Diyuturunumiyu 2 - Hanunuu

Ti Pagpanlakawun sa Pangawakawaan

¹ “Bag-u nagbalik kita atag sa pangawakawaan atabug sa Dagat Marara, angay sa pag-isugu Panginuun sa kangku. Bag-u dugay pag panahun, nagpalibut-libut kita sa kabantudan Siir.

² Magkun sa kangku ti Panginuun,

³ ‘Dugay yi kamu magpalibut-libut sa inda pag kabantudan. Taynguna, pumarargu kamu tabug sa kanaway.

⁴ Sabihun nimu sa manga tawu: Lumakaw kamu sa sakup niyu katawuhan manga linahi ni Isaw, mag-ulian sa Siir. Madala sida sa kanyu, dapat ay pag-aman kamu sa kanda.

⁵ Danga niyu paglabuta sida, dahil ipinakaun yi niku sa kanda ti manga kabantudan Siir bilang kanda magkaapu, ag balaw niku kamu ayawan una lang diit pag bahagi nida daga.

⁶ Bayadan niyu pilak ti ginan sa kanda pag karan-unun hanggan irinmun.

⁷ Alalahana niyu nu kabitay niku kamu pinapaladan sa tanan-tanan pag binwat niyu. Aku, ti Panginuun niyu Diyus, ti nagbantay sa kanyu maglakaw sa maluang pag pangawakawaan sa sulud upatpulu ka timpu. Inibahan niku kamu, bag-u balaw kamu kinurang sa kanyu kailangan pag manga bagay.’

⁸ “Nakan linmakaw kita sa kanta manga katawuhan manga linahi ni Isaw, mag-ulian sa Siir. Balaw kita linmakaw sa dalan Karatagan Hurdan, ginan sa manga banwa Ilat ag Isyun Gibir. Pagka maglakaw yi kita sa dalan sa pangawakawaan Muab,

⁹ magkun sa kangku ti Panginuun, ‘Danga niyu pagguluha ngatay pagdugmaa ti manga Muabita kay manga linahi ni Lut, dahil ipinakaun yi niku sa kanda ti Ar hampay ulianan nida, ag balaw niku kamu ayawan una lang diit pag bahagi nida daga.’ ”

¹⁰ (Sa kabag-u, mag-uli sa Ar ti mayamu ag marabisug pag manga tawu kay ngaran Imita. Arabwat sida parihu sa manga linahi ni Anak.

¹¹ Pag-ingarnan diman sida Ripaimiyu, parihu sa manga linahi ni Anak, dapat ay pag-ingarnan diman sida Imita manga Muabita.

¹² Sa Siir kaybi pag mag-uli ti manga Huriyu, dapat ay pinaighit sida manga linahi ni Isaw, bag-u sida yi ti nangulian ati, parihu sa binuwat manga Israilita sa manga Kananiyu sa daga ipinakaun Panginuun sa kanda.)

¹³ “Bag-u magkun ti Panginuun pagdipay yi kita sa Luung Sirid, nakan ngani nandipay kita.

¹⁴ Nangyari inda pagkalawuy manga 38 ka timpu ginan kaybi kanta nag-ighit sa Kadis Barnia. Sa ati katpung pag manga udas, nagkaramatay ti manga sundalu Israilita sa tunda pag sinulput tawu, angay sa saad Panginuun sa kanda.

¹⁵ Pinarusahan sida Panginuun tugka sa natabu sida namatay sa kampu.

¹⁶ “Igu nagkaramatay yi ti tanan sundalu,

¹⁷ magkun sa kangku ti Panginuun,

¹⁸ ‘Kainda pag sirang, pagdipay kamu sa katugkaan Muab sa Ar.

¹⁹ Nu makaras-ug yi kamu sa manga Amunita, pag manga linahi ni Lut, danga niyu sida pagguluha ngatay pagdugmaa, dahil inayaw yi niku sa kanda ati pag daga, ag balaw niku kamu ayawan una lang diit pag bahagi nida daga.’

²⁰ “Tunda pag daga kaybi kilala diman daga manga Ripaimiyu, dapat iningarnan sida Samsumiyu manga Amunita.

²¹ Subra mayamu sida ag marabaskug, bag-u arabwat parihu sa manga lahi ni Anak. Dapat ay ipinadamhak sida Panginuun sa manga Amunita. Pinaighit sida manga Amunita bag-u inulianan kanda daga.

²² Katunda diman ti pag-awat Panginuun sa manga linahi ni Isaw mag-uli sa Siir. Dahil ipinadamhak Panginuun sa kanda ti manga Huriyu hampay sida makapangulian sa tunda pag daga. Tugka kainda, mag-ulian di sida sa ati pag daga.

²³ Katunda diman ti nangyari igu dinugma taga Kaptur ti manga Abim mag-ulian sa manga baryu Gasa. Rinuris nida ti manga taga Abim bag-u inulianan nida tunda pag daga.

²⁴ “Pagkatapus, magkun ti Panginuun, ‘Kainda, pagdipay yi kamu sa Luung Arnun. Pag-ipakaun niku sa kanyu si Hari Sihun usa ka Amuriyu, taga Hisbun, hanggan kay daga. Giraha niyu siya bag-u apua kay daga.

²⁵ Taynguna ginan pag sirang, ipahintulut niku madala sa kanyu ti tanan nasyun sa buu kalibutan. Takigan sa dala ti makadnug tungkul sa kanyu.’

Natalu si Hari Sihun Taga Hisbun

²⁶ “Nakan ngani katpung ati kita kaybi sa pangawakawaan Kidimut, nagpasugu aku manga manugpadakit sa kan Hari Sihun taga Hisbun hampay sabihun sa kanya ti barita para sa ikaayad nimi ugnayan. Magkun aku,

²⁷ ‘Nu mahimu lang, pasnui niyu kami lumawuy sa kanyu sulud daga. Sa baklayan lang pag dalan kami pag lumakaw, balaw kami pasimang ginan sa dalan.

²⁸ Bayadan di nimi kanmi makaun hanggan mainum. Ti kanmi lang gustu sabihun sa kanyu, pasnui niyu kami lumawuy sa kanyu daga

²⁹ parihu sa binwat manga linahi ni Isaw magpangulian sa Siir hanggan manga Muabita magpangulian sa Ar. Pasnui niyu kami tugka sa makadipay kami sa Sapa Hurdan atabug sa daga pag-iayaw Panginuun nimi Diyus sa kanmi.’

³⁰ Dapat ay unman nagpasnu si Hari Sihun taga Hisbun kuntay palawuyun kita dahil pinaganit Panginuun niyu Diyus kay tagipusuun hampay iayaw niya siya sa kanta manga kamang, parihu sa kay binuwat niya kainda.

³¹ “Igu dugay, magkun ti Panginuun sa kangku, ‘Inumpisahan yi niku ipakaun sa kanyu si Sihun hanggan kay daga; nakan ngani umpisahi yi niyu ti paggira bag-u apua kay daga.’

³² “Pagka maglaban sa kanta si Sihun hanggan ti tanan niya manga sundalu ati sa Yahas,

³³ ipinakaun siya Panginuun nita Diyus sa kanta ag minatay nita siya, kaibahan kay manga anak hanggan ti tanan niya manga sundalu.

³⁴ Sa ati katpung pag udas, sinakup nita ti tanan niya banwa ag rinuris sida lubus — manga lalaki, manga babayi hanggan ti manga anak. Unman gid kita may sinawadan buhi sa kanda.

³⁵ Dinara nita kanda manga hayup hanggan ti manga nab-ul nita pag kasiyunan ginan sa kanda manga banwa.

³⁶ “Inawatan kita Panginuun nita Diyus sa kanta nag-agaw Aruwir sa saruy Luung Arnun hanggan sa manga sangput luung pag banwa, hanggan manga rugar tugka sa Gilyad. Unman may banwa mapag-un kay manga alad batu ti unman nita nakaya naslud.

³⁷ Dapat angay sa isinugu Panginuun nita Diyus sa kanta, balaw kita nagpakarani sa una naan pag daga manga Amunita, una sa Luung Habuk ngatay sa manga banwa sa sangput manga kabantudan.