Diyuturunumiyu 23 - Hanunuu

Ti Ipinaluwas pag manga Tawu sa Kapulungan Israil

¹ “Unman may tawu linus-anan ngatay pinlud kay kinatawu ti makapaamut sa pagtiripun nasakupan Panginuun.

² “Ti anak sa kalyag balaw makapaamut sa pagtiripun nasakupan Panginuun hanggan kay manga katawuhan tugka sa ikasampulu pag sinulput.

³ Unman may Amunita ngatay Muabita ngatay una si unu sa kanda manga katawuhan tugka sa ikasampulu pag sinulput ti makapaamut sa pagtiripun nasakupan Panginuun.

⁴ Dahil unman nida kamu pinakan-an karan-unun ngatay danum katpung maglakaw kamu ginan sa Ihiptu, ag inupahan waya nida si Balaam kay anak ni Biyur taga Pitur sa Aram Naharaim hampay saadan kamu.

⁵ Dapat balaw pinatingihan Panginuun niyu Diyus si Balaam. Bagkus, binuwat niya papalad ti saad sa kanyu, dahil pagmahalun kamu Panginuun niyu Diyus.

⁶ Habang buhi waya kamu, danga gid kamu mag-awat sa manga Amunita ngatay Muabita una sa hintay pag paraan.

⁷ “Danga niyu pagkadat-i ti manga Idumita, dahil manga kadugu niyu sida. Danga waydi niyu pagkadat-i ti manga taga Ihiptu, dahil nangulian kamu sa kanda daga bilang manga day-uhan.

⁸ Kanda manga katawuhan sa ikatlu pag sinulput mahimu makapaamut sa pagtiripun nasakupan Panginuun.

Ti Iba waya pag manga Surundanun

⁹ “Nu lumaban kamu sa kanyu manga kalaban, pag-aman gid kamu sa una hintay pag bagay ti makapauring sa kanyu.

¹⁰ Nu may usa sa kanyu ti nakapalwang kay similya sa kay maturugan sa yabi, kailangan lumuwas siya sa kampu, ati dap siya pag mangulian.

¹¹ Igu malambung, marigus siya, bag-u pag-isangday init mahimu yi siya makabalik sa kampu.

¹² “Pagpili kamu rugar sa luwas kampu kanyu buwatun durugsunan.

¹³ Kailangan ti kada usa sa kanyu pag may garamitun pangali, hampay nu magdugsun kamu magkali bag-u tabunan lang nu tapus yi.

¹⁴ Dahil ti Panginuun niyu Diyus magpalibut sa kanyu kampu hampay iribri kamu ag iayaw sa kanyu ti manga kalaban niyu. Nakan kailangan malumpiyu kanyu kampu hampay unman siya may mag-akitan balaw mayad, ag hampay balaw niya kamu tayakan.

¹⁵ “Nu ti usa ka suruguun nalagiw ginan sa kay amu ag namaawat sa kanyu, danga siya pagpilita bumalik sa kay amu.

¹⁶ Patahana siya sa kanyu rugar una naan pag banwa kay gustu. Danga niyu siya pag-apiha.

¹⁷ “Kailangan unman may Israilita, lalaki man ngatay babayi, ti magpabili kay sadili bilang pagsamba sa manga diyus-diyusan sa balay diyus nida.

¹⁸ Danga gid niyu pagdaraha sa Balay Panginuun niyu Diyus ti natanggap niyu pag kuwarta ginan sa tunda pag paraan hampay ibayad sa kanyu taratu sa Panginuun niyu Diyus, dahil pagkadat-an gid niya tunda.

¹⁹ “Nu magpautang kamu sa kanyu kaparihu Israilita, danga niyu pagpatubui, kuwarta man inda ngatay karan-unun ngatay una hintay pag bagay ti mahimu patubuan.

²⁰ Mahimu niyu paudaman patubuan ti manga balaw Israilita, dapat danga sa kanyu kaparihu manga Israilita. Tupadun niyu inda hampay papaladan kamu Panginuun niyu Diyus sa tanan niyu buruwatun ati sa apuun niyu pag daga.

²¹ “Nu manaratu kamu sa Panginuun niyu Diyus, danga pagpadugaya sa pagtupad, dahil pihu gid suktun kamu Panginuun niyu Diyus, ag magkasala kamu sa balaw niyu pagtupad.

²² Balaw inda kasalanan nu balaw kamu nagtaratu sa Panginuun.

²³ Dapat una hintay kanyu itinaratu sa Panginuun niyu Diyus, kailangan tupadun gid niyu.

²⁴ “Nu umatag kamu sa ubasan niyu kaparihu Israilita, mahimu masunud kanyu kaun ubas, dapat danga kamu magbuul ag magdara sa kanyu sukadan.

²⁵ Nu umatag kamu sa tiriguhan niyu kaparihu Israilita, mahimu kamu magbunggu uhay, dapat danga niyu paggaraba.