Diyuturunumiyu 20 - Hanunuu

Ti manga Kasuguan tungkul sa Maggira

¹ “Nu maglakaw kamu hampay manggira sa kanyu manga kalaban, ag mag-akitan niyu kanda manga kabayu, manga kalisa hanggan manga sundalu mas mayamu waya kaysa kanyu, danga kamu magkadala sa kanda, dahil kaibahan niyu ti Panginuun niyu Diyus ti nagpalwas sa kanyu sa Ihiptu.

² Bag-u kamu mag-atag sa gira, kailangan pumakarani dapu ti manughandug sa atubangan manga sundalu ag sumabi,

³ ‘Pagpatingi kamu, manga nasakupan Israil! Danga kamu magkadala sa kanyu maggira taynguna pag sirang. Pagmatutum kamu ag danga kamu magkataranta.

⁴ Dahil ti Panginuun niyu Diyus mag-iba sa kanyu! Girahun niya sida para sa kanyu ag papanaluhun niya kamu!’

⁵ “Bag-u sumabi ti manga takinan sa manga sundalu, ‘Nu may imaw sa kanyu bag-u lang nakapatindug kay balay ag unman waya niya inda naidarangin sa Panginuun, pag-uli siya barang mamatay siya sa girahan ag iba pag tawu ti pumadarangin sa kay balay.

⁶ Nu may imaw sa kanyu nakatanum ubas ag unman waya siya nakakinabang kay burak inda, pag-uli siya barang mamatay siya sa girahan ag iba pag tawu ti mamakinabang inda.

⁷ Nu may imaw sa kanyu kalasalun, pag uli siya barang mamatay siya sa girahan ag iba pag tawu ti makaasawa sa kay arasawan-un.’

⁸ “Sumabi waya gid ti manga takinan, ‘Nu may imaw sa kanyu nadala ngatay pagkulbaan, pag-uli siya barang hanggan kay manga kaibahan makulbaan waydi.’

⁹ Nu matapus yi manga takinan kanda magbagaw sa manga sundalu, pagpili sida manga kumandir hampay pumangulu sa manga sundalu.

¹⁰ “Nu mandugma kamu sa usa ka banwa, pakan-i dapu niyu panahun sumuku ti manga mag-uli siyun.

¹¹ Nu sumuku sida ag bukasan nida para sa kanyu ti puwirtahan nida banwa, buwatun niyu sida tanan manga suruguun ag patarabahuun niyu sida para sa kanyu sa gustu man nida ngatay unman.

¹² Dapat nu unman gid sida sumuku bagkus ngap lumaban gid sida sa kanyu, giraha niyu sida.

¹³ Nu ipabahala yi sida Panginuun niyu Diyus sa kanyu, matya niyu ti tanan nida manga lalaki.

¹⁴ Dapat mahimu niyu bihagun ti manga babayi, ti manga anak, hanggan ti manga hayup, ag mahimu niyu bul-un ti tanan pag kasiyunan sa tunda pag banwa. Gamita niyu inda pag manga bagay ti ipinakaun sa kanyu Panginuun niyu Diyus ginan sa kanyu manga kalaban.

¹⁵ Buwatun lang niyu inda sa manga banwa arayu ag balaw bahagi sa daga sakupun niyu.

¹⁶ Kailangan niyu matyun ti tanan tawu sa manga banwa pag-ipakaun Panginuun niyu Diyus sa kanyu bilang kanyu mana.

¹⁷ Rurisun niyu ti tanan manga Hitiyu, Amuriyu, Kananiyu, Pirisiyu, Hibiyu ag Hibusiyu angay sa pag-isugu Panginuun niyu Diyus.

¹⁸ Dahil nu unman, tudluan nida kamu sa tanan mayagting pag manga buruwatun kanda pagbuwatun sa kanda pagsamba sa kanda manga diyus, ag dahil siyun magkasala kamu sa Panginuun niyu Diyus.

¹⁹ Nu madugay kanyu maggira sa usa ka banwa, danga niyu pagpukana kay manga kayu magburak. Kan-un niyu kay manga burak, dapat danga niyu pagpukana. Dahil balaw sida manga kalaban niyu kanyu rurisun.

²⁰ Dapat mahimu niyu pukanun ti manga kayu unman may burak hanggan ti manga may burak dapat balaw mahimu karan-unun, bag-u gamitun niyu inda sa kanyu pagsakup sa banwa tugka sa masakup niyu inda.