Diyuturunumiyu 11 - Hanunuu

Mahala ag Sunda Niyu ti Diyus

¹ “Mahala niyu ti Panginuun niyu Diyus ag tupada kay manga sugu ag surundanun, hanggan palakaw ag kasuguan.

² Tandai niyu taynguna kanyu manga nalakawan pagtamyaw Panginuun niyu Diyus. Kamu ti nakasamit inda ag balaw kanyu manga anak. Unman sida nakakit sa kadayawan ag kamaskihan Panginuun,

³ hanggan sa manga makadululaw pag binuwat niya sa Ihiptu laban sa Paraun imaw ti hari Ihiptu, hanggan sa kay buu nasyun.

⁴ Unman diman waydi nida nakitan ti binuwat Panginuun sa taga Ihiptu pag manga sundalu hanggan sa kanda manga kabayu ag manga kalisa, nu kabitay sida ilinumus Panginuun sa Dagat Marara pagka binukad nida kamu. Nagkaramatay sida tanan.

⁵ Unman diman nakitan niyu manga anak ti binuwat Panginuun sa kanyu ati sa pangawakawaan tugka sa makaras-ug kamu sa inda pag rugar,

⁶ ag nu hintay kay binuwat sa kanda ni Datan ag ni Abiram, kay manga anak ni Ilyab kan Rubin pag lahi. Hinalun sida gil-ang daga, hanggan kanda magtal-anakan, una kanda manga turda, hanggan ti tanan kaibahan nida. Nangyari inda sa atubangan tanan Israilita.

⁷ Kamu gid ti nakakit inda pag manga makamaskihan pag binuwat Panginuun.

⁸ “Nakan sunda niyu ti tanan sugu kang pag-ipakaun sa kanyu taynguna hampay may kabisugan kamu sa pagpanlakawun hanggan sa pag-apu daga ati sa baliw dipay Hurdan.

⁹ Nu sumunud kamu, mabuhi kamu dugay ati sa marinu ag abunda pag daga, ti itinaratu Panginuun ipakaun sa kanyu manga ginurang hanggan sa kanda manga sinulput.

¹⁰ Dahil ti ulianan niyu pag daga balaw parihu sa daga Ihiptu sa kanyu gininanan. Ati sa Ihiptu, nu mantanum kamu, manbudlay waya kamu masyadu sa pagpadanum.

¹¹ Dapat ti maapu niyu pag daga may manga bantud ag manga ratag pirmi magkauranan.

¹² Inda pag daga pag alagaan Panginuun niyu Diyus; pagbantayan niya inda sirang-sirang sa buu timpu!

¹³ “Nakan nu tupadun lang niyu pirmi ti pag-ipakaun niku pag manga sugu sa kanyu kainda kuntay mahalun niyu ti Panginuun niyu Diyus ag sirbihan niyu buu tagipusuun ag buu karadwa,

¹⁴ padarahan niya kamu uran sa kang-ud pag udas hampay makaani kamu tirigu, irinmun ubas hanggan lana ulibu.

¹⁵ Pakan-an niya paraharaban kanyu manga hayup, ag kamu diman may abunda pag makaun.

¹⁶ “Pag-aman gid kamu barang matuksu kamu pumatlikud sa Diyus ag mansamba sa iba pag manga diyus ag sumirbi sa kanda.

¹⁷ Nu buwatun niyu inda, magalit ti Panginuun sa kanyu ag balaw yi niya pauranun hanggan udyi kamu umani, ag sa kadugayan madura kamu sa mayad pag daga ti ipakaun Panginuun sa kanyu.

¹⁸ Nakan itanum gid niyu sa kanyu tagipusuun ag alalahana inda kang manga bagaw. Ihigut niyu inda sa kanyu manga takyay ngatay ipauli sa kanyu manga bangas bilang tanda sa kanyu.

¹⁹ Tudluan pirmi inda sa kanyu manga anak. Hampangi niyu inda nu siyun kamu sa kanyu balay ag una sa kanyu maglakaw, una sa kanyu magpahari ag nu magbangun kamu.

²⁰ Isurat niyu inda sa manga bakalan sabian niyu balay ag sa manga sabian niyu manga banwa,

²¹ hampay kamu ag kanyu manga anak mabuhi kadugay ati sa daga itinaratu Panginuun iayaw sa kanyu manga ginurang. Mangulian kamu siyun habang may langit sa tungud kalibutan.

²² “Nu tupadun niyu inda mayad ti tanan pag-ipakaun niku pag manga sugu sa kanyu kuntay mahalun niyu ti Panginuun niyu Diyus ag mangabuhi angay sa kay kagustuhan ag pumirmaminti sa kanya,

²³ tabugun Panginuun ti manga tawu kanyu apuun pag daga una mas daraka ag makapangyarihan waya sida kaysa kanyu.

²⁴ Ti tanan matat-an niyu pag daga kanyu yi: ginan sa pangawakawaan atabug sa Libanun, bag-u ginan sa Sapa Iyupratis tugka sa Dagat Miditiranyu.

²⁵ Unman may makaampara sa kanyu. Angay sa itinaratu sa kanyu Panginuun niyu Diyus, madala sa kanyu ti manga tawu una naan pag rugar kanyu atagan sa tunda pag daga.

²⁶ “Pagpatingi kamu! Papiliun niku kamu kainda. Gustu aw niyu papaladan ngatay saadan?

²⁷ Papaladan kamu nu tupadun niyu ti manga sugu Panginuun niyu Diyus, ti pag-ipakaun niku sa kanyu kainda.

²⁸ Saadan kamu nu balaw niyu sundun inda pag manga sugu Panginuun niyu Diyus, ti pag-ipakaun niku sa kanyu kainda, hanggan nu mansamba sa iba pag manga diyus balaw niyu magkakilala.

²⁹ Nu darahun yi kamu Panginuun niyu Diyus sa daga kanyu apuun, iburayhaw niyu sa Bantud Girisim ti papalad bag-u ti sumpa iburayhaw niyu sa Bantud Ibal.

³⁰ Inda pag manga bantud baliwa sa isalpan Sapa Hurdan, sa daga manga Kananiyu mag-uli sa Karatagan Hurdan arani sa banwa Gilgal. Balaw inda arayu sa manga daka puun kayu Muri.

³¹ Mandipay yi kamu sa Hurdan hampay suldun ag apuun ti pag-ipakaun Panginuun niyu Diyus pag daga sa kanyu. Nu mab-ul yi niyu inda ag ati yi kamu pag mag-uli,

³² sunda gid niyu ti tanan pag-ipakaun niku pag manga sugu hanggan surundanun sa kanyu taynguna pag sirang.