Diyuturunumiyu 24 - Hanunuu

¹ “Nangus, nangasawa ti usa ka lalaki, ag igu sa uryan binugyahan niya kay asawa dahil may nasulayan siya balaw niya pagkaibgan, kailangan bumuwat siya kasuratan sa pagtarayakan bag-u ipakaun niya inda sa kay asawa, ag mahimu yi niya paighitun sa kay balay.

² Nu mangasawa maan tunda pag babayi,

³ bag-u tayakan maan siya niya ikadwa pag asawa ngatay mamatay kay ikadwa pag asawa,

⁴ balaw yi siya mahimu asawan-un maan niya un-an pag asawa dahil nauringan yi siya. Nu asawan-un maan siya niya un-an pag asawa, daut gid masyadu inda sa magbantay Panginuun. Kailangan danga niyu pagbuwata inda pag kasalanan sa pag-ipakaun Panginuun niyu Diyus pag daga sa kanyu bilang mana niyu.

⁵ “Nu bag-u ipinaasawa ti usa ka lalaki, danga niyu siya pagpakuyugan sa gira ngatay pakan-an una hintay pag buruwatun sa banwa sa sulud usa ka timpu, hampay makatahan siya sa kay balay ag mapakan-an niya kabayaan kay asawa.

⁶ “Danga nimu pag bul-a pilinda sa utang ti galingan nag-utang sa kanmu, dahil ga binul-an nimu siya kay karabuhian.

⁷ “Nu natakdan ti usa ka tawu magdakup sa kay kaparihu Israilita ag binuwat niya suruguun ngatay ipinabili niya, kailangan matyun ti nagdakup. Kailangan duraun niyu inda pag kadautan sa kanyu.

⁸ “Tungkul sa dilikadu pag sakit sa lukub, sunda niyu kaayad ti manga surundanun pag-ipabuwat sa kanyu manga manughandug lahi ni Libi. Sunda gid niyu kang pag-isugu sa kanda.

⁹ Isipa niyu nu hintay ti binuwat Panginuun niyu Diyus sa kan Miryam katpung kanyu magbaklay ginan sa Ihiptu.

¹⁰ “Nu manpautang kamu una hintay sa kanyu kaparihu Israilita, danga kamu magsulud sa kay balay hampay mam-ul una hintay kay isangla.

¹¹ Pag-alagad lang kamu sa luwas ag darahun niya kay isangla sa kanyu.

^12-13 Nu pugri ti tawu, ag kay kulimpay ti isinangla sa kanyu, danga niyu pabay-anan masuripan inda sa kanyu. Ulian inda sa kanya sa unman waya mag-isangday ti init hampay magamit niya sa kay magkaturug, ag pasalamatan waya kawu niya. Isipun Panginuun niyu Diyus matadlung inda pag buwat.

¹⁴ “Danga kamu maglugi sa pugri pag manugtarabahu, Israilita man siya ngatay day-uhan mag-uli sa kanyu banwa.

¹⁵ Bayadi siya sa sinirang pag upahan sa unman waya mag-isangday ti init dahil pugri siya ag magsarig siya sa kay kabaydanan. Dahil nu unman, barang mandangup siya sa Panginuun laban sa kanmu, ag isipun inda kanmu kasalanan.

¹⁶ “Ti manga gurang balaw mahimu matyun dahil sa kasalanan manga anak nida, katunda diman ti manga anak dahil sa kasalanan manga gurang nida; ti kada usa matyun lang angay sa kay sadili kasalanan.

¹⁷ “Pakan-an niyu matarung ti manga ilu hanggan ti manga balaw Israilita mag-ulian kaibahan niyu. Danga niyu pag bul-a ti kulimpay buranday babayi bilang pilinda sa kay utang.

¹⁸ Isipun niyu manga suruguun kamu kaybi sa Ihiptu ag irinibri kamu Panginuun niyu Diyus. Tunda ngani kay dahilan nu hayga pagsuguun niku kamu buwata inda.

¹⁹ “Nu mag-ani kamu ag may nasawad kamu pira ka bugkus sa tanman, danga yi niyu pagbaliki ag pagbul-a. Tayaki lang inda sa manga balaw Israilita ag sa manga ilu, hanggan sa manga buranday pag babayi, hampay papaladan kamu Panginuun niyu Diyus sa tanan niyu buruwatun.

²⁰ Nu magputi kamu kanyu manga ulibu, danga yi niyu pagbaliki ti nasawad. Tayaki lang sa manga balaw Israilita ag sa manga ilu, hanggan sa manga buranday pag babayi.

²¹ Nu magputi kamu sa kanyu manga ubas, danga yi niyu pagbaliki ti manga nasawad. Tayaki lang inda sa manga balaw Israilita ag sa manga ilu, hanggan sa manga buranday pag babayi.

²² Isipun niyu manga suruguun kamu kaybi sa Ihiptu. Tunda ngani kay dahilan nu hayga pag-isugu niku sa kanyu buwata tunda.”