Diyuturunumiyu 31 - Hanunuu

Si Huswi ti Nag-ublus sa kan Muysis

¹ Nagparargu si Muysis sa kay maghampang sa tanan Israilita.

² Magkun siya, “120 yi ka timpu kang idad ag unman yi niku kaya magpanguna sa kanyu. Nagkumun diman ti Panginuun sa kangku balaw aku makadipay sa Hurdan.

³ Ti Panginuun niyu Diyus imaw gid ngap ti pumanguna sa kanyu sa pagdipay. Wasakun niya ti manga nasyun ati, ag apuun niyu kanda daga. Pangunahan kamu ni Huswi sa pagdipay angay sa sinabi Panginuun.

⁴ Wasakun Panginuun tunda pag manga banwa parihu sa kay binwat sa kanda ni Sihun ag ni Ug, ti hari manga Amuriyu, hanggan sa kanda daga.

⁵ Itugut sida Panginuun sa kanyu, ag kailangan buwatun niyu sa kanda ti tanan niku pag-isugu sa kanyu.

⁶ Pagpakarig-un kamu ag pag matutum. Danga kamu magkadala sa kanda dahil ti Panginuun niyu Diyus mag-iba sa kanyu; balaw niya kamu tayakan ngatay pabay-anan.”

⁷ Bag-u tinawagan ni Muysis si Huswi ag sinabihan sa atubangan tanan Israilita, “Pagpakarig-un kawu ag pag matutum, dahil kawu ti pumangulu sa inda pag manga tawu atabug sa daga itinaratu Panginuun iayaw sa kanda ginurang. Kailangan hurayun nimu inda sa kanda bilang mana nida.

⁸ Pangunahan kawu Panginuun ag giyahan niya kawu; balaw niya kawu tayakan ngatay pabay-anan. Nakan danga kawu magkadala ngatay magpanlumuy.”

Ti Pagbasa sa Kasuguan

⁹ Isinurat ni Muysis inda pag manga sugu ag ipinakaun sa manga manughandug Balay Diyus manga lahi ni Libi, ti tagadara Kaban Kasunduan Panginuun, hanggan sa tanan takinan Israil.

¹⁰ Bag-u binilinan sida ni Muysis, “Sa katapusan kada ikapitu pag timpu, ti Timpu Pagpatawad Utang, habang Pista Pagpatindug manga Payag,

¹¹ basaha niyu inda pag manga sugu sa tanan Israilita nu magtiripun sida sa atubangan Panginuun niyu Diyus sa piliun niya pag rugar.

¹² Tipuna ti manga tawu — ti manga lalaki, ti manga babayi, ti manga kalay-awan, hanggan ti manga day-uhan mag-uli sa kanyu manga banwa — hampay makapatingi sida ag maanad maggalang sa Panginuun niyu Diyus ag pagsunud kaayad sa tanan pag-ipatupad sa inda pag manga sugu.

¹³ Buwata niyu inda hampay kanyu manga anak balaw waya may alam sa inda pag manga sugu dumunung maggalang sa Panginuun niyu Diyus habang magkabuhi kamu sa apuun niyu pag daga sa baliw dipay Hurdan.”

Itinagka ti Paglabag manga Israilita

¹⁴ Nagbagaw ti Panginuun sa kan Muysis, “Arani yi kawu mamatay; nakan pabul-an si Huswi bag-u pag-atag kamu sa Turda Taragbuan, dahil tudluan niku siya ati sa kay buruwatun.” Nakan nag-atag ngani si Muysis hanggan si Huswi sa Turda Taragbuan.

¹⁵ Napakakit ti Panginuun sa panab-anan rurum ga tulduk ati sa may sabian Turda.

¹⁶ Nagbagaw ti Panginuun sa kan Muysis, “Arani yi kawu mamatay ag miminsan sa kanmu manga ginurang. Nu udyi kawu, inda pag manga tawu mansamba sa iba pag manga diyus imaw ti pagsambahun manga tawu ati sa atagan nida pag daga. Bugyahan nida aku ag lapastanganun kang binwat kasunduan sa kanda.

¹⁷ Sa ati pag sirang, mangisug aku sa kanda ag bugyahan niku sida. Patlikudan niku sida bag-u maruris sida. Mayamu pag kadamhakan ag kakurian ti rumas-ug sa kanda, bag-u sa tunda pag udas mamaingana sida, ‘Nagras-ug aw sa kanta inda pag kadamhakan dahil balaw kita pag-ibahan Panginuun?’

¹⁸ Patlikudan gid niku sida sa tunda pag udas dahil sa tanan nida binwat kadautan sa panab-anan pagsamba sa iba pag manga diyus.

¹⁹ “Nakan suratan nimu inda pag kanta bag-u tudluan sa manga Israilita. Ipakanta nimu inda sa kanda hampay kastigus niku inda laban sa kanda.

²⁰ Darahun niku sida sa marinu ag abunda pag daga kang itinaratu ipakaun sa kanda manga ginurang. Ati mangabuhi sida abunda; mangaun sida tanan nida pagkaibgan pag karan-unun, ag mabsug sida. Dapat patlikudan nida aku ag mansamba sa iba pag manga diyus. Lapastanganun nida kang kasunduan.

²¹ Ag nu rumas-ug yi sa kanda ti mayamu pag kadamhakan hanggan manga kakurian, inda pag kanta imaw ti kumastigus laban sa kanda, dahil balaw inda malimtan nida manga lahi. Alam niku nu hintay kanda paggayakun buwatun una unman waya niku sida magkadara sa kang itinaratu iayaw pag daga sa kanda.”

²² Sa tunda pag sirang, isinurat ni Muysis ti kanta ag itinudlu sa manga Israilita.

²³ Binilinan Panginuun si Huswi kay anak ni Nun: “Pagpakarig-un kawu ag pagmatutum, dahil kawu ti mandumara sa manga Israilita atabug sa daga kang itinaratu iayaw sa kanda, ag ibahan niku kawu.”

²⁴ Pagka nisurat yi ni Muysis ti tanan pag sugu sa ribru,

²⁵ sinugu niya ti manga Libita, ti tagadara sa Kaban Kasunduan Panginuun. Nagbagaw siya,

²⁶ “Bul-a niyu inda pag Ribru Kasuguan bag-u paulian sa saruy Kaban Kasunduan Panginuun niyu Diyus. Ati lang inda bilang kastigus laban sa nasakupan Israil.

²⁷ Dahil alam di niku nu kabitay kamu maralabag ag maganit kanyu ulu. Una ngani taynguna kaibahan niyu aku, maglaban yi kamu sa Panginuun, lalu waya gid nu tigbak yi aku!

²⁸ Tipuna sa kang atubangan ti tanan manugpamahala sa kanyu lahi hanggan ti tanan takinan hampay sabihun niku sa kanda inda pag manga bagay. Ag tawagun niku ti langit ag ti daga bilang kastigus laban sa kanda.

²⁹ Dahil alam di niku nu tigbak yi aku, mamuwat gid kamu kadautan ag bugyahan niyu ti tanan niku pag-isugu sa kanyu. Aban rumas-ug sa kanyu ti manga kadalaan dahil bumuwat kamu daut sa magbantay Panginuun ag galitun niyu siya sa panab-anan niyu buruwatun.”

Ti Kanta ni Muysis

³⁰ Inda ti kabuuhan kanta kay ipinadnug ni Muysis sa buu kapulungan Israil: