Diyuturunumiyu 13 - Hanunuu

Pasandam Laban sa Pagsamba sa manga Diyus-diyusan

¹ “Nu may usa ka purupita ngatay manugtultul sa kahulugan tagin-up magpamuhun sa kanyu mamakakit siya manga makadululaw ag lilingutan pag manga bagay,

² ag nangyari kay sinabi, bag-u sumabi siya, ‘Sumunud kita sumamba sa iba pag manga diyus’ (ti manga balaw niyu kilala pag diyus),

³ danga kamu magpatingi sa kanya. Pagsubukan lang kamu Panginuun niyu Diyus nu ungud pagmahalun niyu siya buu niyu tagipusuun ag karadwa.

⁴ Ti Panginuun lang kanyu Diyus ti sundun niyu ag igalang. Sunda siya hanggan kay manga sugu; sirbihi niyu siya ag pagsa kanya gid kamu.

⁵ Matya tunda pag purupita ngatay manugtultul kahulugan tagin-up, dahil nagtudlu siya laban sa Panginuun niyu Diyus, ti nagpalwas sa kanyu sa Ihiptu hanggan nagribri sa kanyu sa pagkasuruguun. Inda pag tawu maggayak lang sa pagpakarayu sa kanyu sa manga palakaw pag-isugu Panginuun niyu Diyus kanyu sundun. Kailangan duraun niyu inda pag kadautan sa kanyu.

⁶ “Abi kanmu patar-ari ngatay anak, ngatay kanmu pinakamahal pag asawa ngatay kanmu suud kakilala, maggarya sa kanmu sa lihim ag sumabi, ‘Manimba kita sa tuhay pag diyus’ (manga diyus unman nimu magkakilala una sa kanmu manga ginurang),

⁷ nu akitun ngani kawu niya sa pagsamba sa inda pag manga diyus pagsambahun manga tawu sa kanyu sangput ngatay manga tawu ginan sa arayu pag daga,

⁸ danga kawu magpadara-dara ngatay magpaniwala sa kanya. Danga nimu siya pagkaawai ngatay pag-apini.

⁹ Kailangan matyun gid siya. Kawu ti un-an bumintuk mumatay sa kanya, bag-u di ti tanan tawu.

¹⁰ Bintuka siya tugka sa mamatay dahil ginayak niya ipakarayu kawu sa Panginuun nimu Diyus, ti nagpalwas sa kanmu sa Ihiptu nu naan kamu pag binwat panawuhun.

¹¹ Bag-u masaydan inda tanan Israilita ag madala sida, bag-u balaw yi sida bumuwat uman inda pag daut buruwatun.

¹² “Abi makabarita kamu ati sa usa sa manga banwa ti pag-ipakaun Panginuun niyu Diyus kanyu ulianan,

¹³ kuntay may daut pag manga tawu magpatalang sa manga mag-uli sa tunda pag banwa, magkun sida, ‘Mansamba kita sa iba pag diyus’ (ti manga unman niyu magkakilala pag diyus).

¹⁴ Kailangan paingan-un niyu kaayad nu tutuu inda. Ag nu ungud tutuu ngani nangyari inda pag balaw mayad pag buwat,

¹⁵ kailangan matyun gid niyu ti tanan mag-uli sa inda pag banwa hanggan kanda manga hayup. Rurisa niyu sida lubus bilang pinagkahandug niyu sa Diyus.

¹⁶ Tipuna niyu ti tanan niyu mab-ul sa tunda pag banwa ag tumpuka inda sa karaw-an palasa, ag rargu sunuga ti buu banwa bilang usa ka handug pag sunugun para sa Panginuun niyu Diyus. Inda pag banwa pumirmaminti daut una kapira; unman yi gid inda ipatindug uman.

¹⁷ Danga gid niyu pagtaguan ti una hintay pag manga bagay siyun ti itinagka yi wasakun lubus. Nu tupadun niyu inda tanan, duraun Panginuun kay masyadu pag pangagalit, ag kaawaan niya kamu. Ag sa kay pangaawa, payamuun niya kamu angay sa kay itinaratu sa kanyu manga ginurang.

¹⁸ Tupadun inda Panginuun niyu Diyus nu sundun niyu ti tanan niku pag-ipakaun sa kanyu pag sugu kainda, ag nu bumuwat kamu matadlung sa kay magbantay.