Diyuturunumiyu 15 - Hanunuu

Ti Timpu Pagpatawad Utang

¹ “Sa katapusan kada ikapitu pag timpu, kailangan patawadun niyu ti tanan may utang.

² Kaindaay kanyu buwatun: kailangan patawadun yi nagpautang ti utang sa kay kaparihu Israilita. Danga yi pagsukta dahil rinmas-ug yi ti itinagka Panginuun pag udas sa pagpatawad sa manga utang.

³ Mahimu niyu suktun ti manga balaw Israilita, dapat kailangan patawadun niyu ti utang sa kanyu kaparihu Israilita.

⁴ “Kailangan unman may pugri sa kanyu, dahil papaladan gid kamu Panginuun niyu Diyus sa daga pag-ipakaun niya sa kanyu, kanyu maapu.

⁵ Tunda nu tupadun niyu ti Panginuun niyu Diyus ag sundun mayad ti tanan sugu pag-ipakaun niku sa kanyu kainda.

⁶ Papaladan kamu Panginuun niyu Diyus angay sa kay itinaratu sa kanyu. Mayamu pag manga nasyun ti mangudam sa kanyu dapat kamu bay balaw mangudam. Pamahalaan niyu ti mayamu pag manga nasyun dapat kamu bay balaw pamahalaan.

⁷ “Nu may imaw gid waydi pugri sa kanyu manga banwa, sa daga pag-ipakaun Panginuun niyu Diyus sa kanyu, danga kamu makasadili sa kanda.

⁸ Bagkus ngap pag marapakaun kamu ag paudamun niyu sida sa kanda manga kailangan.

⁹ Danga kamu mag-isip daut, kuntay arani yi ti ikapitu pag timpu, ti timpu nu naan pag patawadun yi ti manga utang, balaw yi lang kamu manpautang sa kanyu kasimanwa pugri. Nu manhagad awat inda pag pugri tawu sa Panginuun dahil sa kanyu binuwat, may saragtun kamu.

¹⁰ Pag-ayaw kamu sa kanya sa buluntadan. Nu buwatun niyu inda papaladan kamu Panginuun niyu Diyus sa tanan niyu pagbuwatun.

¹¹ Balaw madura may manga pugri sa kanyu nasyun, nakan pagsuguun niku kamu pag mainawatun kamu sa kanda.

Ti Pagpalpas sa manga Panawuhun

¹² “Nu kanmu kaparihu Hibriyu, lalaki man ngatay babayi, ipagpabili sa kanmu bilang panawuhun, ag mansirbi siya sa kanmu sa sulud unum ka timpu, kailangan palpasan nimu siya sa ikapitu pag timpu.

¹³ Ag nu palpasan yi nimu siya, danga siya pagpaulia unman may dara.

¹⁴ Ayawi nimu siya abunda pag manga hayup, tirigu, ag intus, angay sa ipinapalad Panginuun nimu Diyus sa kanmu.

¹⁵ Isipun niyu manga panawuhun diman kamu kaybi sa Ihiptu ag pinalpasan diman kamu Panginuun niyu Diyus. Imaw inda ti pag ipakaun niku pag sugu sa kanyu kainda.

¹⁶ “Dapat nu sumabi kanmu panawuhun sa kanmu, ‘Dayi aku umighit sa kanmu dahil mahal niku kawu ag kanmu magtal-anakan, ag mayad kang kahamtangan sitay sa kanyu,’

¹⁷ darahun nimu siya sa sabian, bag-u ipatangun kay tuli sa bakalan ag tuhuan, bag-u bumaliw panawuhun nimu siya sa buu niya buhi. Katunda diman ti buwatun nimu sa kanmu panawuhun babayi.

¹⁸ “Danga mabuyat kanmu tagipusuun nu palpasan nimu kanmu panawuhun dahil ti halaga sa kay nagsirbi sa kanmu sa sulud unum ka timpu dubli waya sa upa sa usa ka manugtarabahu. Nu buwatun nimu inda papaladan Panginuun niyu Diyus ti tanan nimu pagbuwatun.

Ti Panganay pag manga Hayup

¹⁹ “Ipablag niyu para sa Panginuun niyu Diyus ti tanan manga panganay lalaki sa kanyu manga hayup. Danga niyu pagtarabahuan ti manga panganay niyu manga baka ngatay uguyan ti manga panganay niyu manga karanidu.

²⁰ Bagkus ngap, kan-un niyu inda hanggan nimu magtal-anakan sa atubangan Panginuun niyu Diyus sa kay piliun pag rugar. Imaw inda kanyu buwatun kada timpu.

²¹ Dapat nu inda pag hayup may sakit, abi pilay ngatay buta ngatay iba waya pag dahilan, kailangan unman niyu inda ihandug sa Panginuun niyu Diyus.

²² Bagkus ngap, kan-un niyu inda sa kanyu manga banwa. Ti tanan mahimu kumaun inda, mauring man siya ngatay malumpiyu; parihu sa kanyu magkaun sa karasyaw ngatay gasila.

²³ Dapat kailangan unman niyu kan-un ti dugu, nu unman uyanga niyu sa daga parihu ga danum.”