Diyuturunumiyu 12 - Hanunuu

Ti Usa ka Rugar Pagsambahan

¹ “Inda ti manga sugu hanggan manga surundanun kailangan niyu tupadun kaayad habang magkabuhi kamu atay sa daga pag-ipakaun sa kanyu Panginuun, ti Diyus niyu manga ginurang.

² Nu tabugun yi niyu ti manga mag-ulian ati pag manga tawu, pandauta niyu ti tanan rugar sarambahan nida sa kanda manga diyus-diyusan: sa manga babaw bantud hanggan sa manga tagudtud, ag sa sirung maraybung pag manga kayu.

³ Pandauta diman niyu kanda manga harandugan, runuta kanda aramirawan pag manga batu, pansunuga kanda manga tulduk tanda diyusa si Asira, ag pandauta ti tinawu-tawu nida pag manga diyus hampay malimtan yi inda sa siyun pag manga rugar.

⁴ “Danga niyu pagsambaha ti Panginuun niyu Diyus parihu sa kanda palakaw pagsamba,

⁵ bagkus ngap pagdangup kamu sa Panginuun niyu Diyus ag dayawa niyu siya sa piliun niya pag rugar ginan sa tanan sakup manga linahi Israil. Ati niyu pag sambaha ti Panginuun, dahil imaw tunda kay pinili pag rugar nu naan siya pagdayawun.

⁶ Ati niyu pag darahun kanyu manga handug pagsunugun ag iba waya pag manga handug, ti manga ikasampulu niyu, ti manga ipinablag niyu pag pamakaun, ti manga itinaratu niyu ihandug, ti buluntad niyu pag manga handug, hanggan ti panganay niyu pag manga hayup.

⁷ Ati kamu pag pagkaun hanggan kanyu magtal-anakan sa atubangan Panginuun niyu Diyus, ag pagbaya kamu sa tanan niyu binwat dahil pinapaladan kamu Panginuun.

⁸ “Danga yi niyu pagbuwata ti pag buwatun nita taynguna, una lang naan pag maghandug,

⁹ nu rumas-ug yi kamu sa rugar nu naan kamu pag makapahari. Inda pag daga pag-ipakaun Panginuun niyu Diyus sa kanyu bilang mana niyu.

¹⁰ Nu makadipay yi kamu sa Hurdan ag mag-uli sa daga pag-ipakaun Panginuun niyu Diyus sa kanyu bilang mana niyu, mangabuhi kamu may kahusayan dahil balaw pahintulutan Panginuun balagun kamu niyu manga kalaban sa kanyu kalibut.

¹¹ Bag-u darahun niyu kanyu manga handug ati sa piliun Panginuun niyu Diyus pag rugar nu naan pag dayawun siya. Inda pag manga handug ti pag-isugu niku sa kanyu: manga handug pagsunugun ag iba waya pag manga handug, hanggan kanyu ikasampulu, ag ti ipinablag pag manga pakaun, hanggan ti tanan pag pinakamayad pag handug kanyu itinaratu sa Panginuun.

¹² Ati kamu pag magbarayaan sa atubangan Panginuun niyu Diyus, kaibahan kanyu manga anak ag manga panawuhun, hanggan ti manga suruguun ag manga mag-ulian sa kanyu banwa pag manga Libita balaw may daga minana.

¹³ Danga gid pagsagdahan kanyu manga handug pagsunugun sa una naan pag rugar kanyu gustu.

¹⁴ Ihandug lang niyu inda sa piliun Panginuun pag rugar sa usa sa kanyu lahi, ag ati pagbuwata niyu ti tanan isinugu niku sa kanyu.

¹⁵ “Mahimu kamu makaiyaw ag makakaun hayup una naan pag daga. Pagkaun kamu kayamu taguban, parihu sa pagkaun niyu sa usa ka karasyaw ag gasila angay sa ipinakaun Panginuun niyu Diyus pag papalad sa kanyu. Ti kada tawu makakaun inda, una siya malumpiyu ngatay mayagting.

¹⁶ Dapat danga niyu pagkan-a kay dugu; uyanga niyu inda sa daga parihu ga danum.

¹⁷ Kailangan danga diman niyu pagkan-a sa kanyu manga banwa inda pag manga magkasunud-sunud: ti ikasampulu niyu ani, ti irinmun ubas ag lana ulibu, ti anak panganay niyu manga hayup, una hintay ti itinaratu ihandug hanggan manga pamakaun, hanggan ti buluntad niyu pag manga handug.

¹⁸ Kan-un lang niyu inda sa atubangan Panginuun niyu Diyus ati sa rugar kay piliun kaibahan kanyu manga anak, manga panawuhun, ag manga Libita mag-uli sa kanyu manga banwa. Magbarayaan kamu ati sa atubangan Panginuun niyu Diyus sa tanan niyu buruwatun.

¹⁹ Danga gid niyu pagpabay-ani ti manga Libita habang magkabuhi kamu sa kanyu daga.

²⁰ “Nu pinadaka yi Panginuun niyu Diyus kanyu sakup angay sa kay itinaratu sa kanyu, ag magkaibug kamu kumaun taguban, mahimu kamu kumaun una hintay pag udas kanyu gustu.

²¹ Nu arayu sa kanyu ti piliun Panginuun niyu Diyus pag rugar nu naan pag dayawun siya, mahimu kamu mag-iyaw kanyu manga baka, kambing, ngatay karanidu sa kanyu rugar. Ag angay sa kang pag-isugu sa kanyu, mahimu kamu magpakabusug sa pagkaun manga hayup ipinakaun Panginuun sa kanyu,

²² parihu sa magkaun niyu karasyaw ag gasila. Ti kada tawu makakaun inda, una malumpiyu siya ngatay mayagting.

²³ Basta pihuun lang niyu balaw niyu kan-un kay dugu, dahil sa dugu ti buhi. Danga niyu pagkan-a ti buhi kaibahan sa taguban.

²⁴ Bagkus ngap, uyanga niyu ti dugu sa daga parihu ga danum.

²⁵ Danga gid niyu inda pagkan-a hampay mayad kanyu kahamtangan hanggan kanyu manga lahi, dahil ti pag-aman sa magkaun dugu mayad sa magbantay Panginuun.

²⁶ “Daran-un niyu sa rugar piliun Panginuun kanyu banal pag manga handug hanggan kanyu manga itinaratu pag handug sa kanya.

²⁷ Handugan niyu ti dugu hanggan ti taguban niyu manga handug sa surunugan pag harandugan Panginuun niyu Diyus. Sa iba niyu pag manga handug kailangan diman ibuhus niyu ti dugu sa harandugan Panginuun niyu Diyus, dapat mahimu niyu kan-un ti taguban.

²⁸ Sunda gid niyu inda tanan pag surundanun ti pag-ipakaun niku sa kanyu, hampay pirmi mayad kanyu kahamtangan hanggan kanyu manga lahi tugka aban, dahil ti pagtupad inda mayad ag tama sa magbantay Panginuun niyu Diyus.

²⁹ “Nu ipadamhak yi Panginuun niyu Diyus ti salakayun niyu pag manga nasyun, palayasun niyu ti manga mag-ulian siyun ag agawun kanda rugar,

³⁰ pagdahan kamu hampay balaw kamu masduk sa panab-anan pagsunud sa kanda. Danga kamu mag-usisa tungkul sa kanda manga diyus. Danga kamu magsabi, ‘Kabitay sida magsirbi sa kanda manga diyus? Sundun diman waydi nita kanda pagbuwatun.’

³¹ Danga gid niyu pagbuwata inda sa kanyu magsamba sa Panginuun niyu Diyus, dahil sa kanda magsamba pagbuwatun nida ti tanan daut pag manga bagay pagkagalitan Panginuun. Pagsunugun diman nida kanda manga anak bilang handug sa kanda manga diyus.

³² “Sunda gid niyu ti tanan pag-isugu niku sa kanyu. Danga niyu inda pagdugangi ngatay pagbuhini.