Diyuturunumiyu 29 - Hanunuu

¹ Inda ti manga tultulanun sa pagsunud sa taratu pag-isugu Panginuun sa kan Muysis tabug sa manga Israilita sa Muab. Dugang inda sa taratu kay binuwat sa kanda sa Hurib.

Ipinatupad maan sa manga Israilita ti Kasunduan

² Ipinatawag ni Muysis ti tanan Israilita ag sinabihan, “Kamu mismu ti nakakit sa tanan binuwat Panginuun sa hari Ihiptu hanggan sa tanan niya takinan ag sa buu niya nasyun.

³ Nakitan niyu kaybi ti masyadu gid pag sarut, ti manga makadululaw hanggan ti lilingutan pag manga buwat.

⁴ Dapat tugka taynguna kanyu nakitan ag nasaydan unman waya pag-ipalinaw Panginuun sa kanyu.

⁵ Sa sulud 40 ka timpu pagpangunahan niku kamu sa pangawakawaan, unman nadaan kanyu manga rutay hanggan manga lapak.

⁶ Unman kamu may karan-unun ati ngatay irinmun, dapat pinakan-an kamu Panginuun hampay maalaman niyu siya ti Panginuun niyu Diyus.

⁷ “Pagras-ug nita sa inda pag daga, nanlaban sa kanta si Hari Sihun taga Hisbun hanggan si Hari Ug taga Basan, dapat tinalu nita sida.

⁸ Inagaw nita kanda daga ag ipinakaun inda sa manga lahi ni Rubin, ni Gad, ag sa katunga pag lahi ni Manasis bilang kanda mana.

⁹ “Nakan sunda niyu kaayad ti manga pag-isugu sa inda pag kasunduan, hampay abunda kamu sa tanan niyu pagbuwatun.

¹⁰ Tinmindug kamu tanan kainda pag sirang sa atubangan Panginuun niyu Diyus: ti manga takinan niyu manga lahi, ti manga manugpamahala, ti manga takinan, ag ti tanan lalaki Israil,

¹¹ kanyu manga asawa ag manga anak, hanggan ti manga day-uhan mag-uli kaibahan niyu ti manugkayu ag ti manugtaas danum niyu.

¹² Tinmindug kamu sitaay hampay manupad kasunduan sa Panginuun niyu Diyus. Nagsumpa ti Panginuun sa inda pag kasunduan kay binuwat sa kanyu taynguna pag sirang,

¹³ hampay ipaalam maan niya sa kanyu kainda kamu kay nasakupan ag siya kanyu Diyus angay sa kay itinaratu sa kanyu hanggan sa kanyu manga ginurang sa kan Abraham, sa kan Isaak, ag sa kan Hakub.

^14-15 Dapat balaw lang kamu ti matindugan sitaay kainda sa atubangan Panginuun niyu Diyus ti binuwatan niya sa inda pag taratu, nu unman hanggan ti tanan niyu katawuhan sa aratubangun.

¹⁶ “Magkaalaman diman niyu nu kabitay kita nangulian sa Ihiptu ag nu kabitay kita nagbaklay sa daga iba manga nasyun atabug sa inda pag rugar.

¹⁷ Nakitan niyu kanda daut gid pag manga diyus-diyusan buwat ginan sa kayu, sa batu hanggan sa pilak ag gintu.

¹⁸ Pihua niyu unman una di usa sa kanyu, lalaki ngatay babayi, una magtal-anakan, ngatay lahi ti pumatlikud sa Panginuun nita Diyus ag mansamba sa ati pag manga diyus iba nasyun hampay unman may una di usa sa kanyu ti bumaliw ga gamut ilamnun magtubu mapait ag makahililu.

¹⁹ Una si unu ti nakadnug sa inda pag manga pasandam saad danga mag-isip kuntay balaw siya maunu nu pumarargu siya sa kay gustu. Ti tutuu, magdara inda kadamhakan sa kanyu tanan.

²⁰ Balaw gid siya patawadun Panginuun. Manlabdab ti pangagalit Panginuun sa kanya, ag mangyari gid sa kanya ti tanan nakasurat pag saad sa inda pag ribru, bag-u panasun Panginuun kay ngaran sa kalibutan.

²¹ Ipablag siya Panginuun sa tanan pag linahi Israil, ag pakurianan siya angay sa manga saad kasunduan masuratan sa inda pag Ribru Kasuguan.

²² “Sa aratubangun pag manga sinulput, kanyu manga lahi hanggan ti manga day-uhan ginan sa arayu pag rugar makakit manga kadamhakan ag manga sakit ipadara Panginuun sa kanyu daga.

²³ Kanyu buu daga bumaliw parihu sa tigangan daga natabunan yi asupri ag asin. Unman gid may magtanum sa inda pag daga dahil ti tanum unman manubu. Bumaliw parihu sa pagkadamhak Suduma ag Gumura, hanggan Adma ag Sibuyim pagka dinaut Panginuun dahil sa kay masyadu gid pag pangagalit.

²⁴ Bag-u mamaingana ti tanan nasyun, ‘Hayga binuwat inda Panginuun sa kay nasyun? Hayga masyadu gid kay pangagalit?’

²⁵ “Ag kay sagut kaindaay: ‘Dahil naglabag inda pag manga tawu sa kasunduan binuwat sa kanda Panginuun, ti Diyus nida manga ginurang, pagka ipinaluwas niya sida sa Ihiptu.

²⁶ Nagsamba sida ag nagsirbi sa iba pag manga diyus unman nida kilala, ti pag-irangan Panginuun sambahun nida.

²⁷ Nakan masyadu gid ti pangagalit Panginuun sa kanda nasyun ag ipinalakaw niya sa kanda ti tanan pag saad masuratan sa inda pag ribru.

²⁸ Sa masyadu pag pangagalit Panginuun, pinalayas niya sida sa kanda nasyun ag ipinabihag sa iba pag nasyun nu naan pag mag-uli sida kainda.’

²⁹ “May manga lihim pag manga bagay ti Panginuun lang ti may alam, dapat ipinaburayhaw niya sa kanta kay kasuguan, ag kailangan nita inda sundun hanggan nita lahi hanggan waya aban.