Diyuturunumiyu 30 - Hanunuu

Ti manga Kailangan Buwatun hampay Papaladan Diyus

¹ “Nu mangyari sa kanyu inda pag manga bagay — ti manga papalad hanggan ti manga saad kang sinabi sa kanyu — ag maalaala niyu inda nu ati yi kamu sa manga nasyun nu naan pag ipinabihag kamu Panginuun niyu Diyus.

² Nu sa tunda pag udas bumalik nalub-anan kanmu hanggan kanyu manga anak sa Panginuun niyu Diyus, ag sundun niyu buu tagipusuun ag karadwa ti tanan pag-isugu niku sa kanyu kainda,

³ kaawaan kamu Panginuun niyu Diyus. Tipunun niya kamu ginan sa tanan pag nasyun nu naan pag ipinabihag niya kamu, ag rargu ibalik niya kanyu mayad pag kahamtangan.

⁴ Una pinalayas waya niya kamu sa pinakaarayu pag bahagi kalibutan, tipunun di gid kamu Panginuun niyu Diyus

⁵ ag pabalikun sa daga magkaapu niyu manga ginurang, ag maapu maan niyu inda. Paunladun ag payamuun waya gid niya kamu kaysa kanyu manga ginurang.

⁶ Bag-uhun Panginuun niyu Diyus kanyu manga tagipusuun hanggan ti tagipusuun niyu manga katawuhan hampay mahalun niyu siya sa buu tagipusuun ag karadwa, ag mabuhi kamu dugay.

⁷ Ipalakaw Panginuun niyu Diyus inda tanan pag saad sa kanyu manga kalaban magkadaut ag magpakuri sa kanyu.

⁸ Sundun maan niyu ti Panginuun ag tupadun ti tanan niya manga sugu kang pag-ipakaun sa kanyu taynguna.

⁹ Paalwanun gid kamu Panginuun niyu Diyus sa tanan niyu pagbuwatun. Payamuun niya kanyu manga anak, manga hayup, hanggan kanyu manga ani, dahil magbaya ti Panginuun magpapalad sa kanyu parihu sa kay magpapalad niya sa kanyu manga ginurang.

¹⁰ Mangyari inda nu tupadun niyu ti Panginuun niyu Diyus ag sundun ti tanan niya manga sugu hanggan surundanun masuratan sa inda pag Ribru Kasuguan. Ungud, mangyari inda nu bumalik kamu sa kanya sa buu niyu tagipusuun ag karadwa.

¹¹ “Balaw makuri masalman ag buwatun inda pag manga sugu ti kang pag-ipakaun sa kanyu taynguna.

¹² Balaw inda sa langit, nakan balaw yi niyu kailangan ipaingana kuntay, ‘Sitapu lugud ti atag sa langit hampay bul-un tunda ag ipaburayhaw sa kanta hampay tupadun nita?’

¹³ Balaw diman waydi inda sa baliw dipay dagat, nakan balaw yi niyu kailangan ipaingana kuntay, ‘Si unu lugud ti dumipay sa dagat hampay bul-un tunda ag ipaburayhaw sa kanta hampay tupadun nita?’

¹⁴ Asan sa kanyu inda pag manga bagaw, sa kanyu bibig ag tagipusuun, nakan tupada niyu inda.

¹⁵ “Pagpatingi! Kainda pag sirang papiliun niku kamu: buhi ngatay kamatayan, kaabundahan ngatay kadamhakan.

¹⁶ Pagsuguun niku kamu kainda mahala niyu ti Panginuun niyu Diyus, pagpangabuhi kamu angay sa kay manga palakaw, ag pagsunud sa kay manga sugu hanggan surundanun. Nu buwatun niyu inda, mangabuhi kamu dugay ag yumamu, bag-u papaladan kamu Panginuun niyu Diyus ati sa ulianan ag apuun niyu pag daga.

¹⁷ “Dapat nu unman kamu magtupad ag magsunud sa kanya, bag-u magsamba kamu ag magsirbi sa iba pag manga diyus,

¹⁸ kainda di waya pagpaandaman yi niku kamu pihu gid kamu midamhak. Balaw kamu mabuhi dugay sa daga niyu suldun ag apuun ati sa baliw dipay Hurdan.

¹⁹ “Taynguna pag sirang, nagtawag aku sa langit ag daga hampay kumastigus nu naan sitaay kanyu piliun: buhi ngatay kamatayan, papalad ngatay saad. Pilia mana niyu ti buhi hampay mabuhi kamu dugay hanggan kanyu manga anak.

²⁰ Mahala niyu ti Panginuun niyu Diyus. Sunda niyu siya ag pagsa kanya di gid kamu, dahil siya kanyu buhi. Nu buwatun niyu inda, mabuhi kamu dugay ati sa daga kay itinaratu iayaw sa kanyu manga ginurang sa kanda ni Abraham, ni Isaak ag ni Hakub.”