Danyil 6 - Hanunuu

Inyinmut si Danyil sa Liyun Kali

¹ Taynguna, nagpili si Hari Daryu 120 ka gubirnadur manguna sa buu niya kaharian.

² Inda pag manga gubirnadur pagpangunahan tulu ka manugpaanyu, ti usa sa kanda si Danyil. Katida ti binwat hampay unman makurian ti hari sa kay magdumara.

³ Si Danyil ti mas tuhay gid sa kanda tanan dahil sa kay tuhay pag kakayahan, nakan naggayak ti hari buwatun manug-asikasu siya sa buu kaharian.

⁴ Nakan ngani, ti duwa niya ka kaibahan manugpaanyu ag ti manga gubirnadur nanhanap salan sa pagdumara ni Danyil agud may ibangdan sida laban sa kanya. Dapat unman gid sida may nakitan salan dahil masarigan gid si Danyil ag mayad kay magdumara.

⁵ Nakan magkun sida, “Unman gid may ibangdan laban sa kanya, purya lang nu ligawan nita siya salan may kinaalaman sa Kasuguan niya Diyus.”

⁶ Nakan nag-atag sida sa hari ag magkun, “Mana lumawig kanmu buhi, Mahal Hari!

⁷ Kami bilang manga manugpaanyu, manga miyur, manga gubirnadur, manga manughusay, ag manga manug-asikasu sa kanmu kaharian nagkausa manpakihampang sa kanmu kuntay pamuwat kawu usa ka sugu, sa sulud tatlumpulu ka sirang kailangan unman gid may mandarangin una sa kantapu pag diyus ngatay tawu nu unman sa kanmu lang. Ag kailangan tupadun gid inda, dahil una si unu ti lumabag sa inda pag sugu iyamut sa may liyun kali.

⁸ Nakan Mahal Hari, patupadan inda pag kasuguan. Pasuratan yi inda ag pirmahi hampay unman yi gid inda mauman ngatay mapahimudil angay sa kasuguan nita kaharian sa Midya ag Pirsiya.”

⁹ Nagpasnu si Hari Daryu, nakan pinirmahan niya tunda pag kasuguan.

¹⁰ Pagka naalaman ni Danyil kuntay nagpirma ti hari, nuli siya ag sinmulud sa kay sulud-sulud sa ikadwa pag ugpu salug, may manga gaha ati maatubangan sa Hirusalim. Ati siya pag magdarangin ag magdayaw maluhudan sa kay Diyus tulu ka bisis sa usa ka sirang, angay sa kay kinaugalian.

¹¹ Dapat pagtiidan maaw siya manga takinan magdumut sa kanya, ag nakitan nida siya magdarangin maghagad awat sa kay Diyus.

¹² Nakan nag-atag sida sa hari hampay itultul ti paglabag ni Danyil sa kasuguan. Magkun sida sa hari, “Unman aw, Mahal Hari, nagpirma kawu sa kasuguan kuntay sa sulud tatlumpulu ka sirang unman may mandarangin una sa kantapu pag diyus una tawu nu unman sa kanmu lang? Ag una si unu ti lumabag sa tunda pag sugu iyamut sa may liyun kali?” Nagsagut ti hari, “Tutuu tunda, ag angay sa kasuguan nita kaharian Midya ag Pirsiya, unman yi gid tida mahimu mauman ngatay mapahimudil.”

¹³ Nakan magkun sida sa hari, “Si Danyil usa sa manga bihag ginan sa Huda unman nagsunud sa kanmu kasuguan. Magdarangin siya sa kay Diyus katlu ginan sa usa ka sirang.”

¹⁴ Pagka nakadnug ti hari, nanruku gid siya. Gustu niya awatan si Danyil. Nakan magligaw siya paraan tugka sa nisalup ti init hampay makaribri si Danyil.

¹⁵ Nagtiripnan maan ti manga takinan hari ag magkun sida sa hari, “Alam nimu, Mahal Hari, angay sa kasuguan nita kaharian Midya ag Pirsiya, ti ipinatupad hari pag kasuguan balaw yi mahimu bag-uhun.”

¹⁶ Nakan ipinadakup hari si Danyil ag ipinayamut sa may liyun kali. Magkun ti hari sa kan Danyil, “Mana iribri kawu nimu Diyus kanmu pirmi pagsirbihan.”

¹⁷ Bag-u tinalakpan usa ka daka pag batu ti kali nagyamtan sa kan Danyil, ag tinatakan waya singsing hari magliud ag singsing niya manga matinudukun pag manga tawu hampay unman may bumukas inda.

¹⁸ Siyun ginan nuli si Hari Daryu sa kay balay hari. Unman siya nangaun sa tunda pag yabi ag unman diman siya nanhagad kasulungan. Ag unman siya makaturug.

¹⁹ Pagkasurip, magpanhanag-hanag di waya nagdali-dali ti hari nag-atag sa may liyun kali.

²⁰ Pagkaras-ug niya ati, maruku siya nagtawag, “Danyil, suruguun buhi pag Diyus, irinibri aw kawu sa manga liyun nimu pirmi pagsirbihan pag Diyus?”

²¹ Nagsagut si Danyil, “Mana lumawig kanmu buhi, Mahal Hari!

²² Unman aku inunu manga liyun, dahil nagpadara kang Diyus manga anghil hampay hirumun ti bibig manga liyun. Binwat inda Diyus dahil alam niya matadlung kang buhi ag unman aku may nabwat daut laban sa kanmu.”

²³ Pagka nasaydan tunda hari, nakabaya gid siya ag nagsugu siya bul-a si Danyil sa kali. Pagkanab-ul si Danyil, unman gid sida may nakitan una di diit pag biyag una di garid sa kay bilug, dahil sa pagsarig niya sa kay Diyus.

²⁴ Nakan nagsugu ti hari kuntay ti tanan nagbangdan sa kan Danyil yamtan sa may liyun kali hanggan kanda manga asawa ag manga anak. Udwaya sida mag-idna sa sirung dinuksulan yi sida manga liyun ag pinanwayak.

²⁵ Bag-u nagsurat si Hari Daryu sa tanan manga tawu sa tuhay-tuhay pag nasyun hanggan linahi, ag pamagaw sa kalibutan. Kaindaay ti nakasurat: “Pagsa kanyu mana ti kahusayan ag pag mayad gid kanyu kahamtangan.

²⁶ “Pag-isugu niku sa tanan manga tawu sakup niku kaharian pagkadala ag paggalang sa Diyus ni Danyil. Dahil siya ti buhi pag Diyus ag magkabuhi unman may katapusan. Parargu kay paghari hanggan aban, ag unman may makadaug sa kay kaharian.

²⁷ Magribri siya ag magbuwat makadululaw ag lilingutan pag manga tanda sa langit hanggan sitay sa babaw daga. Irinibri niya si Danyil sa manga liyun.”

²⁸ Nag-abunda si Danyil sa kay paghari ni Daryu hanggan sa kay paghari ni Sayrus taga Pirsiya.