Danyil 8 - Hanunuu

Ti Pangakakitun ni Danyil tungkul sa Karanidu ag Kambing

¹ Sa ikatlu pag timpu paghari ni Bilsasar, may pangakakitun maan aku.

² Sa kang pangakakitun nakitan niku matindugan aku sa pangpang Sapa Ulai, ati sa may alad batu banwa Susa, sa purubinsiya Ilam.

³ May nakitan aku usa ka tudu karanidu matindugan sa pangpang sapa. May duwa siya ka araba sungay. Dapat mas aba kay usa ka sungay lang madi uryan tinmubu.

⁴ Nakitan niku siya magpanungay una naan baliwa. Unman may iba hayup makaampara sa kanya ag unman diman may makapalagiw sa kanya. Magkabwat niya una hintay kay gustu buwatun, nakan nagmakapangyarihan siya.

⁵ Habang pagbantayan niku tunda, kadaka lang may rinmas-ug kambing ginan sa isalpan. Nagpalibut inda sa kalibutan unman mag-idna kay manga lulud sa daga sa subra bisug. May tuhay siya pag sungay sa tab-anan niya manga mata.

⁶ Buu kabisugan niya dinuksulan ti tudu karanidu may duwa ka sungay kang nakitan matindugan sa pangpang sapa.

⁷ Sa kay masyadu pangaisug, ud kay inapasan kay pinakasungay ti karanidu tugka sa napunggal kay duwa ka sungay. Unman yi makalaban ti karanidu, nakan nagpu inda ag tinatatataan lang kambing. Unman gid may nanbawi sa kanya.

⁸ Nagmakapangyarihan waya gid ti kambing. Dapat sa masyadu gid pag kapangyarihan, napuud kay daka pag sungay. Dapat may tinmubu upat ka tuhay pag sungay kay turunu sa upat ka suuk kalibutan.

⁹ Ti usa sa upat tinubuan diit pag sungay. Nagmakapangyarihan inda pag sungay sa isalpan hanggan sa butlakan tugka sa marinu pag daga Israil.

¹⁰ Nagmakapangyarihan waya siya tugka sa langit, ag pinanragdag niya ti manga taga langit pag sundalu hanggan ti manga pamgasan, bag-u kay tinatatataan lang.

¹¹ Kinilala niya kay sadili mas makapangyarihan kaysa Takinan manga taga langit pag sundalu. Inampara niya ti sirang-sirang pag handug sa Balay Diyus, ag inuringan niya ti Balay Diyus.

¹² Sa tunda pag binwat niya, ipinasirung sa kanya ti manga taga langit pag sundalu hanggan ti sirang-sirang pag handug. Binul-an kabuluhan niya ti katutuuhanan, ag nagpanalu siya sa kay manga binwat.

¹³ Nasaydan niku ti duwa ka anghil magharampangan. Nagpaingana ti usa ka anghil sa usa, “Kabitay nguna kadugay matapus inda pag pangakakitun tungkul sa pag-ampara sa sirang-sirang pag handug hanggan ti pag-uring sa Balay Diyus imaw ti kadahilanan agud mapabay-anan inda, ag ti pagtatatata sa Balay Diyus hanggan sa manga taga langit pag sundalu?”

¹⁴ Nagsagut sa kanya ti usa ka anghil, “Mangyari inda sa sulud 2,300 ka surip ag maghugut marukirum. Ag rargu rayawan ti Balay Diyus.”

Itinultul ni Gabril ti Kahulugan Pangakakitun

¹⁵ Habang magbantay aku sa tunda pag pangakakitun pag-isip-isipun niku nu hintay tunda kay kahulugan, kadaka lang may nagtindug sa kang atubangan ga tawu.

¹⁶ Bag-u may nasaydan aku busis tawu ginan sa Sapa Ulai magkun, “Gabril, tultulan sa kanya kay kahulugan pangakakitun.”

¹⁷ Pagka nagpakarani si Gabril sa kangku, nagluhud aku sa dala. Dapat magkun siya, “Tawu, kailangan masalman nimu kanmu pangakakitun tungkul sa uryan pag panahun.”

¹⁸ Habang maghampang siya sa kangku, nabul-an malay aku ag nisubsub sa daga. Dapat hiniyaptan niya aku ag binangun.

¹⁹ Magkun siya, “Itultul niku sa kanmu nu hintay ti mangyari sa aratubangun nu ilubus Diyus kay pangagalit, dahil inalistu yi ti uryan pag panahun.

²⁰ Tunda pag tudu karanidu kanmu nakitan may duwa ka sungay kay kahulugan manga kaharian Midya ag Pirsiya.

²¹ Tunda pag kambing kay kahulugan ti kaharian Grisya, ag ti daka pag sungay sa tab-anan niya manga mata kay kahulugan ti un-an pag hari.

²² Ti upat ka sungay nagtubu pagka napunggal ti un-an pag sungay kay kahulugan upat ka kaharian Grisya naayaw-ayaw. Dapat kanda manga hari unman magmakapangyarihan parihu sa un-an pag kaharian.

²³ “Sa uryan manga sirang nida paghari, sa udas masyadu yi kanda kadautan, humari ti usa ka mahigpit ag maradaya pag hari.

²⁴ Magmakapangyarihan siya, dapat balaw parihu sa inmuna sa kanya pag hari. Manlingut ti manga tawu sa kay buwatun pagruris, ag manalu siya una hintay kay buwatun. Rurisun niya ti manga makapangyarihan pag tawu hanggan ti manga pinili Diyus maging banal pag nasakupan.

²⁵ Dahil sa kay kakayahan, bumaliw marapanalu siya sa kay magpandaya. Ipadayaw niya kay sadili, ag mayamu tawu kay panmatyun sa daya. Labanan niya hanggan ti Takinan manga takinan. Dapat sa uryan, rurisun siya balaw sa kapangyarihan tawu nu ud sa kamaskihan Diyus.

²⁶ “Danyil, tutuu gid kanmu nakitan pag pangakakitun tungkul sa pag-ampara sa pansurip ag sa maghugut marukirum pag handug. Dapat danga lang dapu pagsabihan inda dahil dugay waya waydi mangyari.”

²⁷ Tunda ginan, aku, si Danyil, linubayan ag nasakit manga pira ka sirang. Pagka naayadan aku, nagbalik aku sa tarabahu ipinakaun hari sa kangku. Dapat parargu di gid niku pag-isipun tunda pag pangakakitun balaw niku magkasalman.