Diyuturunumiyu 22 - Hanunuu

¹ “Nu makitan niyu nakakalpas ti baka ngatay karanidu niyu kaparihu, danga niyu inda pagpabay-ani, bagkus ngap darahun niyu inda sa kay apu.

² Dapat nu arayu ti pag-ulian niya apu ngatay balaw niyu alam nu sitapu kay apu, daraha dap niyu ti hayup tag sa kanyu tugka sa rumas-ug ti may apu maghanap. Bag-u iayaw inda sa kanya.

³ Katunda diman ti buwatun niyu sa asnu ngatay sa panulung ngatay sa una hintay pag bagay ti nadura sa kanyu kaparihu. Danga niyu inda pagpabay-ani.

⁴ “Nu mag-akitan niyu ti asnu ngatay ti baka niyu kaparihu nilugmuk sa dalan, danga niyu inda pagpabay-ani. Awati gid kay may apu sa pagpatindug kay hayup.

⁵ “Ti babayi danga magsulung rutay panlalaki, aw ngatay ti lalaki danga magsulung rutay panbabayi, dahil pagkadat-an Panginuun niyu Diyus ti magbuwat katunda.

⁶ “Nu may mag-akitan kamu pugad manuk sa saruy dalan, sa kayu ngatay sa daga, bag-u kay ina mag-ukub sa kay manga pispis ngatay manga itlug, danga niyu pagbul-a kay ina kaibahan kay manga pispis ngatay manga itlug.

⁷ Mahimu niyu bul-un kay manga pispis ngatay itlug, dapat kailangan palpasan niyu kay ina, hampay mayad kanyu kahamtangan ag mangabuhi kamu dugay.

⁸ “Nu mamatindug kamu balay, kailangan paulian niyu alad ti sangput maratag pag atup, hampay balaw kamu may saragtun nu may malagpak ginan sa kanyu atup ag mamatay.

⁹ “Danga kamu magtanum iba binhi sa taranuman ubas. Nu buwatun niyu inda, para yi sa Balay Diyus ti burak niyu itinanum hanggan ti burak niyu tanum ubas.

¹⁰ “Danga niyu pagminsana ti baka ag asnu sa pag-aradu.

¹¹ Danga kamu magsulung rutay binuwat ginan sa duwa ka kalasi bunang.

¹² “Paulian niyu paraway ti upat ka suuk kanyu kulimpay pag rutay.

Ti Kasuguan tungkul sa Pagkamalumpiyu

¹³ “Nangus, inasawa usa ka lalaki ti usa ka babayi, bag-u igu nakaululidan sida, nangisug siya sa kay asawa

¹⁴ ag kay binangdanan. Magkun siya, ‘Napatutuuhanan niku sa kang nag-ulid sa kang asawa balaw yi siya tugnaw pag daraga.’

¹⁵ Bag-u ti manga gurang babayi umatag sa manga manugpamahala banwa ati sa may puwirtahan banwa. Dumara sida puruyba kuntay tugnaw pag daraga kanda anak.

¹⁶ Bag-u sumabi ti ama babayi sa manga manugpamahala, ‘Ipinaasawa niku kang anak sa inda pag tawu ag taynguna nangisug siya sa kang anak.

¹⁷ Pagbangdanan niya kang anak balaw yi siya tugnaw pag daraga pagka-inasawa niya. Dapat inda ti puruyba tugnaw kang anak.’ Bag-u ipakakit gurang sa manga manugpamahala ti sapin sa nagpaigyaan mag-asawa may dugu.

¹⁸ Bag-u dakpun manga manugpamahala ti lalaki ag parusahan.

¹⁹ Pabayadun nida siya 100 bilug pilak ag iayaw inda sa ama babayi, dahil inuya niya ti usa ka tugnaw pag daraga Israilita. Ag kailangan danga gid niya tayakan ti babayi habang buhi siya.

²⁰ “Dapat nu tutuu ti pagsabihun asawa ag unman may mag-akitan puruyba kuntay tugnaw pag daraga ti babayi,

²¹ darahun tunda pag babayi sa atubangan balay niya ama ag ati bintukun siya manga lalaki sa banwa tugka sa mamatay. Makakaray-a pag bagay kay binuwat sa Israil dahil sa pagpanguragin katpung ati waya siya sa pudir niya ama. Kailangan duraun niyu inda pag kadautan sa kanyu.

²² “Nu ti usa ka tawu natakdan mag-ulid sa babayi may asawa, sida duwa-duwa kailangan matyun. Kailangan duraun niyu inda pag kadautan sa Israil.

²³ “Nu ti usa ka tawu nangulid sa usa ka babayi itinagka yi ikasal, ag nangyari inda sa usa ka banwa,

²⁴ darahun niyu sida duwa sa puwirtahan banwa ag bintukun tugka sa mamatay. Matyun ti babayi dahil una ati siya sa banwa unman siya nanringgit hampay manhagad awat. Matyun diman ti lalaki dahil nangulid siya sa babayi itinagka yi ikasal. Kailangan duraun niyu inda pag kadautan sa kanyu.

²⁵ “Dapat nu dinahas lalaki sa luwas banwa ti babayi itinagka yi ikasal, ti lalaki lang ti matyun.

²⁶ Danga niyu paglabuta ti babayi dahil unman siya nagkasala ag balaw kailangan parusahan kamatayan. Inda pag kasaba parihu lang sa kasaba tawu nagdugma sa kay kaparihu ag minatay inda.

²⁷ Dahil sa luwas banwa pagdinahas ti babayi, una nagringgit waya siya nanhagad awat, unman diman may makadnug hampay awatan siya.

²⁸ “Nu natakdan ti usa ka lalaki pagdahasun niya ti usa ka babayi balaw waya ikasal,

²⁹ bumayad ti lalaki 50 ka bilug pilak sa ama babayi. Kailangan asawan-un niya ti babayi dahil nab-ul yi niya kay pagkababayi, ag kailangan balaw gid tayakan niya habang buhi waya inda.

³⁰ “Kailangan danga mag-ulid ti anak sa asawa niya ama, dahil kauyaan niya ama tunda.