Diyuturunumiyu 25 - Hanunuu

¹ “Nangus may magtalaluhan duwa ka tawu ag dinara nida kanda kasaba sa talaghusay, ag sinabi manga manughusay nu si unu sa kanda duwa ti may kasalanan ag ti unman may kasalanan.

² Nu ti may kasalanan pinarusahan manughusay bakulun, padapaun siya sa atubangan manga manughusay ag bakulun angay sa kay nabwat kasalanan.

³ Dapat balaw lumabis sa 40 ka bakul, dahil nu subra sa 40, mangay-a siya.

⁴ “Danga pagpungta ti baka habang maggiuk.

⁵ “Nu ti magtar-ari lalaki mag-uli sa usa lang ka rugar, ag namatay ti usa sa kanda unman may anak, kay asawa kailangan balaw mag-asawa sa iba sa bukun katawuhan niya asawa. Ti patar-ari niya asawa ti umasawa sa kanya. Katungkulan niya inda sa kanya.

⁶ Kanda un-an pag anak lalaki baliwun anak sa namatay pag patar-ari hampay balaw madura kay ngaran sa Israil.

⁷ “Dapat nu dayu mangasawa ti patar-ari namatay sa buranday, umati ti buranday sa manga manugpamahala ati sa puwirtahan banwa ag sumabi, ‘Balaw magpasnu kang bayaw kuntay pakan-an niya lahi kay patar-ari sa Israil. Balaw niya pagsundun kay katungkulan sa kangku bilang bayaw.’

⁸ Bag-u ipatawag siya sa manga manugpamahala banwa ag manhampang sida sa kanya. Nu magpaganit gid siya balaw niya gustu asawan-un ti buranday,

⁹ pakarani ti buranday sa atubangan manga manugpamahala ag bul-un niya ti lapak sa kay bayaw ag bug-anan niya siya sa uyahun ag sabihan, ‘Katunda ti buwatun sa tawu unman magpasnu mapakan-an lahi kay patar-ari namatay.’

¹⁰ Ti magtal-anakan inda pag tawu ingarnan sa Israil magtal-anakan tawu binul-an lapak.

¹¹ “Nu may duwa ka lalaki mag-arawayan ag nagpakarani ti asawa usa ka lalaki sa kay asawa, hampay awatan kay asawa sa panab-anan pagdakup sa kinatawu kalaban,

¹² kailangan puldun kay kamang babayi unman may awa-awa.

^13-14 “Danga kamu magdaya sa kanyu magkilu ngatay magtakal.

¹⁵ Paggamit kamu hustu pag kiluhan ag takalan hampay mabuhi kamu dugay sa pag-ipakaun Panginuun niyu Diyus pag daga sa kanyu.

¹⁶ Dahil pagkagalitan Panginuun niyu Diyus ti tawu maradaya.

¹⁷ “Isipa niyu nu hintay ti binuwat manga Amalikita sa kanyu katpung nagluwas kamu ginan sa Ihiptu.

¹⁸ Ginira nida kamu katpung magkagasa yi gid kamu sa budlay, ag pinanmatay nida kanyu manga kaibahan ati sa uryan. Unman sida may dala sa Diyus.

¹⁹ Nakan rurisa gid niyu ti tanan Amalikita nu pakan-an yi kamu Panginuun niyu Diyus kahusayan sa tanan niyu manga kalaban ati sa pag-ipakaun niya sa kanyu pag daga, kanyu apuun. Danga gid niyu inda pag kalimti.