Diyuturunumiyu 17 - Hanunuu

¹ “Danga kamu maghandug baka ngatay karanidu may sakit tabug sa Panginuun niyu Diyus, dahil daut masyadu inda sa kanya.

² “Halimbawa ti usa ka lalaki ngatay babayi mag-uli sa usa sa manga banwa pag-ipakaun sa kanyu Panginuun natakdan magbuwat daut sa magbantay Panginuun niyu Diyus. Naglabag siya sa kasunduan Panginuun

³ ag naglaban sa sugu sa panab-anan pagsamba sa tuhay pag diyus, ngatay sa init, ngatay sa bulan, ngatay sa manga pamgasan.

⁴ Nu masaydan niyu inda, kailangan pag paingan-un niyu inda kaayad. Nu ngatay ungud tutuu gid waydi binwat inda pag daut sa Israil,

⁵ daraha niyu sa sabian niyu banwa inda pag tawu ti nagbuwat daut ag bintukun tugka sa mamatay.

⁶ Mahimu matyun ti tawu nu napatutuuhanan nagkasala siya sa panab-anan pagsabi duwa ngatay tulu ka kastigus, dapat nu usa lang ka kastigus balaw siya mahimu matyun.

⁷ Ti manga kastigus imaw ti un-an bumintuk sa kanya, bag-u di ti tanan tawu umawat. Kailangan niyu duraun inda pag kadautan sa kanyu.

⁸ “Halimbawa may manga kasaba sa kanyu hurusayan tungkul sa nanmatay, pag-arawayan ngatay sinaktan masyadu makuri pasyahan. Ti buwatun niyu, darahun niyu tunda pag kasaba sa rugar piliun Panginuun niyu Diyus

⁹ nu naan ti manga manughandug Balay Diyus ginan sa lahi ni Libi ag ti manughusay magsirbi sa tunda pag udas ti dumisisyun sa tunda pag kasaba.

¹⁰ Kailangan tanggapun niyu kanda manga pasya siyun pag rugar sa pinili Panginuun. Sunda gid niyu ti tanan nida pagsabihun sa kanyu.

¹¹ Nu hintay kanda pasya angay sa kasuguan, kailangan tupadun niyu. Danga niyu paglabaga kanda pagsabihun sa kanyu.

¹² Ti unman magtanggap sa pasya manughusay pag tawu ngatay sa manughandug Balay Diyus magsirbi sa tunda pag udas sa Panginuun niyu Diyus kailangan matyun. Kailangan duraun niyu inda pag kadautan sa Israil.

¹³ Nu masaydan inda tanan tawu, madala sida ag balaw yi umuman lumabag.

Ti manga Hari

¹⁴ “Nu makasulud yi kamu sa daga pag-ipakaun sa kanyu Panginuun niyu Diyus ag maapu yi niyu inda, ag ati yi kamu pag mag-uli, mahimu sumabi kamu, ‘Mamili kita hari pumangulu sa kanta, parihu sa manga nasyun sa sangput nita.’

¹⁵ Pihua gid ti piliun niyu pag hari imaw ti tawu pinili Panginuun niyu Diyus, ag kailangan kaparihu niyu Israilita. Danga kamu magpili sa bukun Israilita.

¹⁶ Kanyu hari balaw mahimu manipun mayamu pag manga kabayu, ag balaw niya ipaatag kay manga tawu sa Ihiptu hampay mamili manga kabayu, dahil ti Panginuun niyu Diyus nagsabi sa kanyu danga yi gid kamu magbalik atabug.

¹⁷ Unman mahimu mayamu kay asawa dahil barang tumalang siya gin sa Panginuun. Ag balaw dapat siya mag-apu sa mayamu pag pilak ag gintu.

¹⁸ “Nu magtukaw siya sa tukawan hari bilang hari, kailangan kupyahun niya inda pag manga kasuguan para sa kay sadili sa atubangan manga manughandug Balay Diyus, manga lahi ni Libi.

¹⁹ Kailangan niya isaisip inda ag basahun pirmi sa buu niya buhi hampay dumunung siya maggalang sa Panginuun niya Diyus ag sundun niya mayad ti tanan pagsabihun sa inda pag manga kasuguan ag surundanun.

²⁰ Sa panab-anan diman pirmi pag pagbasa, maamanan niya ti pagpadayaw-dayaw kuntay mas mayad siya kaysa kay kaparihu manga Israilita, ag makaaman siya sa paglabag sa manga sugu Panginuun. Nu sundun niya tanan inda, siya hanggan kay manga lahi humari dugay sa Israil.