Diyuturunumiyu 3 - Hanunuu

Natalu si Hari Ug Taga Basan

¹ “Bag-u nag-ati kita sa Basan dapat pagras-ug nita sa Idri, ginira kita ni Hari Ug taga Basan kaibahan ti tanan niya sundalu.

² Dapat magkun sa kangku ti Panginuun, ‘Danga kawu magkadala sa kanya dahil pihu ipakaun niku siya sa kanmu hanggan ti tanan niya sundalu hanggan kay daga. Buwata nimu sa kanya ti binuwat nimu sa kan Sihun ti hari manga Amuriyu, tig hari sa Hisbun.’

³ Nakan ipinakaun Panginuun nita Diyus sa kanta si Hari Ug, tig hari sa Basan hanggan ti tanan niya sundalu. Pinanmatay nita sida bag-u unman kita may sinawadan buhi.

⁴ Sinakup nita ti tanan 60 ka banwa niya — ti buu sakup Argub nu naan pag maghari si Hari Ug taga Basan.

⁵ Ti tanan banwa inda magkasangput arabwat pag alad batu ag may manga sabian bag-u may saradu. Sinakup diman nita ti manga mayamu baryu unman may alad batu.

⁶ “Rinuris nita sida lubus parihu sa binuwat nita sa kan Hari Sihun taga Hisbun. Pinanmatay nita ti tanan tawu sa kada banwa nita naaghas — manga lalaki, manga babayi hanggan manga anak.

⁷ Dapat dinara nita ti tanan hayup hanggan ti manga kasiyunan nab-ul nita ginan sa kanda manga banwa.

⁸ “Nakan naaghas nita ginan sa duwa ka hari manga Amuriyu ti daga sa butlakan baliwa Sapa Hurdan ginan sa Luung Arnun tugka sa Bantud Hirmun.

⁹ (Ti Bantud Hirmun pag-ingarnan diman manga taga Sidun kuntay Siryun hanggan manga Amuriyu kuntay Sinir.)

¹⁰ Sinakup nita ti tanan banwa sa maratag pag bantud, ti buu Gilyad hanggan ti buu Basan tugka sa Salika ag Idri, ti manga banwa sakup kaharian ni Hari Ug taga Basan.

¹¹ (Si Hari Ug wadi ti nasawad usa-usa sa manga lahi Ripaimiyu. Kay igyaan baul kay aba 9 ka luk-an siku bag-u 4 ka luk-an siku kay kadaka. Makitan waya inda taynguna ati sa Raba pag banwa manga Amunita.)

Kay Nag-ayaw-ayaw sa Daga

¹² “Pagka nasakup nita inda pag daga, ipinakaun niku sa manga lahi nida ni Rubin ni Gad ti daga sa kanaway Aruwir arani sa Luung Arnun kaibahan yi ti katunga kabantudan Gilyad hanggan kay manga banwa inda.

¹³ Ipinakaun niku ti nasawad pag bahagi Gilyad hanggan ti buu Basan, sakup ni Ug, sa katunga pag lahi ni Manasis. (Ti buu Argub sa Basan pag-ingarnan kaybi Daga manga Ripaimiyu.)

¹⁴ Si Hair ginan sa lahi ni Manasis, ti may apu buu Argub sakup Basan tugka sa katugkaan daga manga Gisuriyu ag manga Maakatiyu. Inda pag sakup daga pinaingarnan ni Hair niya sadili ngaran, nakan tugka taynguna, ti Basan pag-ingarnan ‘Manga Banwa ni Hair.’

¹⁵ Ipinakaun niku ti Gilyad sa magtal-anakan ni Makir.

¹⁶ Ipinakaun niku sa manga lahi nida ni Rubin ni Gad ti manga daga ginan sa Gilyad tugka sa Luung Arnun. Ti karaw-an Arnun kanda tab-anan sa salatan baliwa bag-u kanda tab-anan sa kanaway ti Luung Habuk, ti tab-anan diman daga manga Amunita.

¹⁷ Kay tab-anan sa isalpan ti Karatagan Hurdan kaibahan yi ti Sapa Hurdan, ginan sa Danaw Galiliya tugka sa Dagat Namatay sa lawud baliwa Pisga sa butlakan.

¹⁸ “Ati katpung kaybi, sinugu niku ti manga lahi niyu mag-uli sa butlakan Hurdan, ‘Una ipinakaun Panginuun niyu Diyus inda pag daga hampay apuun niyu, kailangan dumipay di ti tanan sundalu niyu armasin sa Sapa Hurdan ag alistu manguna sa kanyu manga kaparihu Israilita sa girahan.

¹⁹ Dapat ay tayakan niyu kanyu manga asawa ag anak, hanggan kanyu mayamu manga hayup sa ipinakaun niku pag banwa sa kanyu.

²⁰ Nu naapu yi niyu manga kaparihu Israilita ti daga sa baliw dipay Hurdan ti ipinakaun sa kanda Panginuun niyu Diyus, bag-u nu napakan-an yi sida maayus pag kahamtangan parihu sa kay binuwat sa kanyu, mahimu makabalik maan kamu sa daga ipinakaun niku sa kanyu.’

Balaw Pinahintulutan si Muysis Makasulud sa Kanaan

²¹ “Sa ati katpung pag udas, sinabi diman niku sa kan Huswi, ‘Nakitan nimu ti tanan-tanan manga binuwat Panginuun niyu Diyus sa tunda pag duwa ka hari. Katida diman ti buwatun Panginuun sa tanan manga kaharian kanyu atagan.

²² Danga kamu magkadala sa kanda; ti Panginuun niyu Diyus ti lumaban baliwa sa kanyu.’

²³ “Ati katpung pag udas, napaawa-awa aku sa Panginuun. Magkun aku,

²⁴ ‘Panginuun Diyus, inumpisahan yi nimu ipinakakit sa kanmu manugsirbi kanmu kamaskihan, dahil unman may diyus sa langit ngatay sa daga ti makabuwat manga makadululaw pag binwat nimu.

²⁵ Nakan pasnui yi duy nimu aku makadipay hampay makitan niku ti marinu pag daga ati sa baliw dipay Hurdan, ti mararinu pag tagudtud hanggan ti manga kabantudan Libanun.’

²⁶ “Dapat ay nangisug ngap ti Panginuun sa kangku dahil sa kanyu, ag unman niya aku pinatingihan. Magkun siya, ‘Kang-ud yi tunda! Danga yi nimu aku paghampanga tungkul sa siyun pag manga bagay.

²⁷ Pagtukad yi kawu sa katayungtungan Bantud Pisga bag-u umalantaw ati pag daga una naan tag baliwa, dahil unman kawu makadipay sa Hurdan.

²⁸ Dapat tudlui nimu si Huswi sa kay manga dapat buwatun. Pabisugun nimu siya dahil siya ti manguna sa inda pag manga tawu sa pagdipay sa Hurdan. Ipakaun niya sa kanda ti daga kanmu makitan taynguna!’

²⁹ Nakan nangulian dap kita sa karatagan arani sa Bit Piyur.”