Diyuturunumiyu 21 - Hanunuu

Ti Unman Magkakilala pag Manugmatay Tawu

¹ “Halimbawa may nakitan bangkay tawu sa pag-ipakaun pag daga sa kanyu Panginuun niyu Diyus kanyu apuun, ag unman may nakaalam nu si unu ti nagmatay inda,

² kailangan sukatun niyu manga manugpamahala hanggan manga manughusay kay karayu ti bangkay sa manga banwa sa kay sangput.

³ Bag-u ti manga manugpamahala sa tunda pag banwa bumuul tarnida baka balaw waya gid ginamit pantarabahu ngatay pan-aradu.

⁴ Darahun nida inda sa luung nu naan kay kataid pag daga balaw waya gid naaradu ngatay natanuman. Ag ati nida pag bariun ti liug tarnida baka.

⁵ Kailangan sumiyun diman ti manga manughandug Balay Diyus pag manga lahi ni Libi, dahil pinili sida Panginuun niyu Diyus sumirbi ag pumakaun basbas sa ngaran Panginuun, bag-u maghusay sa tanan kasaba.

⁶ Bag-u ti tanan manugpamahala sa pinakaarani pag banwa nu naan pag nakitan ti bangkay pag ugas kanda manga kamang sa tungud tarnida baka binarian liug.

⁷ Bag-u sumabi sida, ‘Balaw kami ti nagmatay ag balaw diman kami nakakit nu si unu ti nagmatay.

⁸ Ungud Panginuun, patawada di duy kanmu manga nasakupan Israilita, ti kanmu irinibri sa Ihiptu. Danga kami pagsukta sa inda pag kamatayan tawu unman may salan.’ Bag-u unman yi sida may saragtun sa kamatayan sa tunda pag tawu.

⁹ Sa panab-anan pagsunud, balaw kamu suktun Panginuun sa pagmatay, dahil nakitan niya matadlung kamu.

Ti Pag-asawa sa Bihag pag Babayi

¹⁰ “Halimbawa nanlaban kamu sa kanyu manga kalaban ag ipinahintulut sida sa kanyu Panginuun niyu Diyus, ag binihag niyu sida.

¹¹ Nangus, ti usa sa kanyu nakakit usa ka marinu pag babayi sa manga bihag ag naibug siya sa kanya ag gustu niya siya asawan-un.

¹² Nu mangyari inda, darahun niya ti babayi sa kay balay ag kalbuhun, puldan kay manga kuku,

¹³ bag-u ilisan kay sulung rutay katpung sa kay nagbihag. Kailangan pagpatayak ti babayi sa balay lalaki sa sulud usa ka bulan habang mag-amiraw siya sa kay manga gurang. Nu tapus yi tunda, mahimu yi siya asawan-un.

¹⁴ Dapat nu sa uryan unman yi siya may gana sa babayi, kailangan pasnuan niya kay gustu una naan tabug. Balaw yi siya puwidi ipabili ngatay buwatun suruguun dahil inuya yi niya siya.

Ti Karampatan manga Panganay

¹⁵ “Halimbawa may usa ka tawu duwa kay asawa, pagmahalun niya ti usa dapat ti usa unman, ag may manga anak siya sa kanda duwa. Nangus kay panganay pag lalaki anak sa kay asawa balaw niya pagmahalun,

¹⁶ nu hurayun yi ngani niya kay kasiyunan sa kay manga anak, kailangan ti huray para sa kay panganay pag anak balaw niya iayaw sa anak niya pagmahalun pag asawa. Kailangan iayaw gid niya inda sa panganay una balaw niya pagmahalun kay ina.

¹⁷ Kailangan kilalahun niya kay panganay pag anak sa balaw pagmahalun niya pag asawa. Ag iayaw niya sa kanya ti dubli pag huray niya kasiyunan dahil siya ti un-an iinanak ag may karampatan siya tumanggap kay bahagi bilang panganay pag anak.

Ti Balaw Masurundun pag Anak

¹⁸ “Nangus ti usa ka tawu may anak lalaki maganit kay ulu ag malaban, unman magsunud sa kay manga gurang una pagtamyawun siya,

¹⁹ inda pag anak darahun niya manga gurang sa manga manugpamahala ati sa puwirtahan banwa.

²⁰ Sumabi sida sa manga manugpamahala, ‘Inda pag anak nimi maganit kay ulu ag malaban; unman siya magsunud sa kanmi. Maragastus siya ag maralangu.’

²¹ Kailangan bintukun siya tanan mag-uli sa banwa tugka sa mamatay. Kailangan duraun niyu inda pag kadautan sa kanyu. Nu maalaman inda tanan manga taga Israil, madala sida.

Ti Iba waya pag manga Kasuguan

²² “Nu ti usa ka tawu pinarusahan kamatayan dahil sa kay nabwat kasalanan, bag-u ibinitin sa kayu kay bangkay,

²³ kailangan danga maabutan surip ti bangkay ati sa kayu. Kailangan ilbung niyu inda sa tunda diman pag sirang, dahil una si unu ti ibinitin sa kayu sinaadan Diyus. Danga niyu pag-uringi ti pag-ipakaun Panginuun niyu Diyus pag daga sa kanyu bilang mana niyu.