Diyuturunumiyu 19 - Hanunuu

Ti manga Banwa Darangpan

¹ “Nu rurisun yi Panginuun niyu Diyus ti manga nasyun kanda daga ipakaun niya sa kanyu, ag nu mapalayas yi niyu sida ag ati yi kamu pag mag-uli sa kanda manga banwa ag manga balay,

² pagpili kamu tulu ka banwa darangpan sa pag-ipakaun Panginuun niyu Diyus pag daga kanyu apuun.

³ Huraya niyu sa tulu ka bahagi ti pag-ipakaun Panginuun niyu Diyus sa kanyu pag daga, may usa ka banwa darangpan sa kada sakup banwa. Kaayada niyu ti manga dalan atag sa inda pag banwa, hampay una si unu ti nakamatay tawu makapalagiw sa usa sa inda pag manga banwa.

⁴ Nu ti usa ka tawu nakamatay sa kay kaparihu balaw niya tikis ag unman waydi may dumut, makapalagiw siya sa usa sa inda pag manga banwa darangpan ag unman may gumaraw sa kanya.

⁵ “Halimbawa, nag-atag ti usa ka tawu kaibahan kay kamalay sa kakayuhan mangayu, habang magpulud siya kayu kadaka lang nalapsu ti urup wasay ag nasakpan kay kamalay ag namatay. Mahimu siya makapalagiw sa usa sa inda pag manga banwa darangpan ag unman may gumaraw sa kanya ati.

⁶ Nu usa lang ti darangpan pag banwa barang arayu inda para sa tawu nakamatay, ag bukadun siya tawu magkaibug bumalus sa kanya, ag mamatay siya. Balaw siya kailangan matyun dahil nakamatay siya balaw tikis ag unman diman may dumut.

⁷ Inda ti dahilan nu hayga pagsuguun niku kamu pagpili tulu ka banwa darangpan.

⁸ “Padakaun Panginuun niyu Diyus kanyu sakup pag daga angay sa kay itinaratu sa kanyu manga ginurang, ag maapu yi niyu ti buu daga kay itinaratu sa kanda.

⁹ Buwatun inda Panginuun niyu Diyus nu tupadun niyu mayad inda tanan pag sugu ti pag-isugu niku sa kanyu kainda, mahala niyu ti Panginuun niyu Diyus ag mangabuhi kamu pirmi angay sa kay manga kagustuhan. Nu dumaka yi kanyu daga, dumugang kamu tulu waya ka banwa darangpan.

¹⁰ Dugangi niyu ti banwa darangpan hampay balaw may tawu unman nagsalan ti mamatay sa kanyu daga, ti pag-ipakaun sa kanyu Panginuun niyu Diyus bilang mana, ag hampay balaw kamu may saragtun nu may mamatay unman may salan pag tawu.

¹¹ “Dapat nu may usa ka tawu magkagalit sa kay kaparihu bag-u kay hinarangan ag minatay, pagkatapus rargu siya nalagiw sa usa sa manga banwa darangpan,

¹² kailangan ipabuul siya manga manugpamahala sa kay banwa ag ipabahala sa magkaibug gumanti sa kanya hampay matyun siya.

¹³ Danga niyu siya pagkaawai. Kailangan duraun niyu sa Israil ti pagpamatay sa manga unman may salan pag manga tawu hampay mayad kanyu kahamtangan.

Tungkul sa Tab-anan Daga

¹⁴ “Nu rumas-ug kamu sa kanyu apuun pag daga, ti pag-ipakaun Panginuun niyu Diyus sa kanyu, danga pag-agawa ti daga nimu kaparihu sa panab-anan paghalin muhun sa daga ti ipinauli niyu manga ginurang.

Ti manga Kastigus

¹⁵ “Danga niyu pagsintinsiyahi ti usa ka tawu kuntay nagsalan dahil lang sa pagsabihun usa ka kastigus. Kailangan may duwa ngatay tulu ka kastigus ti magpatutuu kuntay nagkasala ti usa ka tawu.

¹⁶ Nu ti usa ka kastigus mamudil sa husgadu ag manpatutuu kuntay nagkasala ti usa ka tawu,

¹⁷ sida duwa patindugun sa atubangan Panginuun, sa atubangan manga manughandug ag sa manga manughusay magsirbi sa tunda pag udas.

¹⁸ Kailangan bistahun gid inda kaayad manga manughusay. Ag nu napatutuuhanan magpamudil ti kastigus sa panab-anan magbangdan sa kay kaparihu,

¹⁹ kailangan parusahan siya parusa para mana sa namangdan. Kailangan duraun niyu inda pag kadautan sa kanyu.

²⁰ Ti makadnug tungkul sa siyun madala gid ag balaw yi umuman bumuwat katunda pag daut buwat.

²¹ Kailangan danga kamu mamakakit kanyu pangaawa. Nu minatay usa ka tawu kay kaparihu, kailangan matyun waydi siya. Nu binuta niya, kailangan butaun waydi siya. Nu rinungaban niya, kailangan rungaban waydi siya. Nu binarian niya kamang ngatay lulud, kailangan barian diman kamang ngatay lulud siya.