Diyuturunumiyu 27 - Hanunuu

Ti Harandugan sa Bantud Ibal

¹ Bag-u binilinan ni Muysis ti manga manugpanguna sa Israil pag manga tawu: “Sunda niyu inda tanan pag sugu ti pag-ipakaun niku sa kanyu kainda pag sirang.

² Nu makadipay yi kamu sa Hurdan, ati sa pag-ipakaun sa kanyu Panginuun niyu Diyus pag daga, pagtumpuk kamu daraka pag manga batu, ag pahuptan niyu inda apug.

³ Isurat niyu sa inda pag manga batu ti tanan kasuguan nu makaslud yi kamu sa marinu ag abunda pag daga, ipinakaun sa kanyu Panginuun niyu Diyus, ti Diyus niyu manga ginurang, angay sa itinaratu niya sa kanyu.

⁴ Nu makadipay yi kamu sa Hurdan, patindugan niyu inda pag manga batu sa Bantud Ibal, angay sa pag-isugu niku sa kanyu kainda, ag pahuptan niyu inda apug.

⁵ Bag-u mamuwat kamu ati harandugan batu para sa Panginuun niyu Diyus. Danga kamu maggamit manga batu inandasan.

⁶ Kailangan balaw inandasan ti manga batu buwatun niyu harandugan. Bag-u manhandug kamu sa inda pag harandugan manga handug pagsunugun para sa Panginuun niyu Diyus.

⁷ Paghandug waydi kamu handug para sa mayad pag pakiusa, ag kan-a niyu inda siyun ag pagbarayaan kamu sa atubangan Panginuun niyu Diyus.

⁸ Ag isurat niyu kaltaw inda pag manga kasuguan Diyus sa manga batu kanyu pinahuptan apug.”

⁹ Magkun waya si Muysis hanggan ti manga manughandug lahi ni Libi sa tanan Israilita, “Pagpatingi kamu, manga nasakupan Israil! Kainda pag sirang pagkilalan-un yi kamu manga nasakupan Panginuun niyu Diyus.

¹⁰ Sunda niyu ti Panginuun niyu Diyus ag tupada ti tanan niya manga sugu hanggan surundanun kang pag-ipakaun sa kanyu taynguna.”

Ti manga Saad

¹¹ Sa tunda diman pag sirang binilinan ni Muysis ti manga tawu:

¹² “Nu makadipay yi kamu sa Hurdan, inda pag manga lahi ti dapat tumindug sa Bantud Girisim hampay papaladan ti manga tawu: ti lahi ni Simyun, ni Libi, ni Huda, ni Isakar, ni Husi hanggan ni Binhamin.

¹³ Ag inda waydi pag manga lahi ti dapat tumindug sa Bantud Ibal hampay saadan ti manga tawu: ti lahi ni Rubin, ni Gad, ni Asir, Sabulun, ni Dan hanggan Niptali.

¹⁴ “Bag-u ti manga Libita waydi manringgit matnug tabug sa tanan Israilita:

¹⁵ “Saadan ti magbuwat una hintay pag manga diyus-diyusan buwat sa batu ngatay sa galang bag-u inda kanda sambahun sa lihim. Dahil pagkagalitan Panginuun inda pag manga diyus-diyusan buwat lang tawu.” Bag-u sumagut ti tanan tawu, “Amin!”

¹⁶ “Saadan ti balaw maggalang sa kay manga gurang.” Bag-u sumagut ti tanan tawu, “Amin!”

¹⁷ “Saadan ti maghalin muhun niya kaparihu hampay agawun kay daga.” Bag-u sumagut ti tanan tawu, “Amin!”

¹⁸ “Saadan ti magpatalang sa buta sa dalan.” Bag-u sumagut ti tanan tawu, “Amin!”

¹⁹ “Saadan ti balaw magpakaun matarung sa manga balaw Israilita, sa manga ilu hanggan sa manga buranday babayi.” Bag-u sumagut ti tanan tawu, “Amin!”

²⁰ “Saadan ti mag-ulid sa asawa niya ama, dahil pagpakay-ahun niya kay ama.” Bag-u sumagut ti tanan tawu, “Amin!”

²¹ “Saadan ti maggamit sa una hintay pag hayup.” Bag-u sumagut ti tanan tawu, “Amin!”

²² “Saadan ti mag-ulid sa kay patar-ari babayi, una patar-ari niya sa ama ngatay sa ina.” Bag-u sumagut ti tanan tawu, “Amin!”

²³ “Saadan ti mag-ulid sa kay manugang babayi.” Bag-u sumagut ti tanan tawu, “Amin!”

²⁴ “Saadan ti magmatay sa kay kaparihu una sa lihim.” Bag-u sumagut ti tanan tawu, “Amin!”

²⁵ “Saadan ti magtanggap suhul hampay manmatay sa unman may salan pag tawu.” Bag-u sumagut ti tanan tawu, “Amin!”

²⁶ “Saadan ti balaw sumunud ngatay tumupad sa inda tanan pag sugu.” Bag-u sumagut ti tanan tawu, “Amin!”