatay ngani si Muysis, ti manugsirbi Panginuun ati sa Muab, angay gid sa sinabi Panginuun.

⁶ Ilinbung siya sa Muab, sa ratag maatubangan sa Bit Piyur, dapat tugka taynguna unman gid may nakaalam nu naan siya pag ilinbung.

⁷ Kay idad ni Muysis 120 ka timpu igu namatay siya, dapat mabisug waya gid siya, ag balaw waya malamun kay mata.

⁸ Nanhimanglaw ti manga Israilita sa kan Muysis ati sa karatagan Muab sa sulud tatlumpulu ka sirang.

⁹ Taynguna, si Huswi kay anak ni Nun pinakan-an Ispiritu kadunungan dahil pinili siya ni Muysis kay kailis sa panab-anan pagkupa niya kamang sa kanya. Nakan nagsunud sa kanya ti manga Israilita, ag binuwat nida ti tanan pag-isugu Panginuun sa panab-anan ni Muysis.

¹⁰ Ginan kaybi unman gid may purupita sa Israil parihu sa kan Muysis, magkahampang Panginuun mag-aratubangan.

¹¹ Ipinadara Panginuun si Muysis hampay magbuwat manga makadululaw ag lilingutan pag manga bagay sa Ihiptu laban sa kanda hari hanggan sa kay manga takinan ag sa kay buu nasyun.

¹² Unman may nakabuwat makamaskihan ag lilingutan pag manga bagay parihu sa binuwat ni Muysis sa atubangan tanan Israilita.