Diyuturunumiyu 18 - Hanunuu

Ti Bahagi Panagda sa manga Manug-asiwa Balay Diyus ag sa manga Libita

¹ “Ti manga manughandug Balay Diyus ginan sa lahi ni Libi ag iba waya pag manga sakup lahi Libita, unman may minana daga sa linahi Israil. Kumaun lang sida sa panab-anan manga handug pag-ihandug sa Panginuun, dahil inda kanda mana.

² Unman sida may manahun daga parihu sa kanda kaparihu manga Israilita; ti Panginuun imaw ti kanda mana angay sa kay itinaratu sa kanda.

³ “Inda ti manga bahagi para sa manga manughandug Balay Diyus ginan sa manga baka ngatay karanidu pag handug manga tawu: ti labay, ti sulang ag ti tiyan.

⁴ Iayaw diman niyu sa manga manughandug Balay Diyus ti un-an pag bahagi niyu manga tirigu, irinmun ubas, lana ulibu ag bulbul karanidu.

⁵ Dahil sa tanan linahi Israil, sida hanggan kanda manga katawuhan imaw ti pinili Panginuun niyu Diyus sumirbi sa kanya hanggan waya aban.

⁶ “Una si unu pag Libita ti mag-uli una naan pag banwa sa Israil mahimu di makaatag sa daga piliun Panginuun,

⁷ ag sumirbi siya ati sa Panginuun niya Diyus, parihu sa kay kaparihu manga Libita magsirbi ati sa atubangan Panginuun.

⁸ Makatanggap diman siya kay bahagi manga handug una may imaw siya pagtanggapun ginan sa iba niya karabuhian.

Ti Daut pag manga Ugali

⁹ “Nu makaslud yi ngani kamu sa daga pag-ipakaun sa kanyu Panginuun niyu Diyus, danga niyu pagbuwata ti pinakadaut pag manga ulugaliun manga mag-uli ati.

^10-11 Kailangan unman may una di usa sa kanyu ti magsunug kay anak bilang handug. Ag danga diman kamu maghula, magtultul kahulugan manga tanda, maghiri, magsalumangka, magbuwat manga buruwatun manga pandaniwan ngatay tihulan ag magpaingana sa karadwa manga namatay.

¹² Una si unu ti bumuwat inda pag manga bagay bugyahan Panginuun. Inda ngani kay dahilan nu hayga palayasun Panginuun niyu Diyus inda pag manga nasyun sa kanyu atubangan.

¹³ Kailangan unman may ikasabi sa kanyu ti Panginuun niyu Diyus.

Ti manga Purupita

¹⁴ “Inda pag manga nasyun ti kanyu palayasun magpaawat sa manga manughula ngatay sa manga manugdaniw. Dapat kamu, pag-irangan Panginuun niyu Diyus sa pagbuwat inda.

¹⁵ Bagkus ngap, pumadara sa kanyu ti Panginuun niyu Diyus usa ka purupita parihu sa kangku, kadugu niyu. Kailangan patingihan niyu siya.

¹⁶ Dahil imaw inda kanyu hinagad sa Panginuun niyu Diyus katpung nagtipun kamu ati sa Hurib. Nagbagaw kamu, ‘Danga yi kami pagpadnugi busis Panginuun nita Diyus, ngatay ipakakit sa kay maglabdaban apuy dahil barang magkaramatay kami.’

¹⁷ “Nakan magkun ti Panginuun sa kangku, ‘Mayad kanda paghagadun.

¹⁸ Mamadara aku sa kanda usa ka purupita parihu sa kanmu, kadugu niyu. Ipatultul niku sa kanya ti tanan niku gustu sabihun sa kanda.

¹⁹ Parusahan niku una si unu ti unman maniwala sa kang manga bagaw pagbagawun purupita sa panab-anan niku ngaran.

²⁰ Ag kailangan matyun una si unu pag purupita ti mamagaw sa panab-anan niku ngaran balaw niku pagsuguun ngatay mamagaw siya sa ngaran iba pag manga diyus.’

²¹ “Barang mamaingana kamu, ‘Kabitay nimi maalaman nu ungud tunda yi ngani ti tultulanun Panginuun?’

²² Nu ti pagbagawun purupita sa ngaran Panginuun balaw mangyari ngatay matupad, inda pag tultulanun balaw sa Panginuun. Buwat-buwat lang purupita tunda, nakan danga kamu magkadala sa kanya.