Diyuturunumiyu 33 - Hanunuu

Pinapaladan ni Muysis ti manga Linahi Israil

¹ Inda ti sinabi ni Muysis imaw ti manugsirbi Diyus pag papalad sa manga Israilita bag-u siya namatay.

² Magkun siya, “Nagras-ug ti Panginuun ginan sa Sinai; nagpahayag siya sa kanta ginan sa Bantud Siir parihu sa pagsinggit init. Nagsinggit siya ginan sa Bantud Paran. Nagras-ug siya kaibahan ti manga linibu anghil, ag kay sikun pag kamang may bitbit maglabdaban apuy.

³ Pagmahalun gid ungud Panginuun kay manga nasakupan. Pag-alagaan niya ti manga pinili niya pag tawu. Nakan pagsundun nida siya ag pagtupadun kay sugu.

⁴ Ipinakaun ni Muysis sa kanta sa kay manga linahi ni Hakub ti kasuguan bilang mana.

⁵ Naghari ti Panginuun Israil pagka nagtiripun kanda manga takinan hanggan kanda manga lahi.”

⁶ Magkun si Muysis tungkul sa lahi ni Rubin, “Mana balaw malyam ti manga lahi ni Rubin una pira lang sida.”

⁷ Magkun si Muysis tungkul sa lahi ni Huda, “Panginuun, patingihi ti manhagad awat pag lahi ni Huda. Tigsunan maan nimu sida sa manga linahi Israil. Alagai sida ag awati laban sa kanda manga kalaban.”

⁸ Magkun si Muysis tungkul sa lahi ni Libi, “Panginuun, ipinakaun nimu ti Urim ag Tumim sa kanmu tapat pag manga manugsirbi ti lahi ni Libi. Sinubukan nimu sida sa Masa ag tinamyaw sa saruy danum Miriba.

⁹ Nagpakakit sida daka pag unung sa kanmu kaysa kanda manga ginurang, manga patar-ari, hanggan manga kalay-awan. Sinunud nida kanmu bagaw, ag iningatan nida kanmu kasunduan.

¹⁰ Itudlu nida sa manga Israilita kanmu manga sugu hanggan surundanun, bag-u manhandug sida manga kamangyan hanggan manga handug pagsunugun sa kanmu harandugan.

¹¹ Panginuun, papaladan nimu sida, ag mana magbaya kawu sa tanan nida pagbuwatun. Padamhakan kanda manga kalaban hampay balaw yi makabangun uman.”

¹² Magkun si Muysis tungkul sa lahi ni Binhamin, “Pagmahalun Panginuun ti lahi ni Binhamin, ag pag-ipakarayu niya sida sa kadautan ag pag-alagaan sa buu sirang.”

¹³ Magkun si Muysis tungkul sa lahi ni Husi, “Papaladan Panginuun kanda daga ag pirmi padarahan uran ag danum ginan sa basad daga.

¹⁴ Mana sa awat init mamurak kanda manga tanum mayad pag manga burak sa kay udas tig bururak.

¹⁵ Mana kanda manga daan kabantudan pumatubas mayad ag abunda pag manga burak.

¹⁶ Mana umani pinakamayad pag manga ani kanda daga dahil sa kaayadan Diyus, ti nagbagaw sa kanda ginan sa maglabdaban ababa pag puun kayu. Mana inda pag manga papalad pumirmaminti sa lahi ni Husi dahil higit man siya sa kay manga patar-ari.

¹⁷ Kay kabisugan parihu sa kabisugan tudu baka panganay. Kay kamaskihan parihu sa kamaskihan sungay simarun baka. Sa panab-anan inda tabuhun niya ti manga nasyun una ti pinakaarayu pag bahagi kalibutan. Tunda kang papalad sa mayamu nasakupan Ipraim hanggan Manasis.”

¹⁸ Magkun si Muysis tungkul sa lahi ni Sabulun ag ni Isakar, “Magbaya ti lahi ni Sabulun, dahil mag-abunda sida sa kanda pagnigusyu sa iba manga rugar. Magbaya diman ti lahi ni Isakar dahil mag-abunda sida sa kanda rugar.

¹⁹ Tabanun nida ti manga tawu atabug sa bantud hampay manhandug hustu pag manga handug sa Diyus. Mandaus sida dahil mayamu pag papalad ti nab-ul nida sa dagat hanggan sa baybay.”

²⁰ Magkun si Muysis tungkul sa lahi ni Gad, “Dayawun ti Diyus, ti nagpadaka sa sakup lahi ni Gad! Magkabuhi sida sa inda pag daga parihu sa liyun alistu dumuksul sa takyay ngatay ulu manga kalaban.

²¹ Pinili niya ti pinakamayad pag daga ti bagay sa manga takinan. Nu magtiripun ti manga manugpamahala nasakupan Israil, pagsundun nida ti manga pag-isugu Panginuun hanggan kay manga surundanun para sa Israil.”

²² Magkun si Muysis tungkul sa lahi ni Dan, “Ti lahi ni Dan parihu sa anak liyun magluksu-luksu ginan sa Basan.”

²³ Magkun si Muysis tungkul sa lahi ni Niptali, “Ti lahi ni Niptali abunda sa papalad Panginuun. Mana matanggap nida ti daga sa isalpan hanggan sa abagatnan.”

²⁴ Magkun si Muysis tungkul sa lahi ni Asir, “Papaladan ti lahi ni Asir, subra waya sa tanan linahi Israil. Pagmasulung sa kanda ti kaparihu nida manga Israilita ag pag abunda kanda lana ulibu.

²⁵ Pag may panangga mana baul ag galang kanda manga puwirtahan banwa, ag pag sa kanda di ti kamaskihan habang sida magkabuhi.

²⁶ Unman may kaparihu ti Diyus Israil. Masakyan siya sa manga rurum hampay awatan kamu. Sa kay kamaskihan magpaburayhaw siya sa kalangitan.

²⁷ Ti unman may katapusan pag Diyus imaw ti kanyu darangpan; pag-alagaan niya kamu sa kay unman may katapusan pag kamaskihan. Ipatabug niya sa kanyu ti manga kalaban niyu, bag-u isugu niya sa kanyu padamhakan sida.

²⁸ Nakan ti Israil mangulian arayu sa kadamhakan, sa daga abunda sa ani hanggan irinmun ubas, ag nu naan ti tun-ug ginan sa langit imaw ti magpakaun danum sa daga.

²⁹ Pinapaladan kamu, manga nasakupan Israil! Unman may pumarihu sa kanyu — usa ka nasyun irinibri Panginuun. Ti Panginuun imaw ti mag-alaga ag mag-awat sa kanyu, ag siya ti lumaban para sa kanyu. Manyapang kanyu manga kalaban atag sa kanyu, ag tat-an niyu sida sa dayu.”