Diyuturunumiyu 32 - Hanunuu

¹ Langit, pagpatingi dahil mamagaw aku! Daga, patingihi kang manga bagaw.

² Kang manga tudlu pumadna parihu sa uran ag tun-ug. Kang manga bagaw parihu sa anitay sa manga ilamnun ngatay tun-ug sa manga tanum.

³ Ipadakit niku ti ngaran Panginuun. Dayawun nita ti pagka makamaskihan nita Diyus!

⁴ Siya kang palalan-iban pag batu; kang-ud gid kay manga binuwat, ag matadlung ti tanan niya manga palakaw. Matinupadun siya pag Diyus ag balaw magsalan; matadlung siya ag hustu kay manga pagbuwatun.

⁵ Dapat nagkasala kamu sa kanya, balaw yi niya kamu pagkilalan-un kay manga anak dahil sa kanyu kadautan. Manga makasalanan ag madaya pag sinulput-lahi!

⁶ Kainda aw kanyu ibalus sa Panginuun? Manga paung-paung gid kamu ag kurang sa intindi. Balaw aw lugud siya kanyu Ama, ti naglalang sa kanyu?

⁷ Alalahana niyu ti nakalawuy pag manga timpu; isip-isipa niyu ti manga nakalawuy pag sinulput-lahi. Paingan-a niyu kanyu manga ginurang nu hintay ti manga nangyari dahil itultul nida inda sa kanyu. Paingan-a niyu kanyu manga manugpamahala dahil itultul nida inda sa kanyu.

⁸ Pagka pinakan-an Kaabwat-abwatan pag Diyus daga ti manga nasyun bag-u pagka tinunga-tunga niya ti manga nasakupan, pinaulian niya sida tab-anan angay sa kayamuun manga anghil Diyus.

⁹ Dahil pinili Panginuun ti manga linahi ni Hakub bilang kay manga nasakupan.

¹⁰ Nakitan niya sida sa tigangan daga, sa rugar harus unman may magtubu tanum. Inalagaan niya sida ag binantayan parihu sa pag-alaga tawu sa kay alintawu mata.

¹¹ Tinanudan niya sida parihu sa agila magtanud sa kay manga pispis habang kay pagpatigayunun sa paglayang. Pagladladun niya kay manga pakpak hampay sambutun ag darahun sida.

¹² Ti Panginuun lang gid ti mag-iba sa kay manga nasakupan, unman may awat ginan sa iba diyus.

¹³ Pinadumara niya sida sa manga kabantudan, ag pinakaun sa manga patubas daga. Tinugunan niya sida sa panab-anan daykut ginan sa ukang batu ag lana ginan sa manga ulibu magtubu sa mabatu pag daga.

¹⁴ Pinakan-an niya sida manga kisu ag gatas ginan sa manga baka hanggan kambing, bag-u pinakan-an maratabul pag manga karanidu ag manga kambing ginan sa Basan. Pinakan-an diman niya sida pinakamayad pag manga tirigu ag pinainum sa pinakamayad pag irinmun intus ginan sa ubas.

¹⁵ Nagmaalwan ti manga Israilita dapat naglaban sida. Nagtabul sida ag nagbisug, dapat pinatlikudan nida ti Diyus, ti naglalang sa kanda, ag binugyahan nida ti palalan-iban nida pag batu imaw ti kanda Manugribri.

¹⁶ Pinaimun nida ag ginalit ti Panginuun sa kanda mayagting pag manga diyus.

¹⁷ Nagsagda sida sa manga labang balaw tutuu pag diyus — manga diyus balaw nida kilala ag bag-u lang linmutaw, ag balaw ginalang nida manga ginurang.

¹⁸ Linimtan nida ti Diyus ti palalan-iban nida pag batu imaw ti naglalang sa kanda.

¹⁹ Nakitan inda Panginuun, dahil sa kay pangagalit ipinurya niya sida kay manga anak.

²⁰ Nagbagaw siya, “Patlikudan niku sida, ag bantayan niku nu hintay gid abi kanda patabgan, dahil daut sida pag sinulput-lahi, manga anak balaw matinupadun.

²¹ Pinaimun nida aku sa bukun tutuu pag diyus, ag ginalit nida aku sa kanda unman may pulus pag manga diyus-diyusan. Nakan paimunun waydi niku sida sa iba pag manga tawu. Galitun niku sida sa panab-anan pagpapalad sa luku-luku pag nasyun.

²² Dahil kang pangagalit maglabdab ga apuy. Mag-irub inda sa daga ag sa tanan asan, hanggan sa kaabasad-basadan daga, ag sa manga paratungtungan manga bantud.

²³ Padarahan niku sida manga kagipitan, ag pantukun sida niku manga ugyung.

²⁴ Palun-usan niku sida; magkaramatay sida sa lun-us ag sa sakit. Padarahan niku sida maisug pag manga hayup hampay tukbun sida, hanggan manga ulay hampay kagtun sida.

²⁵ Sa luwas nida balay mayamu ti magkaramatay sa irisgan, ag sa sulud humari ti dala. Magkaramatay ti manga gurangun, ti manga kalay-awan, hanggan ti manga anak.

²⁶ Nagbagaw aku wayakun niku sida tugka sa balaw yi sida maalaman sa kalibutan.

²⁷ Dapat balaw niku pahintulutan pumadayaw kanda manga kalaban ag sumabi, ‘Natalu nita sida. Balaw ti Panginuun ti may buwat inda.’ ”

²⁸ Ti Israil usa ka nasyun unman may alam ag intindi.

²⁹ Nu madunung lang sida, masalman mana nida kanda patabgan.

³⁰ Kabitay lugud mabukad usa ka tawu ti 1,000 Israilita? Kabitay matalu duwa ka tawu ti 10,000 sa kanda? Purya lang nu ipinahintulut sida Panginuun kanda palalan-iban pag batu.

³¹ Dahil ti palalan-iban pag batu nita manga kalaban balaw parihu sa kanta palalan-iban pag batu, una sida alam di inda.

³² Kanta manga kalaban, parihu kay ka daut sa manga mag-uli sa Suduma ag Gumura, parihu sa ubas mapait ag makahililu kay burak.

³³ Parihu sida sa irinmun may dalit ulay.

³⁴ Alam Panginuun kanda pagbuwatun, pagtipunun lang dapu niya inda bag-u mag-alagad sa tama pag udas hampay parusahan sida.

³⁵ Nagbagaw siya, “Aku ti bumalus ag pumarusa sa kanda, dahil rumas-ug ti kaudasan miligsay gid sida. Arani yi rumas-ug kanda kadamhakan. Balaw yi inda dugay.”

³⁶ Apinan Panginuun kay manga nasakupan; kaawaan niya kay manga manugsirbi, nu makitan niya unman yi sida may kabisugan ag nu pira wadi ti nasawad sa kanda, panawuhun man una balaw panawuhun.

³⁷ Bag-u mamaingana ti Panginuun sa kay manga nasakupan, “Naan yi kainda kanyu manga diyus, ti palalan-iban niyu pag batu?

³⁸ Naan yi kainda kanyu manga diyus magkaun taba ag mag-inum kanyu handug irinmun? Paawatan sida sa kanyu, pagbuwata niyu sida panangga!

³⁹ Bantayi niyu kainda; aku lang gid ti Diyus! Unman yi may iba diyus purya sa kangku. Aku ti magmatay ag aku diman ti mag-ayaw buhi; aku ti magbiyag ag aku diman ti magbulung, ag unman may makapalagiw sa kang manga kamang.

⁴⁰ Taynguna, ipaabwat niku kang manga kamang ag manaratu, ‘Kainda buhi aku unman may katapusan,

⁴¹ asaun niku kang magkislap pag baladaw ag gamitun niku inda sa pagparusa. Balusan niku kang manga kalaban ag pabayadun ti manga magdumut sa kangku.

⁴² Kang ugyung pumabulus sa kanda manga dugu, ag kang baladaw imaw ti tumigbas sa kanda manga bilug. Magkaramatay sida hanggan ti manga nabiyagan ag manga matakdan. Magkaramatay hanggan kanda manga takinan.’ ”

⁴³ Kamu pag manga nasyun, dayawa niyu ti nasakupan Panginuun, dahil balusan Panginuun ti manga nagmatay sa kay manga manugsirbi. Balusan niya kay manga kalaban, ag linisun niya kay daga hanggan kay manga nasakupan.

⁴⁴ Sinabi ni Muysis kaibahan si Huswi kay anak ni Nun inda pag kanta sa tanan Israilita.

⁴⁵ Pagka natapus nabagaw ni Muysis tunda tanan,

⁴⁶ magkun siya sa manga tawu, “Tandai gid niyu sa kanyu manga tagipusuun ti tanan niku pagsabihun sa kanyu kainda. Tudluan diman waydi niyu inda sa kanyu manga anak hampay matupad nida kaayad ti tanan pagsabihun sa inda pag manga sugu.

⁴⁷ Inda pag manga sugu balaw pangaradnuganun lang pag manga bagaw; pumakaun inda buhi sa kanyu. Nu tupadun niyu inda mabuhi kamu dugay sa apuun niyu pag daga sa baliw dipay Hurdan.”

Itinultul ti Kamatayan ni Muysis

⁴⁸ Sa tunda pag sirang nagsabi ti Panginuun sa kan Muysis,

⁴⁹ “Pag-atag kawu sa Muab, sa kabantudan Abarim, bag-u tumukad kawu sa Bantud Nibu masranguhan sa Hiriku. Bantayi ati ti Kanaan, ti pag-ipakaun niku pag daga sa manga Israilita kanda apuun.

⁵⁰ Ag sa tunda pag bantud mamatay kawu, ag miminsan kawu sa kanmu manga ginurang nagkaramatay yi, parihu sa kan Aarun kanmu patar-ari namatay sa Bantud Hur ag niminsan waydi sa kay manga ginurang.

⁵¹ Dahil kamu duwa naduraan pagsarig sa kangku sa atubangan manga Israilita katpung ati kamu sa danum Miriba Kadis, sa pangawakawaan Sin. Balaw niyu ginalang kang kabanalan sa kanda atubangan.

⁵² Nakan maalantaw lang nimu ginan sa arayu ti pag-ipakaun niku pag daga sa manga Israilita, dapat unman kawu makaslud ati.”