Diyuturunumiyu 26 - Hanunuu

Ti Un-an pag Ani ag ti Ikasampulu

¹ “Nu maapu yi niyu ti pag-ipakaun Panginuun niyu Diyus pag daga sa kanyu bilang maranahun niyu, ag ati yi kamu pag mag-uli,

² ipauli niyu ti un-an pag bahagi niyu naani sa tabigun. Bag-u darahun niyu inda sa piliun Panginuun niyu Diyus pag rugar nu naan siya pagdayawun.

³ Pag-atag kamu sa manughandug Balay Diyus magsirbi sa tunda pag udas ag pagsabi sa kanya, ‘Sa panab-anan inda pag handug, pagkilalan-un niku kainda pag sirang kuntay ti Panginuun nita Diyus imaw ti nagdara sa kangku sa inda pag daga kay itinaratu sa kanta manga ginurang iayaw sa kanta.’

⁴ “Pagkatapus, bul-un manughandug ti tabigun ginan sa kanyu bag-u ipauli sa atubangan harandugan Panginuun niyu Diyus.

⁵ Bag-u sabihun niyu inda sa atubangan Panginuun niyu Diyus: ‘Kanmi ginurang si Hakub usa ka Aramiyu unman may pirmaminti ulian kaybi. Nag-atag siya sa Ihiptu ag nangulian ati kaibahan kay magtal-anakan. Pira-pira lang sida ati katpung, dapat nagyamu sida, pagka taynguna makapangyarihan yi pag nasyun.

⁶ Dapat inihid kami manga taga Ihiptu. Pinakurianan nida kami ag pilit ipinatarabahu.

⁷ Naghagad awat kami sa Panginuun, ti Diyus nimi manga ginurang, ag pinatingihan niya kami. Nakitan niya kanmi kakurian, kanmi mag-agwanta, hanggan kanmi kaapihan.

⁸ Nakan bin-ul kami Panginuun ginan sa Ihiptu sa panab-anan niya masyadu pag kamaskihan ag madala pag buwat. Nagbuwat siya manga makadululaw ag lilingutan pag manga bagay.

⁹ Dinara niya kami sa inda pag rugar, ipinakaun sa kanmi inda ti marinu ag abunda pag daga.

¹⁰ Nakan taynguna, Panginuun, dinara nimi ti un-an pag bahagi ani ginan sa ipinakaun nimu pag daga sa kanmi.’ Nu matapus niyu bagawun inda, paulian niyu ti tabigun sa atubangan Panginuun niyu Diyus, bag-u pagsamba kamu sa kanya.

¹¹ Bag-u pagbarayaan kamu dahil sa mayad pag manga bagay ti pag-ipakaun Panginuun niyu Diyus sa kanyu hanggan sa kanyu magtal-anakan. Iminsan diman niyu sa kanyu mag-alaala ti manga Libita hanggan ti manga day-uhan mag-uli kaibahan niyu.

¹² “Sa kada ikatlu pag timpu, iayaw niyu kanyu ikasampulu pag manga ani tag sa manga Libita, sa manga balaw Israilita, sa manga ilu hanggan sa manga buranday babayi, hampay may abunda sida pag karan-unun.

¹³ Bag-u sumabi kamu sa atubangan Panginuun niyu Diyus: ‘Bin-ul yi niku sa kang balay ti banal pag bahagi, ti ikasampulu, ag ipinakaun sa manga Libita, sa manga balaw Israilita, sa manga ilu, hanggan sa manga buranday babayi angay sa tanan nimu pag-isugu sa kanmi. Unman aku naglabag ngatay nalimut sa una di usa sa kanmu manga sugu.

¹⁴ Balaw niku inda kinaun mintaras magpanrukuan aku; unman niku inda tinandug mintaras mauring aku; ag unman niku inda isinagda sa namatay. Ungud, Panginuun niku Diyus, sinunud niku kawu. Binwat niku ti tanan nimu pag-isugu sa kanmi.

¹⁵ Bantayi nimu kami ginan sa kanmu banal pag ulian sa langit, ag papaladan nimu kanmu nasakupan manga Israilita hanggan ti marinu ag abunda pag daga kanmu ipinakaun sa kanmi angay sa kanmu itinaratu sa kanmi manga ginurang.’

Sunda ti manga Sugu Diyus

¹⁶ “Pagsuguun kamu kainda Panginuun niyu Diyus tupada niyu ti tanan pag sugu hanggan surundanun. Sunda gid niyu inda kaayad sa buu niyu tagipusuun ag karadwa.

¹⁷ Itinultul niyu taynguna ti Panginuun kanyu yi ngani Diyus ag mangabuhi kamu angay sa kay manga palakaw, ag tupadun niyu kay manga sugu hanggan surundanun, ag sundun niyu siya.

¹⁸ Ipinasandam diman Panginuun kainda kamu kay ipinablag pag manga nasakupan angay sa kay itinaratu, kailangan sumunud kamu sa tanan niya manga sugu.

¹⁹ Angay sa kay itinaratu, buwatun niya kamu higit man sa tanan pag nasyun, pagkilalan-un ag paggalangun kamu. Kamu ti manga pinili Panginuun niyu Diyus pag nasakupan, angay sa kay itinaratu.”