Danyil 4 - Hanunuu

Ti Ikadwa pag Tagin-up ni Nabukudunusur

¹ Nagbuwat si Hari Nabukudunusur usa ka pabarita para sa tanan tawu sa tuhay-tuhay pag nasyun hanggan linahi, ag pamagaw sa kalibutan. Kaindaay ti nakasurat: “Pagsa kanyu ti kahusayan ag pag mayad gid kanyu kahamtangan.

² “Gustu niku sabihun sa kanyu ti manga makadululaw ag lilingutan pag manga bagay ti binwat Kaabwat-abwatan pag Diyus sa kangku.

³ Lilingutan kay kamaskihan ag makadululaw ti ipinakakit Diyus! Maghari siya unman may katapusan.

⁴ “Nu tungkul sa kang kahamtangan sitay sa balay hari, mayad ag maalwan kang buhi.

⁵ Dapat may tagin-up aku madala imaw ti nakapaaburidu sa kangku.

⁶ Nakan nagsugu aku daran-un sa kangku ti tanan pag dunungin sa Babilunya hampay mitultul nida sa kangku kay ibug sabihun kang tagin-up.

⁷ Pagkarinmas-ug ti manga manugsalumangka, pandaniwan, manughula, hanggan pangiwaan, itinultul niku sa kanda kang tagin-up, dapat unman nida mag-itultul kay ibug sabihun.

⁸ “Pagka sa uryan, nag-atag si Danyil sa kangku. (Iningarnan siya Biltisasar imaw kay ngaran niku diyus. Ag asan sa kanya ti ispiritu banal pag manga diyus.) Itinultul niku sa kanya kang tagin-up.

⁹ Magkun aku, ‘Biltisasar, takinan manga manugsalumangka, alam niku asan sa kanmu ti ispiritu banal pag manga diyus, ag madali nimu maalaman ti manga madalum pag manga kahulugan. Nakan tultulan sa kangku nu hintay ti kahulugan manga pangakakitun kang nakitan sa kang tagin-up.

¹⁰ Inda kang nakitan sa pangakakitun niku habang maturugan aku: Nakitan niku ti usa ka abwat gid pag kayu sa karaw-an kalibutan.

¹¹ Linmangba ag inmabwat waya gid inda tugka sa inmaput sa langit ag mag-akitan una sa pinakaarayu ginan pag bahagi kalibutan.

¹² Marinu kay manga labung ag mayamu kay manga burak kang-ud pakaunun ti tanan. Magpahamuy ti manga hayup sa kanya ag magpugad ti manga manuk sa kay manga sanga. Siyun pag magbuul karan-unun ti tanan manga linalang.’

¹³ “Bag-u nakitan diman niku ti usa ka anghil nagdugsun ginan sa langit.

¹⁴ Nagringgit siya, ‘Pukana niyu ti kayu ag pamulda kay manga sanga. Bul-a kay manga labung ag yamtan kay manga burak. Bugawa diman niyu ti manga hayup magpahamuy sa kay sirung hanggan ti manga manuk magpugad sa kay manga sanga.

¹⁵ Dapat pabay-ani lang niyu kay tuud hanggan kay gamut siyun sa karatagan magkahigtan baul ag galang.’ “Pabay-ani lang inda mabasa tun-ug sa mailamnun kaibahan ti manga hayup.

¹⁶ Sa sulud pitu ka timpu naduraan siya isip mayad bilang tawu, kay kaisipan bumaliw ga kaisipan hayup.

¹⁷ Imaw inda ti parusa ipinasandam anghil hampay maalaman tanan ti Kaabwat-abwatan pag Diyus imaw ti may kamaskihan sa kaharian manga tawu. Ag mahimu niya sida ipasakup una sa kantapu nu gustu niya, una waya sa pinakapugri pag tawu.

¹⁸ “Imaw tunda kang tagin-up. Nakan aku, si Hari Nabukudunusur, magkun kan Biltisasar, ‘Tultuli aku kay kahulugan inda dahil unman gid una di usa sa manga dunungin sa kang kaharian ti makapaliwanag sa kangku kay kahulugan inda. Dapat makapaliwanag kawu dahil ti ispiritu banal pag manga diyus asan sa kanmu.’ ”

Itinultul ni Danyil ti Kahulugan Tagin-up

¹⁹ Nataranta ag nadala gid si Danyil (pag-ingarnan diman Biltisasar). Nakan magkun ti hari sa kanya, “Biltisasar, danga kawu magkaaburidu sa kang tagin-up ag sa kay kahulugan.” Nagsagut si Biltisasar, “Mahal Hari, mana kanmu tagin-up ag kay kahulugan mangyari sa kanmu manga kalaban danga sa kanmu.

²⁰ Ti nakitan nimu pag kayu linmangba ag inmabwat tugka sa nakaaput sa langit ag mag-akitan una naan ginan baliwa sa kalibutan,

²¹ marinu kay manga labung ag mayamu kay burak kaya pakaunun ti tanan, nu naan magpasirung ti manga hayup ag magpugad ti manga manuk sa kay manga sanga,

²² balaw may iba nu unman kawu, Mahal Hari. Nagbaliw makapangyarihan kawu tugka sa inmaput sa langit kanmu kapangyarihan, ag kanmu paghari inmaput una naan baliwa pag suuk kalibutan.”

²³ Magkun waya si Danyil, “Nakitan diman nimu, Mahal Hari, ti usa ka anghil nagdugsun ginan sa langit nagringgit, ‘Pukana niyu ti kayu dapat pabay-ani lang niyu kay tuud hanggan kay gamut siyun sa karatagan magkahigtan baul ag galang. Pabay-ani lang inda mabasa tun-ug sa mailamnun kaibahan ti manga hayup sa talun sa sulud pitu ka timpu.’

²⁴ “Mahal Hari, inda kay ibug sabihun tunda pangakakitun ipinahintulut Kaabwat-abwatan pag Diyus mangyari sa kanmu:

²⁵ Palayasun kawu pakarayu sa manga tawu ag mangulian kawu kaibahan manga hayup sa talun. Manharab kawu ilamnun parihu sa baka ag mabasa pirmi kawu tun-ug. Pagkalawuy pitu ka timpu, kilalan-un nimu ti Kaabwat-abwatan pag Diyus imaw ti may kamaskihan sa kaharian manga tawu ag mahimu niya sida ipasirung una sa kantapu nu gustu niya.

²⁶ Tungkul waydi sa sinabi anghil pabay-anan lang kay tuud hanggan kay gamut, kay ibug sabihun tunda ibalik sa kanmu ti kaharian nimu nu kilalan-un nimu ti Diyus siya gid ti maghari sa tanan.

²⁷ Nakan Mahal Hari, mana tanggapun nimu inda kang paanyu sa kanmu: Pagpakarayu kawu sa kasalanan ag pagbuwat mayad, ag pagmaawaun kawu sa manga pugri. Nu buwatun nimu inda barang pumirmaminti kawu abunda.”

²⁸ Inda tanan tutuu nangyari sa buhi ni Hari Nabukudunusur.

²⁹ Pagkalawuy usa ka timpu ginan sa pagtultul ni Danyil sa kay kahulugan tagin-up, kaindaay ti nangyari: Habang maglakaw-lakaw si Hari Nabukudunusur sa atup niya balay sa Babilunya

³⁰ magkun siya, “Tutuu gid ungud makapangyarihan yi ti Babilunya, ti kang ipinatindug pag kaharian banwa sa panab-anan niku sadili kabisugan ag para sa kang kadayawan.”

³¹ Udwaya ngani siya magkatapus sa kay magbagaw, may binmagaw ngap ginan sa langit magkun, “Hari Nabukudunusur, pagpatingi kawu: Pagbawiun yi niku sa kanmu ti karampatan bilang hari.

³² Palayasun kawu pakarayu sa manga tawu ag mangulian kawu kaibahan manga hayup sa talun. Manharab kawu ilamnun parihu sa baka. Pagkalawuy pitu ka timpu, kilalan-un nimu ti Kaabwat-abwatan pag Diyus imaw ti may kamaskihan sa kaharian manga tawu ag mahimu niya sida ipasirung una sa kantapu nu gustu niya.”

³³ Sa tunda diman pag udas nangyari inda sa kan Nabukudunusur. Pinalayas siya pakarayu sa manga tawu ag nanharab ilamnun parihu sa baka. Pirmi magkabasa tun-ug kay bilug, ag nangaraba kay bulbul parihu sa bulbul agila hanggan kay kuku parihu sa kuku manuk.

³⁴ “Pagkalawuy pitu ka timpu, aku, si Nabukudunusur, nagdangup sa Diyus, ag nagbalik kang daan pagkaisipan. Nakan dinayaw niku ag kinilala ti Kaabwat-abwatan pag Diyus buhi sa unman may katapusan. Nagkumun aku, ‘Kay paghari unman may katapusan.

³⁵ Ud may halaga ti manga tawu sa kalibutan nu ipaparihu sa kanya. Pagbuwatun niya kay gustu sa manga anghil sa langit hanggan sa manga tawu sa daga. Unman may makaampara ngatay makahadlang sa kanya.’

³⁶ “Pagka binmalik yi kang mayad pagkaisipan, ibinalik diman sa kangku kang kadayawan ag kapangyarihan bilang hari. Tinanggap di maan aku niku manga manugpamahala hanggan niku manga manughusay, ag nagbaliw mas makapangyarihan waya aku kaysa kabag-u.

³⁷ Nakan taynguna pagdayawun niku ag pagkilalan-un ti Hari langit, dahil hustu ag matadlung ti tanan niya pagbuwatun, ag pag-ipaababa niya ti una si unu ti magpadayaw-dayaw.”