Diyuturunumiyu 14 - Hanunuu

Ti manga Sugu tungkul sa Magpanruku sa Namatay

¹ “Manga anak kamu Panginuun niyu Diyus. Nakan nu manruku kamu sa namatay, danga niyu pagbiyagi kanyu sadili aw ngatay kidkidun kanyu tungud bangas.

² Dahil manga nasakupan kamu Panginuun niyu Diyus. Sa tanan tawu sa kalibutan, kamu kay pinili bukud tangi pag nasakupan.

Ti Malumpiyu ag Mauring pag Hayup

³ “Danga kamu magkaun una hintay pag hayup ti pagkilalan-un mauring.

⁴ Inda pag manga hayup ti mahimu niyu kan-un: baka, karanidu, kambing,

⁵ karasyaw, talun kambing, talun karanidu ag iba waya pag kalasi karasyaw.

⁶ Mahimu niyu kan-un una hintay pag hayup buka kay kuku ag magtimtima utru kay kinaun.

⁷ Dapat danga niyu pagkan-a ti manga hayup magtimtima utru kay kinaun dapat balaw buka kay kuku, parihu sa kamilyu, kunihu ag badyir. Inda pag manga hayup baliwa niyu mauring.

⁸ Danga diman kamu magkaun babuy, dahil una buka kay kuku balaw diman magtimtima utru kay kinaun. Danga kamu magkaun inda pag manga hayup ngatay mag-igpil sa kanda namatay pag bilug.

⁹ “Mahimu niyu kan-un una hintay ti magkabuhi sa danum may manga tarukuy hanggan manga siksik.

¹⁰ Dapat danga gid niyu pagkan-a ti balaw may tarukuy hanggan siksik. Baliwa niyu inda mauring.

¹¹ Mahimu niyu kan-un una hintay pag kalasi manuk pagkilalan-un malumpiyu.

^12-18 Dapat danga niyu kan-un ti manga agila, manga uwak, manuk magkaun bangkay tawu ngatay bangkay hayup, manga buyaw, manga bukaw, manga andurugmun, manga manuk magdagit isda, manga talabung, manga tagwak hanggan banug.

¹⁹ Danga diman kamu magkaun manga iyay may pakpak.

²⁰ Dapat mahimu niyu kan-un ti pagkilalan-un malumpiyu pag manga iyay maglayang.

²¹ “Danga niyu pagkan-a una hintay pag hayup namatay yi. Mahimu niyu inda iayaw ngatay ipabili sa manga day-uhan mag-uli sa kanyu manga banwa, ag kanda kan-un. Dapat kamu danga gid magkaun inda, dahil ipinablag kamu bilang nasakupan Panginuun niyu Diyus. “Danga niyu pagtamaa ti anak kambing sa gatas niya ina.

Ti Kanyu Ikasampu

²² “Pasamanan niyu ti ikasampulu sa tanan niyu pag ani sa kanyu tanman kada timpu.

²³ Daraha niyu ti ikasampulu pag bahagi tirigu, irinmun ubas, lana ulibu, hanggan ti panganay niyu manga hayup sa piliun Panginuun niyu Diyus pag rugar nu naan pag dayawun siya. Bag-u ati niyu pag kan-a sa kay atubangan. Buwatun niyu inda hampay maanad kamu magsunud pirmi sa Panginuun niyu Diyus.

²⁴ Dapat nu arayu sa kanyu tunda pag rugar ti piliun Panginuun, ag magkakurian kamu magdara manga ikasampulu manga papalad Panginuun niyu Diyus,

²⁵ balyuhan niyu kanyu ikasampulu sa pilak bag-u daraha niyu inda ati sa piliun Panginuun niyu Diyus pag rugar.

²⁶ Bag-u tunda pag pilak ibili niyu sa baka, karanidu, intus ubas ag iba waya pag irinmun, ngatay una hintay kanyu pagkaibgan. Bag-u kan-a niyu magtal-anakan inda sa atubangan Panginuun niyu Diyus ag pagbaya.

²⁷ Danga diman niyu pagkalimti ti manga Libita mag-uli sa kanyu manga banwa, dahil unman sida may minana daga.

²⁸ “Sa katapusan kada ikatlu pag timpu, tipuna niyu kanyu ikasampulu pag ani sa tunda pag timpu, ag daraha inda sa burutangan sa kanyu manga banwa.

²⁹ Iayaw niyu inda sa manga Libita (unman may minana daga), sa manga balaw Israilita, sa manga ilu, hanggan sa manga buranday pag babayi mag-ulian sa kanyu manga banwa hampay makakaun waydi sida ag mabsug. Nu buwatun niyu inda, papaladan kamu Panginuun niyu Diyus sa tanan niyu pagbuwatun.