Diyuturunumiyu 16 - Hanunuu

Ti Pista Pag-alaala sa Karibrihan

¹ “Alalahana niyu ti Pista Pag-alaala sa Karibrihan sa bulan Abib bilang pagkilala sa Panginuun niyu Diyus, dahil sa tunda pag bulan ipinaluwas niya kamu yabi sa Ihiptu.

² Paghandug kamu karanidu ngatay baka bilang pag-alaala sa Pista Pag-alaala sa Karibrihan. Ihandug niyu inda para sa Panginuun niyu Diyus ati sa kay piliun pag rugar nu naan pagdayawun siya.

³ Kan-un niyu inda kaibahan ti tinapay unman may pamadaka. Sa sulud pitu ka sirang magkaun kamu tinapay unman may pamadaka parihu sa kanyu binuwat pagka kamu mag-apura mighit ginan sa Ihiptu. Kan-a niyu inda pag tinapay tanda sa kanyu manga pag-agwantahun, hampay maalaala niyu sa buu niyu buhi ti udas nagluwas kamu sa Ihiptu.

⁴ Kailangan unman may makitan pamadaka tinapay sa kanyu manga balay sa buu nasyun sa sulud pitu ka sirang. Ag kailangan ti taguban pag ihandug sa maghugut marukirum sa un-an pag sirang danga may sawad igu surip.

⁵ “Ti ihandug niyu pag hayup bilang pag-alaala sa Pista Pag-alaala sa Karibrihan danga niyu pagsagdahan una naan pag banwa ti ipinakaun sa kanyu Panginuun niyu Diyus,

⁶ nu unman sa piliun lang niya pag rugar nu naan pagdayawun siya. Kailangan ihandug niyu inda sa pagsangday init, ti udas niyu pag-ighit ginan sa Ihiptu.

⁷ Tamaa niyu inda ag kan-un sa daga piliun Panginuun niyu Diyus. Sa magkasurip, pagbalik kamu sa kanyu turda.

⁸ Sa sulud unum ka sirang, pagkaun kamu tinapay unman may pamadaka. Ag sa ikapitu pag sirang, danga kamu magtarabahu, bagkus ngap pagtiripun kamu sa pagsamba sa Panginuun niyu Diyus.

Ti Pista Tig-arani

⁹ “Pagbilang kamu pitu ka duminggu ginan sa umpisa tig-arani.

¹⁰ Bag-u alalahanun niyu ti Pista Tig-arani sa pagdayaw sa Panginuun niyu Diyus sa panab-anan niyu buluntad pag manga handug angay sa manga papalad kanyu natanggap ginan sa Panginuun niyu Diyus.

¹¹ Ag pagbarayaan kamu sa atubangan Panginuun niyu Diyus sa rugar kay piliun nu naan pagdayawun siya. Pag-alaala kamu kaibahan kanyu manga anak, manga suruguun, manga Libita mag-uli sa kanyu banwa, manga balaw Israilita, manga ilu ag manga buranday pag babayi mag-uli sa kanyu banwa.

¹² Isipun niyu kamu manga suruguun diman kaybi sa Ihiptu, nakan sunda niyu kaayad inda pag manga surundanun.

Ti Pista Pagpatindug manga Payag

¹³ “Alalahana niyu ti Pista Pagpatindug manga Payag sa sulud pitu ka sirang sa katapusan tig-arani, matapus niyu magiuk ti manga tirigu ag mapigis ti manga ubas.

¹⁴ Pagbaya kamu sa pag-alaala sa inda pag pista kaibahan kanyu manga anak, manga suruguun, manga Libita, manga balaw Israilita, manga ilu ag manga buranday pag babayi mag-uli sa kanyu banwa.

¹⁵ Sa sulud pitu ka sirang pag-alalahanun niyu inda pag Pista pagdayaw sa Panginuun niyu Diyus sa rugar kay piliun. Dahil papaladan Panginuun niyu Diyus ti tanan niyu ani hanggan ti tanan niyu pagbuwatun, ag paglubus gid kanyu kabayaan.

^16-17 “Kada timpu, ti tanan niyu lalaki kailangan magluwang sa inda pag tulu ka pista: ti Pista sa Tinapay Unman may Pamadaka, ti Pista Tig-arani, ag ti Pista sa Pagbuwat manga Payag. Ti kada usa sa kanda pag-atag sa atubangan Panginuun niyu Diyus ati sa rugar kay piliun, ag kailangan magdara sida manga handug sa Panginuun sa kanda makayahan, angay sa ipinakaun pag papalad Panginuun niyu Diyus sa kanda.

Ti manga Manughusay

¹⁸ “Pagpauli kamu manga manughusay hanggan manga takinan sa kada niyu lahi sa tanan banwa pag-ipakaun sa kanyu Panginuun niyu Diyus. Sida ti manhusay sa manga nasakupan sa balaw may pagpalabihun.

¹⁹ Kailangan danga nida paglubaga ti matarung ag kailangan balaw sida may pagkampihan sa pagsintinsiya. Danga sida magtanggap suhul dahil ti suhul makabuta sa madunung hanggan sa matadlung, ag makapasalan sa kanda magpasya.

²⁰ Kailangan manalu ti matarung hampay lumawig kanyu buhi ag makapamahala sa pag-ipakaun sa kanyu pag daga Panginuun niyu Diyus.

Ti Pagsamba sa Tuhay pag Diyus

²¹ “Danga kamu magpatindug tulduk tanda diyusa si Asira sa katpadan niyu binwat harandugan para sa Panginuun niyu Diyus,

²² ag danga kamu magpatindug aramirawan pag batu hampay sambahun, dahil pagkadat-an tunda Panginuun niyu Diyus.”