Danyil 9 - Hanunuu

Nandarangin si Danyil para sa manga Israilita

¹ Si Daryu taga Midya anak ni Aswiru ti hari kaybi sa buu Babilunya.

² Katpung un-an timpu niya paghari, naalaman niku sa manga Kasuratan mamirmaminti daut ti Hirusalim sa sulud pitumpulu ka timpu, angay sa sinabi Panginuun sa kan purupita Hirimyas.

³ Dahil siyun, nagpakarani aku sa Panginuun Diyus ag nandarangin. Unman aku naghandum karan-unun, nanrutay aku saku ag namauli dapug sa kang ulu.

⁴ Kaindaay kang pagsabihun sa kang darangin sa Panginuun niku Diyus ag nanhagad patawad sa kang manga kasalanan hanggan sa kasalanan manga Israilita: “Panginuun, makamaskihan kawu ag makadululaw pag Diyus. Matinupadun kawu sa kanmu kasunduan mahalun nimu ti magmahal sa kanmu hanggan ti magsunud sa kanmu manga sugu.

⁵ Nagkasala kami sa kanmu. Nagbuwat kami manga kadautan ag ipinasipala nimi kanmu manga sugu hanggan surundanun.

⁶ Unman kami namatingi sa kanmu manugsirbi pag manga purupita, kanmu sinugu manhampang sa kanmi manga hari, manga takinan, manga paggurangunun hanggan sa tanan nasakupan Israil.

⁷ “Matadlung gid kawu, Panginuun, dapat kami inda makakaray-a tugka taynguna. Katunda diman ti tanan nasakupan Huda ag Hirusalim, hanggan ti tanan Israilita winayak nimu sa ararani hanggan sa ararayu pag rugar dahil sa kanda paglabag sa kanmu.

⁸ Makakaray-a kami, Panginuun, hanggan kanmi manga hari, manga takinan, ag manga paggurangunun, dahil nagkasala kami sa kanmu.

⁹ Dapat maawaun di gid kawu, Panginuun nimi Diyus, ag mapinatawadun una waya naglaban kami sa kanmu.

¹⁰ Unman kami nagsunud sa kanmu dahil balaw nimi sinunud ti ipinakaun nimu pag manga sugu sa kanmi sa panab-anan nimu manga manugsirbi pag manga purupita.

¹¹ Naglabag ti tanan Israilita sa kanmu Kasuguan; balaw nida gustu sumunud sa kanmu pagsabihun. Ag dahil sa kanmi kasalanan, rinmas-ug sa kanmi ti saad, ti nakasurat sa Kasuguan ni Muysis, kanmu manugsirbi.

¹² Tinupad nimu kanmu pagsabihun laban sa kanmi hanggan sa kanmi manga takinan kuntay parusahan nimu kami masyadu gid. Nakan ti nangyari sa Hirusalim unman gid may kaparihu sa buu kalibutan.

¹³ Nagras-ug inda pag parusa sa kanmi angay sa nisurat sa Kasuguan ni Muysis. Lang madi katida ti nangyari, Panginuun nimi Diyus, balaw nimi sinikap makabaya kawu sa kanmi sa panab-anan pagpatlikud sa kanmi manga kasalanan ag ti pagkilala sa kanmu katutuuhanan.

¹⁴ Alistu kawu pumarusa sa kanmi; ag pagbuwatun ngani nimu dahil hustu kawu sa tanan nimu pagbuwatun. Dapat unman diman kami nagsunud sa kanmu.

¹⁵ “Panginuun nimi Diyus, ipinakakit nimu kanmu kamaskihan katpung ipinalwas nimu kanmu nasakupan ginan sa Ihiptu, nakan niburayhaw kawu tugka kainda. Pag-akuun nimi kami nagkasala ag nagbuwat kadautan.

¹⁶ Nakan Panginuun, angay sa kanmu buwat matadlung, magpanuyu aku bul-a yi nimu kanmu pangagalit sa Hirusalim, kanmu banwa ag banal pag bantud. Dahil sa kanmi manga kasalanan hanggan sa kasalanan nimi manga ginurang, pinuyaan kami nimi manga kalibut hanggan ti Hirusalim.

¹⁷ “Nakan taynguna, Diyus, patingihi kang darangin ag magpaawa-awa. Hampay madayaw kawu Panginuun, patindugan maan kanmu Balay nadaut ag napabay-anan.

¹⁸ Diyus, patingihi aku. Bantayi kanmi kaawaawa pag kahamtangan hanggan ti pagkadaut nimu banwa nu naan pagkilalan-un kanmu ngaran. Unman kami magdarangin sa kanmu dahil matadlung kami, nu unman dahil alam nimi kuntay maawaun gid kawu.

¹⁹ Panginuun, patingihi kami ag patawada. Awati kami para kilalan-un kanmu ngaran, dahil pagkilalan-un kawu Diyus sa kanmu banwa hanggan sa kanmu manga nasakupan.”

Itinultul ni Gabril ti Kahulugan Pangakakitun

²⁰ Parargu aku magdarangin ag magtapat kang manga kasalanan hanggan ti kasalanan niku manga kasimanwa Israilita. Magpanagunsirung aku sa Panginuun niku Diyus para sa kay banal pag bantud.

²¹ Ag habang magdarangin aku, naglayang madali si Gabril atag sa kangku nakitan niku sa kang pangakakitun. Katpung sa udas maghugut marukirum pag handug.

²² Magkun siya, “Danyil, nagsitay aku hampay sabihun niku sa kanmu ti tungkul sa pangakakitun.

²³ Sa kabag-u di waya nimu darangin may ipinaburayhaw yi ti Diyus, nakan nag-ataytag aku hampay itultul sa kanmu, dahil pagmahalun kawu Diyus. Nakan pagpatingi kawu ag intindiha kang sabihun sa kanmu.

²⁴ “Itinagka yi Diyus ti 490 ka timpu sa banal pag banwa hanggan sa kanmu kasimanwa hampay umapas kanda paglaban ag pagbuwat daut sa Diyus, para malukat sida sa kanda manga kasalanan, hampay maiparargu Diyus ti katadlungan tugka aban, hampay matupad ti pangakakitun hanggan ti hula, ag hampay maitalaga maan ti Balay Diyus.

²⁵ “Kailangan nimu maintindihan ag masalman ginan sa udas nagsugu kuntay patindugan maan ti Hirusalim tugka sa pagras-ug pinili Diyus pag takinan, makalawuy dap ti 49 ka timpu. Ag sa sulud 434 ka timpu utru maan ipatindug ti Hirusalim may manga buruybuyahan hanggan palalan-iban. Bumaliw magulu sa tunda katpung pag udas.

²⁶ Pagkalawuy 434 ka timpu, matyun ti pinili Diyus pag takinan ag unman may mangawat sa kanya. Rumas-ug ti usa ka hari ag dautun niya manga tawuhan ti banwa hanggan ti Balay Diyus. Ag angay sa itinagka Diyus, ti pagwayak ag paggira pumarargu tugka sa katapusan. Ti katapusan rumas-ug ga baha.

²⁷ Tunda pag hari mamuwat matibay pag kasunduan sa kayamuan tawu sa sulud pitu ka timpu. Dapat pagkalawuy tulu ka timpu may tunga, amparahun niya ti manga handug ag ipauli niya sa Balay Diyus ti manga mayagting pag bagay, nakan pabay-anan ti Balay Diyus. Pumirmaminti inda ati tugka sa rumas-ug ti katapusan hari, angay sa itinagka Diyus.”