Diyuturunumiyu 28 - Hanunuu

Ti Papalad sa Pagsunud

¹ “Nu sundun niyu ti Panginuun niyu Diyus ag tupadun ti tanan niya sugu kang pag-ipakaun sa kanyu taynguna, buwatun niya kamu higit man sa tanan pag nasyun sitay sa kalibutan.

² Nu sundun niyu ti Panginuun niyu Diyus, matanggap gid niyu inda tanan pag papalad:

³ “Papaladan niya kanyu manga banwa hanggan manga tanman.

⁴ Papaladan niya kamu mayamu pag anak, abunda pag ani ag mayamu pag hayup.

⁵ Papaladan niya kamu abunda pag ani hanggan manga karan-unun.

⁶ Papaladan niya ti tanan niyu pagbuwatun.

⁷ Ipatalu Panginuun sa kanyu ti magsalakay sa kanyu pag manga kalaban. Karaibahanan sida mansalakay sa kanyu dapat mamululagan sida malagiw ginan sa kanyu.

⁸ Papaladan Panginuun niyu Diyus ti tanan niyu pagbuwatun ag pun-un niya manga inani kanyu manga haramnuan. Papaladan niya kamu ati sa pag-ipakaun niya pag daga sa kanyu.

⁹ Angay sa itinaratu Panginuun niyu Diyus sa kanyu, buwatun niya kamu kay pinili pag nasakupan, nu tupadun niyu kay manga sugu ag mangabuhi kamu angay sa kay palakaw.

¹⁰ Ag maalaman tanan tawu sa kalibutan kamu ti pinili Panginuun, bag-u madala sida sa kanyu.

¹¹ Papaladan kamu Panginuun ati sa itinaratu niya pag daga sa kanyu manga ginurang kay iayaw sa kanyu. Payamuun niya kanyu manga anak, kanyu manga hayup hanggan kanyu manga patubas.

¹² Padarahan kamu Panginuun uran sa tama pag udas ginan sa taraguan niya kayamanan sa langit, ag papaladan niya ti tanan niyu pagbuwatun. Mamaudam kamu sa mayamu pag nasyun, dapat kamu bay unman mangudam.

¹³ Buwatun kamu Panginuun takinan manga nasyun, ag balaw tagasunud lang. Ungud, pirmi kamu sa tungud ag balaw sa sirung nu sundun niyu mayad ti manga sugu Panginuun niyu Diyus ti pag-ipakaun niku sa kanyu taynguna.

¹⁴ Nakan danga niyu paglabaga ti una hintay sa kang pag-isugu sa kanyu taynguna pag sirang, ag danga kamu magsunud sa iba pag manga diyus hanggan magsirbi sa kanda.

Ti Saad sa Balaw Matinupadun

¹⁵ “Dapat nu balaw kamu sumunud sa Panginuun niyu Diyus ag balaw sundun mayad ti tanan niya manga sugu hanggan surundanun kang pag-ipakaun sa kanyu taynguna, malakawan niyu inda tanan pag saad:

¹⁶ Saadan Panginuun kanyu manga banwa hanggan tanman.

¹⁷ Saadan niya kanyu manga ani hanggan manga karan-unun.

¹⁸ Saadan niya kamu sa panab-anan pagpakaun sa kanyu pira-pira pag manga anak hanggan ani ag manga hayup.

¹⁹ Saadan niya ti tanan niyu manga pagbuwatun.

²⁰ Saadan kamu Panginuun, malitu kamu ag maarimputu sa tanan niyu pagbuwatun tugka sa midamhak kamu ag magkaradura dahil sa daut niyu pag buruwatun sa panab-an paglabag sa kanya.

²¹ Padarahan kamu Panginuun manga sarut tugka sa midamhak kamu ati sa kanyu patabgan ag apuun pag daga.

²² Ungud, pakurianan kamu Panginuun sa makamatay pag manga sakit, pag tagyumun, kayupus, ag mainit pag durus, malawig pag turungun hanggan manga sarut sa manga tanum tugka sa magkaradura kamu.

²³ Ti langit bumaliw bilang galang unman yi magpakaun uran ag ti daga man-ganit parihu sa baul.

²⁴ Bagkus mana danum ti iayaw Panginuun sa kanyu bilang uran, galbuk ngap kay iayaw. Pauranan niya galbuk tugka sa midamhak kamu.

²⁵ “Ipatalu kamu Panginuun sa kanyu manga kalaban. Magkarausa kamu man-gira sa kanda, dapat mamululagan kamu malagiw ginan sa kanda. Kadat-an kamu tanan kaharian sa kalibutan.

²⁶ Kanyu manga bangkay kan-un manga manuk ag maisug pag manga hayup, ag unman may manbugaw sa kanda.

²⁷ Pakurianan kamu Panginuun sa manga baga ga kay ipinadara sa manga taga Ihiptu, hanggan manga tumur, bun-i ag maragatul unman mag-ayad.

²⁸ Papaungun kamu Panginuun, butaun ag lituhun.

²⁹ Mangarapgap kamu una sirang parihu sa usa ka buta. Udyi kamu mag-unlad una hintay kanyu buwatun. Pirmi kamu apihun ag takawan, bag-u unman may mangawat sa kanyu.

³⁰ “Agawun iba ka lalaki kanyu asawan-un pag babayi. Manbungsud kamu balay dapat balaw kamu ti mangulian siyun. Mantanum kamu manga ubas dapat balaw kamu ti pumakinabang kay manga burak.

³¹ Iyawun kanyu baka sa kanyu atubangan, dapat balaw kamu ti kumaun inda. Agawun sa kanyu ti manga asnu niyu, ag balaw yi iuli sa kanyu. Bul-un niyu manga kalaban kanyu manga karanidu, ag unman may mangawat sa kanyu hampay mabawi tunda.

³² Habang mabantayan kamu, bihagun manga taga iba nasyun kanyu manga anak, ag sirang-sirang kamu mag-alagad sa kanda pagbalik, dapat unman kamu may mabuwat.

³³ Ti manga tawu balaw niyu magkakilala imaw ti kumaun sa tanan niyu binudlayan, bag-u pirmi kamu apihun ag pakurianan.

³⁴ Ag nu makitan niyu inda tanan, mapaung kamu.

³⁵ Patubuan kamu Panginuun manga baga unman mag-ayad ginan sa kanyu raprapa tugka sa ulu.

³⁶ “Kamu hanggan kanyu pinili pag hari ipabihag Panginuun sa balaw niyu kilala pag nasyun una niyu manga ginurang. Ati pag mansamba kamu sa iba pag manga diyus buwat sa kayu ag batu.

³⁷ Kadat-an kamu, puyaan, ag apihun manga mag-uli sa manga nasyun nu naan kamu pag binihag.

³⁸ “Mayamu kanyu itanum dapat pira-pira lang kanyu anihun, dahil kan-un inda manga apan.

³⁹ Mananum kamu ubas bag-u kanyu alagaan inda, dapat unman kamu makaputi kay burak inda ngatay makainum kay intus, dahil kan-un inda manga basul.

⁴⁰ Mananum kamu mayamu pag ulibu una naan sa kanyu daga, dapat unman kamu may mab-ul lana siyun ginan, dahil marabak kay manga burak inda.

⁴¹ Manganak kamu, dapat unman sida madugay sa kanyu dahil bihagun sida.

⁴² Kan-un manga apan ti tanan niyu manga kayu hanggan manga tanum.

⁴³ “Ti manga day-uhan mag-uli kaibahan niyu amat-amat bumaliw makapangyarihan habang kamu amat-amat maglumuy.

⁴⁴ Sida ti mamautang sa kanyu ag balaw kamu ti mamautang sa kanda. Sida ti pumangulu sa kanyu ag kamu manga panawuhun lang.

⁴⁵ Mangyari inda tanan pag saad sa kanyu tugka sa magkaramatay kamu, nu balaw niyu sundun ti Panginuun niyu Diyus hanggan kay ipinakaun sa kanyu pag manga sugu hanggan surundanun.

⁴⁶ Inda pag manga saad bumaliw paala-ala ag pasandam sa kanyu hanggan sa kanyu manga sinulput hanggan waya aban.

⁴⁷ Dahil balaw kamu nagsirbi may kabayaan ag kasulungan sa Panginuun niyu Diyus sa udas niyu kaabundahan,

⁴⁸ ipabahala niya kamu sa ipinadara niya pag manga kalaban sa kanyu ag sumirbi kamu sa kanda. Lun-usun kamu, uwawun, kurangun sa rutay ag matabwan una hintay pag bagay. Pakurianan niya kamu ga binitinan singkaw baul tugka sa magkaramatay kamu.

⁴⁹ “Ipagira kamu Panginuun sa usa ka nasyun ginan sa arayu pag rugar, ginan sa baliw dipay kalibutan, kanda pamagaw balaw niyu magkasalman. Girahun nida kamu parihu sa agila magsagib.

⁵⁰ Maisug sida ag unman may pangaawa sa manga gurangun hanggan manga kalay-awan.

⁵¹ Kan-un nida kanyu manga hayup hanggan kanyu manga tubas tugka sa magkaramatay kamu. Unman diman sida may sawadan sa kanyu uyas, una irinmun ubas ngatay lana ulibu hanggan manga hayup tugka sa maruris kamu.

⁵² Girahun nida ti tanan pag-ipakaun Panginuun niyu Diyus sa kanyu pag banwa tugka sa magkararup-ag ti manga abwat ag mapag-un pag manga alad batu kanyu pagsarigan.

⁵³ “Sa udas sakupun kamu niyu manga kalaban, kan-un niyu kanyu manga anak ti ipinakaun Panginuun niyu Diyus sa kanyu dahil sa masyadu gid pag lun-us.

⁵⁴ Una waya ti mabuut ag maalumanay pag tawu unman yi may pangaawa sa kay patar-ari, sa kay pagmahalun pag asawa, hanggan sa kay nasawad pag manga anak.

⁵⁵ Udyi niya sida pag-ayawan karan-unun kay nayi niya anak dahil magkadala siya mabawagan. Katunda ngani ti mangyari sa kanyu sa udas sakupun niyu manga kalaban ti tanan niyu banwa.

⁵⁶ Una hanggan ti mabuut ag maalumanay pag babayi kaybi unman maglakaw nakaraprapa sa daga, bumaliw diman mairang sa kay pagmahalun pag asawa hanggan manga anak.

⁵⁷ Ibutang niya kay anak bag-u lang lusad bag-u kay alulunan kan-un niya sa lihus, dahil magkadala siya barang unman yi may kan-un habang pagsangputun niyu manga kalaban kanyu manga banwa.

⁵⁸ “Nu balaw niyu sundun mayad inda tanan pag sugu masuratan sa inda pag ribru, ag balaw pag-igalang ti lilingutan ag makadululaw pag ngaran Panginuun niyu Diyus,

⁵⁹ padarahan niya kamu hanggan kanyu manga lahi madala pag manga sakit masyadu gid masakit ag balaw yi mag-ayad.

⁶⁰ Ipalakaw niya sa kanyu ti madala pag manga durungugun ti ipinadara niya sa Ihiptu, ag balaw yi inda umayad.

⁶¹ Ipalakaw diman waydi Panginuun sa kanyu ti tanan pag kalasi sakit balaw nisurat sa Ribru Kasuguan, tugka sa magkaramatay kamu.

⁶² Una parihu kamu ga pamgasan sa langit kay kayamu, pira lang ti masawad sa kanyu dahil unman kamu nagtupad sa Panginuun niyu Diyus.

⁶³ Nu kabitay pag-ikabaya Panginuun ti pagpaabunda ag pagpayamu sa kanyu, pag-ikabaya diman niya ti pagpadamhak ag pagmatay sa kanyu, tugka sa madura kamu sa ulianan ag apuun niyu pag daga.

⁶⁴ “Wayakun kamu Panginuun sa tanan nasyun, sa kada suuk kalibutan. Ag ati pag mansamba kamu sa iba pag manga diyus buwat sa kayu ag batu, balaw niyu kilala una niyu manga ginurang.

⁶⁵ Unman kamu may kahusayan ati hanggan rugar paraharyan. Balaw kamu pakan-an Panginuun kaariwayahan ag mabul-an kamu pag-asa, bag-u pirmi kamu mag-ibuyu.

⁶⁶ Pirmi may kadalaan kanyu buhi; sirang yabi pirmi kamu pagkulbaan, ag unman may kasiguraduhan kanyu buhi.

⁶⁷ Dahil sa kanyu pangadalaun sa manga bagay niyu mag-akitan sa sangput, sumabi kamu nu surip, ‘Mana yabi yi.’ Ag nu yabi sumabi kamu, ‘Mana surip yi.’

⁶⁸ Pabalikun kamu Panginuun sa Ihiptu sakay sa barku, una nagtaratu siya sa kanyu unman yi gid kamu pabalikun ati. Ipabili niyu kanyu sadili sa kanyu kalaban bilang manga suruguun, dapat unman may mamili sa kanyu.”