Diyuturunumiyu 10 - Hanunuu

Ti Pangadwa pag Malapad pag manga Batu

¹ “Katpung sinabi sa kangku Panginuun, ‘Pagtapyas kawu duwa ka malapad pag manga batu parihu ga sitay sa kabag-u, bag-u pagtukad kawu sa kangku ati sa bantud. Panmuwat maan kawu kaban kayu.

² Isurat niku sa malapad pag manga batu ti manga bagaw kang isinurat sa kabag-u pag malapad pag manga batu kanmu ginipak. Bag-u paulian nimu inda sa kaban.’

³ “Nakan nagbuwat ngani aku kaban buwat sa akasya ag nagtapyas duwa ka malapad pag manga batu parihu ga sitay sa kabag-u, ag nagtukad aku sa bantud dara ti duwa ka malapad pag manga batu.

⁴ Isinurat Panginuun sa inda pag malapad pag manga batu kay isinurat sa kabag-u, ti Sampulu ka Sugu, ti ipinakaun niya sa kanyu pagka nagbagaw siya ginan sa apuy katpung sirang nagkatipun kamu sa bantud. Pagka naipakaun yi inda Panginuun sa kangku,

⁵ nagdugsun aku sa bantud ag ipinauli niku inda sa kang binwat kaban kayu, angay sa pag-isugu Panginuun sa kangku, ag tugka taynguna asan di inda.”

⁶ Naglakaw ti manga Israilita ginan sa bubun manga taga Yaakan atabug sa Musira. Ati pag namatay si Aarun ag ati diman pag ilinbung. Ag si Iliyasar kay anak imaw ti nag-ublus sa kanya sa kay pagkatakinan manughandug.

⁷ Siyun ginan, nag-atag sida sa Gudguda bag-u rargu sa Hutbata, usa ka rugar may manga sapa.

⁸ Ati pag udas, pinili Panginuun ti lahi ni Libi sa pagdara sa Kaban Kasunduan Panginuun, hampay mansirbi sa kay atubangan, ag hampay papaladan ti manga tawu sa ngaran niya. Taynguna tugka katida kanda buruwatun.

⁹ Nakan ngani ti manga lahi ni Libi unman may bahagi ngatay minana daga parihu sa natanggap nida kaparihu manga Israilita. Ti Panginuun imaw ti kanda bahagi angay sa sinabi Panginuun niyu Diyus.

¹⁰ Magkun waya si Muysis, “Parihu sa kang binuwat kabag-u, nagpatayak aku sa bantud sa sulud upatpulu ka sirang ag upatpulu ka yabi, ag pinatingihan di maan aku Panginuun ag balaw niya kamu ipinadamhak.

¹¹ Nagbagaw siya sa kangku, ‘Lakaw yi, panguluhi ti manga Israilita sa pagsulud ag pag-apu sa daga kang itinaratu iayaw sa kanyu manga ginurang.’

Paggalang ag Pagsunud sa Diyus

¹² “Bag-u taynguna, nasakupan Israil, ti paghilingun lang sa kanyu Panginuun niyu Diyus paggalang kamu sa kanya, pagpangabuhi angay sa kay manga kagustuhan, mahala siya, pagsirbi sa kanya sa buu niyu tagipusuun hanggan karadwa,

¹³ ag pagtupad sa kay manga sugu hanggan manga surundanun ti pag-ipakaun niku sa kanyu taynguna pag sirang hampay sa kanyu ikaayad.

¹⁴ “Sa Panginuun niyu Diyus ti kalangitan, una ti pinakaabwat pag langit, hanggan ti kalibutan ag ti tanan siyun.

¹⁵ Dapat pinili Panginuun kanyu manga ginurang hampay kay mahalun, ag kamu kanda manga lahi ti pinili niya mas higit sa tanan pag nasyun, tugka kainda kamu di maan kay pinili pag manga nasakupan.

¹⁶ Nakan bag-uha niyu kanyu tagipusuun ag danga yi kamu magpaganit kanyu ulu.

¹⁷ Dahil ti Panginuun niyu Diyus imaw ti Diyus manga diyus ag ti Panginuun manga panginuun. Makamaskihan siya ag makadululaw pag Diyus. Unman siya may pagpalabihun angay sa kahamtangan tawu ag unman magtanggap suhul.

¹⁸ Pag-apinan niya ti karampatan manga ilu hanggan manga buranday pag babayi. Pagmahalun niya ti manga day-uhan mag-ulian sa Israil ag pagpakan-an niya sida karan-unun hanggan manga rutay.

¹⁹ Nakan mahala diman waydi niyu ti manga day-uhan, dahil kamu manga day-uhan diman waydi kaybi sa Ihiptu.

²⁰ Galanga niyu ti Panginuun niyu Diyus ag siya lang gid kanyu sirbihan. Pagsa kanya di gid kamu ag pagsumpa kamu sa kay lang ngaran.

²¹ Dayawa niyu siya, dahil siya kanyu Diyus ti nagbuwat makamaskihan ag makadululaw pag manga bagay kanyu gid nakitan.

²² Katpung atabug kanyu manga ginurang sa Ihiptu, 70 lang sida tanan. Dapat kainda pinayamu kamu Panginuun niyu Diyus parihu sa pamgasan sa langit kay kayamu.